ATL

Avestruz style un caso penal den corte

February 7th, 2022

Den un columna anterior mi a comparti ki proceso un acusado ta pasa aden ora deten’e. Awor cu tin hopi wowo riba e caso Averstruz, nos a dicidi di conta poco di e proceso den corte ora di e caso mes. Otro bisa ora, un acusado presenta dilanti mesa berde.

Mesa berde

E expresion mesa berde no a cay for di shelo. Den corte e hues ta sinta tras di un mesa berde. E mesa no ta pareu cu e vloer, sino e ta mas halto. Esey ta pone cu e hues ta mira e sospechoso for di halto. Esaki su mes por haci un impresion rib’un sospechoso. 

Fiscal 

Banda di dje, e fiscal ta sinta na su man drechi. E fiscal ta forma parti di Ministerio Publico y ta esun cu ta acusa e sospechoso di a comete un of mas delito. Si mira bon, por ripara cu e fiscal y e hues no ta sinta na e mesun mesa. Nan ta sinta na mesa separa. Esaki ta pa mustra cu e hues y e fiscal no ta hunto, si esey tabata e caso anto e ora e hues no lo ta imparcial. E distancia entre e 2 mesanan por ta chikito pero e ta para pa un principio importante di nos sistema di derecho penal. 

Griffier

Un di tres persona cu ta sinta banda di e hues ta e griffier. E griffier ta sinta na man robes di e hues y e si ta sinta sam sam cu e hues pasobra e ta un assistent di e hues. E ta tuma nota di locual bisa pa despues por yuda e hues cu preparacion di e sentencia. Antes e tabata skirbi hopi, awendia ta normal bo mir’e cu un laptop ta type bay gol.

Abogado 

E abogado no ta sinta ni banda ni cerca di e hues. E abogado ta sinta den e sala di corte na un mesa cu stul y un microfon. For di e mesa y e distancia ey e ta cumpli cu su tarea di defende interes di su cliente. E unico tarea di e abogado ta e interes di su cliente. Tur locual cu e sa of tende di su cliente ta confidencial y ta protegi pa ley. Esaki kiermen cu e cliente por ta sigur cu e abogado lo no comparti e informacion aki cu ningun otro hende. Sabiendo tur e hechonan, e abogado por defende interes di e cliente di un manera mas optimal.

Toga

Tur e actornan aki, esta e hues, griffier, fiscal y e abogado, ta aparece den toga. Toga ta un palabra den e idioma Latin y ta nifica algo manera un cover of algo cu ta tapa. Cu e toga den corte, ta simbolisa cu e hues ta actua como un representante di ley y no como un persona particular. Tambe e toga ta ilustra cu tur e actornan aki ta igual y cu den e trabou noble aki no ta haci diferencia si e actornan ta homber, muhe, rico of pober. Nan religion tampoco ta hunga un rol. Napoleon ta esun cu a impone e bistimento di toga den sala di corte. E toga ta reglamenta via un decreto real. E maraviya di un toga (mester) ta 4 cm.

Acusado

E acusado ta sinta memey den e sala. P’e no tin mesa. E ta haya un stoel pa sinta y ora e para tin un mueble tras di unda e ta para. Si acaso e ta encarcela den KIA, ora di e caso ta trec’e cu siguridad na sala di corte y na e porta ta keda un miembro di siguridad pa tira bista pa asina ora e caso caba e bay bek KIA.

Dagvaarding

Den e prome fase di un caso penal, Ministerio Publico o sea e fiscal ta esun cu ta lidera. Nan ta manda e sospechoso un citacion (dagvaarding) pa e presenta na corte pa su caso.

Legalidad

A base di e principio di legalidad e por demanda un acusado pero solamente si e tin un base legal pa haci esaki. Si un persona comete un acto cu no ta un delito pa ley, e ora e fiscal no por marca e persona ey como acusado y saca un dagvaarding contra dje. Bisiti color blauw no ta defini como un crimen den nos ley penal. Esey kiermen fiscal no por dagvaard mi si mi bisti blauw.

Oportuno 

E di dos principio cu e fiscal mester tene cuenta cu ne ta si ta oportuno pa cita (dagvaard) un persona. Aki e fiscal tin e poder pa persigui un persona penalmente of no. E decision aki ta di dje. Si acaso abo entrega un keho contra un persona y despues fiscal bisa cu e no ta haya cu ta oportuno pa persiguie, abo por scoge den sea bo ta biba cu esey of bo mester apela e decision aki na Hof, unda tin tres hues ta atende. Si Hof ta di acuerdo cu bo, e ta ordena fiscal pa persigui e persona toch.

