ATL

Black Friday y Duana

November 29th, 2021

Black Friday y Duana

Un par di dia pasa ma mira un publicacion riba Facebook di Post Aruba N.V. cu mi a haya peculiar. E ‘post’ tabata bisa cu duana no ta acepta descuento ora di importacion o sea cu e clientenan di Post Aruba ta wordo avisa cu si nan cumpra algo y haya descuento, por ehempel door di Black Friday, cu duana no ta tene cuenta cu esey y ta cobra invoerrechten riba e prijs sin descuento. Somehow e cos ey no a sinta mi bon. Esey ta pone den contexto tambe storianan cu bo ta tende rond ora di importa productonan cu duana parce semper ta busca pa cobra e prijs maximo y no e prijs real. Razon suficiente pa bau busca mas leu y comparti algo riba e topico ey.

Articulo 59

E articulo aki di e ley di importacion ta bisa cu:“.. pa importacion e balor di e producto ta e balor cu e producto tin basa riba un compra entre dos partido independiente operando den un mercado liber. ..”

Awor si bo cumpra algo di un famia na Merca y e duna bo un prijs super rebaha, e ora ey kisas e compra no a tuma luga entre dos partido independiente operando en un mercado liber. Esaki riba su mes ta comprendibel. Awor, locual no ta comprendibel ta dicon si abo cumpra un producto cu descuento di 40% pa motibo di Black Friday cu duana ta bisa (segun Post Aruba) cu lo cobra riba e 100% y no riba e 60% cu bo a paga realmente. Esaki mi no ta volg, pasobra si bo aplica e articulo 59 di e ley mi ta mira cu nada no a cambia. Dos partido independiente a yega na un acuerdo den un mercado liber, cu ta inclui por ehempel Black Friday of Cyber Monday, pa un cierto prijs. Cu duana gusta of no esaki no ta wordo menciona como relevante den e articulo. Awor como “bon ambtenaar” mi ta sigur cu na duana nan por bisa, “no pero nos ta mir’e otro”. Claro nan por mir’e otro pero e letra di e ley no ta cambia, dus e pregunta ta keda ta unda of kico nan ta mira anto!

Base di articulo 59

Ami lo prefera mira e base di e articulo aki cu, segun duana mes ta bisa riba nan website, ta e definicion di balor di Bruselas. Esaki na su turno ta basa riba e Tratado di Balornan di duana. Esaki a bira parti di nos leynan desde aña 1971. Cu otro palabra, no locual “e chef” a bisa. Segun e literatura cu mi a consulta, e base ta keda e prijs cu realmente a paga, a menos cu tin motibo pa pensa cu tin of otro circunstancia concreto cu ta indica cu e prijs cu a wordo paga a wordo infuencia door di factornan cu ta pone cu e compra no tawata entre partidonan independiente operando den un mercado liber. Awor si un duana serio cu ta sigui ley corectamente wak un factura entre un residente di Aruba y un compania stranhero, den mi opinion e mester aplica e balor riba e factura a menos cu e tin un indicacion concreto cu tin algo robes cu e transaccion aki. Cu ta duda of cu e ta hay’e straño so no ta suficiente pa un ambtenaar serio. Awor si no tin seriedad, tur cos ta posibel. Awor esaki ta trece cu ne cu duana ta funciona den un forma mas arbitrario pero cu ta genera mas entrada. E pregunta ta si duana t’ey pa aplica ley corectamente of pa genera mas entrada.

Prijs por varia?

Claro cu prijs por varia! Mester tene cuenta tambe cu, por ehempel, dealnan special door di por ehempel Black Friday of compra den un baratio of un findishi. Den cada pais lo tin un diferencia den prijs riba un producto depende unda bo cumpr’e. Un dealer di auto den un ciudad afluente cu ta situa den un area cu tereno y belastingnan relaciona cu e tereno y unda e costo di bida ta halto, lo ta mas caro cu un dealer situa den un area rural den por ehempel Mid-West na Merca. Duana mester por compronde esaki y aplica esaki tambe.

Ley di Methusalem

Di otro banda, e ley riba su mes ta anticua. E sistema di Balor di Bruselas, segun cierto autornan, no ta esun di miho pasobra e ta duna mucho espacio pa mal uzo door di duana. Door di esaki e por beneficia entrada di gobierno den un forma dudoso. Ta stimula proteccionismo y asina stroba comercio liber. 

Desaroyo internacional

World Trade Organisation (WTO) ta boga pa un otro sistema. Uno den cual e factura ta determinante, a menos cu duana por comproba otro. Na momento cu Aruba cambia e ley di duana lo ta bon pa adopta e sistema mas moderno aki y no keda cu un sistema deficiente. Kisas awor cu lo bin un reforma fiscal lo ta bon pa implementa esaki. Di otro banda, ta bon pa aplica e sistema actual den un forma cu ta tene cuenta cu princionan di bon gobernacion (algemene beginsels van behoorlijk bestuur) lo por evita e mal uzo di e sistema actual. E problema cu mi ta wak, ta cu esaki parce cu mayoria ambtenaar no a haya e training necesario riba e principionan aki y con pa aplica nan.

Y awor

Si duana nenga bo e prijs di factura, nan tin e bentaha y nan sa esey cu pa e diferencia kisas lo bo no haci moeilijk pasobra bo kier of mester e producto. Si esey no ta e caso, protesta y apela e decision, cual nan mester pone por escrito y busca bo derecho

 

Share on social media

Facebook
Twitter
LinkedIn