BBO 2023 Un chens pa ta husto y innovativo

BBO 2023

Un chens pa ta husto y innovativo

Siman pasa nos a mira Comerciante Uni Aruba (CUA) presenta aspectonan relevante pa comunidad, esta e aumento di Belasting over Bedrijfsomzetten (BBO), cu ta den pipeline pa gobierno ehecuta despues cu nos tira pagara. Tambe CUA a presenta, den un forma pro activo y eficiente, un proposicion pa cambia e style di cobra BBO cu ta mustra cu por beneficia e caha di gobierno y na mes momento frena e efecto inflatorio cu e sistema actual di cobra BBO ta trece cu ne. Ta di aplaudi cu comercio, of en todo caso CUA, ta bin cu un sugerencia cu ta beneficia comunidad, cu ta beneficia e pueblo consumido y cu alabes ta stimula pa gobierno haya su fair share door cu mas hende ta contribui na e caha di gobierno. Den e columna di e siman aki mi ta analisa e proposicion pa mira si en berdad e solucion aki ta mesun bon manera cu nan ta pint’e.

EN COMUN

Ta bon pa destaca cu gobierno, mediante su presentacion pa e introduccion di e Belasting Toegevoegde Waarde (BTW), ta señala y admiti cu e BBO actual y su efecto cumulativo no ta (mas) na bienestar di comunidad. Pesey a sondea, a prepara y a bin cu e plan pa introduci un BTW. Kiermen cu CUA y hopi otro ta haya cu e BBO actual no ta e miho forma. Si awor gobierno subi e BBO, e ta cay bek den un sistema cu ta contrario na su mesun deseonan.

BTW

Den un columna anterior mi a splica e sistema di BTW y e bentaha cu esaki ta trece pa gobierno, comercio y e consumido. Por lesa e columna ey aki (insert link). Lo mi no ripiti esaki. Pero mi ta señala si, cu e sistema di paga BTW na gobierno, kitando e BTW paga di e BTW cobra, ta evita cu nos ta paga BTW den forma cumulativo. Ta uza e sistema aki mundialmente y pa añas caba, entre otro IMF, ta recomend’e.

PROPOSICION CUA 2023

E proposicion di CUA, de facto, ta un hybrid di e BBO actual y e BTW original proponi door di gobierno.

CON E LO TRAHA?

CUA ta propone pa cobra e BBO actual di 6% na frontera o sea na momento di importacion. E propuesta aki lo trece cu ne cu tur consumidor of comerciante lo paga e BBO ora di importa producto pero tur comerciante cu lo rebende e producto aki e lo por trek af e BBO aki y dia 15 di tur luna paga e diferencia. Esun cu no ta rebende un producto pero ta e consumidor final no por trek af e BBO.

EFFECTO

Cu e sistema aki no lo trece cu ne cu e prijsnan lo subi paso e effecto di “tax on tax” ta ser elimina. Lagando e BBO na e mes nivel – manera CUA ta propone – tambe ta percura pa e prijsnan cu nos ta paga awe lo no subi ora aña bolter. E beneficio grandi pa gobierno ta cu e solucion aki lo trece hopi placa den caha di gobierno door cu mas persona of comerciante lo paga BBO na frontera y door cu productonan cu no ta wordo rebendi, e BBO no por wordo kita bek. 

DIES (10) BENEFICIO

Den cuadro di e columna aki mi a conta dies (10) beneficio di e propuesta di CUA. Ban wak ki nan ta.