Tres choice

Na momento cu un fiscal caba cu e investigacion di un caso, e tin tres opcion. Nan ta sepot, transaccion of hiba e sospechoso dilanti corte.

Sepot

Un fiscal por seponeer un caso. Si e haci esaki e ta informa e acusado cu e no lo sigui cu e acusacion y cu por lo tanto e caso no lo bin dilanti. Fiscal lo por scoge pa esaki si e caso ta suak of cu e no tin suficiente prueba contra e acusado y cu e ta premira cu e acusado lo por sali liber. E por scoge pa esaki tambe si e ta haya cu e acusado no ta castigabel pa locual el a comete. Pensa por ehempel den un caso cu un persona den self defense a lastima un agresor. Fiscal por pone tambe un sepot condicional. Por ehempel door di bisa cu e persona mester cumpli cu cierto condicion y cu pa un periodo di por ehempel 1 aña e mester tene su mes na e condicionnan stimula.

Transaccion 

Den cierto caso, fiscal por dicidi di no persigui un sospechoso si e ta dispuesto pa paga un suma di placa of haci trabou pa comunidad of un combinacion di nan dos. Esaki ta in prerogativo di fiscal y no ta inusual. E iniciativa di un transaccion por bin tambe di un sospechoso o sea e sospechoso por acerca fiscal y pidi pa un transaccion pa asina evita persecucion penal. Si partidonan yega na otro, e persecucion penal lo no sigui. Esaki sa pasa tambe ora ta trata di entidadnan legal manera un NV of un fundacion.

Corte

Si no bin sepot of transaccion, fiscal ta prepara pa bay corte pa crusa spada cu e acusado y su defensa. Ey tur cos por pasa, sea e acusado ta sali liber of e ta haya un castigo. E sentencia mester bin dentro di 21 dia cu e tratamento di e caso tuma luga. Contra e decision di corte di prome instancia por bay den apelacion na Hof. Di Hof por bay den apelacion na corte supremo na Den Haag, conoci tambe como Hoge Raad. 

Hoge Raad

Den pasado mi tabatin e oportunidad di pleita un caso penal, personalmente, na Hoge Raad y maak mee esey den persona. Esaki tabata algo particular pasobra normalmente solamente abogadonan Hulandes registra cna Hoge Raad so por bringa caso eyden. Tin un excepcion pa casonan penal pero asina mes pa por bay Hoge Raad bo mester ta conoci cu e proceduranan particular di Hoge Raad ya cu eynan e caso no ta wordo trata a base di e hechonan sino solamente a base di aspectonan tecnico di ley. Normalmente ta abogadonan Hulandes specialisa riba derecho penal so por atende tipo di casonan asina. Cu ademas pa e acusado ta bin cu un costo significante. Den pasado mi a haci caso civil tambe na Hoge Raad, cu exito, pero esaki tabata den cooperacion cu un abogado Hulandes specialisa di Hoge Raad.

Reconocimento 

Como profesional e tabata un momento special specialmente ora e presidente suplente di Hoge Raad a reconoce mi persona como abogado di Aruba pero tambe como decano di Orden di Abogado di Aruba, prome cu e caso a cuminsa. Prome cu caso e presidente mes di Hoge Raad a ricibi mi y despues di e caso e presidente suplente a ofrece mi un tour di e edificio di Hoge Raad. Esaki a wordo haci door di e deurwaarder di Hoge Raad. Cu e caso ey y tambe cu uno na Raad van Staten mi por bisa cu como abogado mi por a pleita caso den tur e instancianan di corte den Reino Hulandes. Riba su mes esaki ta algo cu masha poco abogado den Caribe Hulandes por bisa. Awor mi falta pa pleita un caso na e Corte Europeo. Gomez Coffie tin un coresponsal na Hulanda, Gonesh Advocaten https://advocatenkantoor-den-haag.nl/ pa locual ta casonan na Hoge Raad. Di e forma aki bo abogado faborito ta duna bo asistencia na Hoge Raad tambe.



Share on social media

Facebook
Twitter
LinkedIn