1. Pa cuminsa e placa ta drenta tur siman cu carga drenta. Esaki ta mehora e cash flow di gobierno, pasobra e placa ta drenta mas lihe den caha y den un forma cu no por evita of no paga e BBO corectamente.
2. Esaki ta pone tambe cu, por ehempel e hotelnan of supermercado of cualkier otro comerciante, mayorista of particular cu ta importa carga, ta contribui directamente cu BBO. Esaki lo trece cu ne un aumento di entrada pa gobierno. Net locual gobierno kier, mas placa.
3. E hotelnan, cu nan mes ta importa cantidad di producto incluyendo e productonan cu e comerciante local ta importa, e ora tambe ta contribui cu BBO. Esaki ta bon, specialmente considerando cu e miles di turista cu ta keda na hotel, awor no ta contribui cu BBO pasobra e BBO no ta conta pa nan. Esaki ta crea un equal level playing field entre e hotelnan y resto di comercio.
4. Ademas, e BBO ta permiti e comerciante cu ta cobra BBO pa trek af e BBO cu nan ta paga na tercero y asina evita cumulacion di BBO cu na su turno ta evita cu e prijsnan ta subi door di elimina e “tax on tax”
5. E sistema aki lo trece cu ne cu e hotelnan cu awor no ta paga BBO y nunca a paga BBO si lo paga BBO. Hotel lo bisa kisas cu no ta fair pa nan pasobra nan lo no por trek af e BBO door cu nan no ta rebende. Pero di otro banda corda cu nan tur e tempo aki no a paga BBO. Tur e tempo cu a pasa nan a probecha di e exemption cu nan tin cual tampoco no ta fair compara cu resto di comercio.
6. Ademas, esaki ta frena e comerciante cu ta importa direct, cu no ta paga BBO na momento di importacion y cu bendiendo den un forma informal sin recibo tambe lo paga nan fair share. Dus, mas placa pa gobierno
7. Esun cu ta haci negoshi bou man of sin recibo no lo por trek af BBO e ora su ganashi ta bira menos. Esaki ta trece cu ne cu e tin menos incentivo pa traha bou di man y mas bien lo kier cumpli cu ley awor si. Y si e scoge pa toch keda sin cobra BBO, at least e ora e no ta competi di un manera inhusto cu esunnan cu si ta cumpli.  
8. Mas cumplimento (compliance) cu BBO. Ta conoci cu e porcentahe di hende of compania cu si ta paga BBO ta hopi abou pasobra no tin un sistema eficiente pa controla. Awor of segun e plan di gobierno, t’e mesun grupo cu si ta cumpli lo sinti e aumento di BBO.
9. Den e sistema di BTW, lo paga na momento di importacion. Tur importacion, dus tambe por ehempel tur e compranan cu ta haci online por ehempel via Amazon. Esaki ta elimina e competencia inhusto cu gobierno mes tambe a constata riba e tema aki pasobra Amazon no ta un “contribuyente” di belasting, o sea na e caha di gobierno.
10. E proposicion di CUA ta de facto un sistema “hybrid” o sea un combinacion di BBO y BTW cu e bentaha cu di awor aki caba comercio por cuminsa custuma cu e sistema di paga BBO (y den futuro BTW) na frontera y trek  af e BBO (y den futuro BTW) ora di rebende. 

OPTELSOM 

Nos no mester di ta un gran economista of un experto di accounting of estadistica pa conclui cu si bo subi e BBO y si bo haci e base di esunnan cu ta paga na momento di importacion mas grandi, cu bo ta aumenta e entrada di gobierno. Sin cu e prijsnan cu nos ta paga mas caro ainda banda di tur e aumentonan di awa, coriente, gasolin, diesel, los di tur e aumento di flete y prijsnan en general pa motibo mundial.Mirando esaki, mi ta haya cu e proposicion di CUA uno simpatico, fair, eficiente y bon pa e poder di compra di nos como consumido.

E PREGUNTA 

E pregunta e ora ta dicon gobierno no ta haci uzo di e sugerencia aki pa trece mas placa pa e caha di gobierno?

SUGERENCIA

Mirando esaki, mi lo kier haci un sugerencia humilde na un of mas di nos parlamentarionan, pone man na obra y trece un proposicion di ley pa introduci e sistema di “BBO a la CUA” pa asina por trat’e na mes momento cu mester trata e aumento di tarifa di BBO. Pasobra pa subi e tarifa, Parlamento mester aprob’e. Ami lo bay asina leu di sugeri pa si adapta e sistema proponi door di CUA, pa uza un tarifa di 6.5% o sea un aumento di 0.5% anto analisa cuanto placa extra ta drenta den caha di gobierno y si mester na 2024 subie na 7% aunke kisas e ora nos lo por ta cla caba pa por implementa BTW den un forma responsabel.Claro esaki ta tuma mas trabou y lo tuma su esfuerso. Pero esaki ta algo relativamente simpel y lo ta alinea cu e mision di parlamentarionan pa sirbi y pa garantisa bienestar di pueblo.

CONCLUSION

Mirando tur esaki mi ta kere cu lo mester tuma e sugerencia aki na serio y cu gusto ami y mi ta sigur hopi otro abogado, fiscalista y huristanan legislativo (cu awor no tin hopi ta cana rond), lo ta dispuesto pa traha riba un iniciativa di ley asina y tin e cla pa presenta na Parlamento pa aprobacion.