Big brother is watching! Bo hefe mag loer bo na trabou?

Big brother is watching!

Bo hefe mag loer bo na trabou?

Awendia mayoria di nos ta parce modelo. Constantemente nos ta tras di un camara. Sea pa saca selfie of pa un potret cu e gang. Hera nos tin camara na cas of na trabou. Ora nos ta bezig riba nos laptop, IPad, tablet of celular, nos ta mira nos aparato pero kisas e device tambe ta mira bo pasobra tur tin camara. Tin hende no ta cansa nan chip mucho cu e cosnan ey, pero di otro banda, aki aya bo por topa hende cu ta pone tape riba nan webcam pa “nan” no mir’e! Recientemente tabatin un caso den corte unda un trahado no a gusta e idea mucho di cu “nan” ta mir’e via su webcam. El a protesta y nan a vlam e un retiro “op staande voet”!

Esaki ta locual el a manda:

“I don’t feel comfortable being monitored for 9 hours a day by a camera. This is an invasion of my privacy and makes me feel really uncomfortable. That is the reason why my camera is not on. You can already monitor all activities on my laptop and I am sharing my screen”.

Esaki tabata e contesta:

“You are fired!”

Mericano style. Ban mira con e rabo di porco a krul den corte.

  Retiro 

Laga mi cuminsa pa bisa cu e tipo di carta di retiro manera esun cu a uza den e caso aki no ta un carta di retiro cu ami lo skirbi of conseha pa uza. Un carta asina den mayoria caso den corte lo no “stick” y e trahado lo gana sigur. No pasobra locual e trahado lo por a haci no ta malo pero mas bien pasobra e carta di retiro ta mal skirbi y no ta cumpli cu e rekisitonan aplicabel. No laga nan dal bo un cara ‘bou asina facil.

Ademas, como doño di trabou bo no mester laga bo emocionnan domina bo y pone bo kita un hende fo’i trabou di un forma slordig of incorecto. Un retiro fo’i sla por bons bek riba bo y por sali costoso. Tambe, e por afecta bo credibilidad y autoridad como hefe.

Tip pa doño di trabou 

Si bo ta kere cu un trahado a actua robes, di tal forma cu bo kier kit’e fo’i trabou, no core haci algo pura y emocional. Slow down, skirbi e echonan pa bo no lubida y pa bo tin e informacion relevante bo dilanti. Yama #BoAbogadoFaborito y consulta un ke otro. E ora ey, hunto por evalua e situacion, den un forma trankil y cu cabes friu y tuma e pasonan necesario den un forma prudente. Tene cuenta cu kisas hasta e conseho lo por ta cu e echo (ainda) no ta suficiente pa hustifica un retiro, pero kisas un warning por escrito si ta na su luga. Si ta asina, bo ta evita un caso den corte y gasto cu ta bin cu ne.

Otro tip pa doño di trabou

Bien por ta cu tin un trahado cu ta poco “cansa-cansa”, cu cada rato tin algo cu ne. Tin biaha e ta asina extremo cu bo ta fada y ta ni worry pa dun’e un warning verbal y mucho menos perde tempo y dun’e un warning riba papel. Wel esey no ta e miho manera pasobra mañan den corte bo no tin ningun back up pa e mal comportacion dia den dia ‘for. Esey por pone cu atrobe bo ta perde un caso, no pasobra e trahado tin rason, sino pasobra abo como doño di trabou no ta bon prepara. P’esey en general ta bon pa documenta cada incidente y pone den file.

Tin trahado ta siña “pa no firma nada”. Masha bon, pero si un trahado nenga di firma un warning, djis percura pa bo tin un testigo cu el a haya e warning y skirbi riba e warning e nomber di e testigo y pone acerca cu e trahado a nenga di firma.  Ademas, bo por manda copia via email si e tin email di trabou y hasta stoot e un copia di e warning via WhatsApp. Si e por uza WhatsApp pa meld AO of bisa cu e ta yega laat, e por tuma un warning tambe via chat of no? #DenSuBody

E caso di webcam

Bek na e caso. E gay ‘ki tabata traha pa un compania (Americano) di software. Cierto momento el a haya instruccion di ariba pa e tene su webcam “on” mientras cu e ta trahando na su desk. E no a gusta e idea mucho y a manda un mail bisando cu e no ta confortabel lagando e webcam “on” henter ora, cu esaki ta viola su derecho di privacidad y cu su “screen share” ta on anyway y cu via esey e hefe por monitor su trabou of su actividad riba computer sin problema. A sigui un bay-bin, e hefe su ‘fuse a bula’ y a kita e homber fo’i trabou. E trahado no a guli esaki y a bay corte busca su derecho. Ey el a haya rason tambe pasobra corte a haya cu e instruccion duna pa laga e webcam “on” no ta rasonabel y pa di dos; cu e carta di retiro no ta cumpli cu e rekisitonan aplicabel. Aki e hefe a hay’e dobel den su body y e trahado a strica como 100 mil Florin (Afl. 100.000,=) na compensacion.

Corte Europeo

Corte Europeo den pasado ya a trata e tema di monitor trahado cu camara na trabou. Den e caso di dia 28 di november 2017, Corte Europeo a dicta:

 “(…) that video surveillance of an employee in the workplace, be it covert or not, must be considered as a considerable intrusion into the employee’s private life (…), and hence [the court] considers that it constitutes an interference within the meaning of Article 8 [Convention for the Protection of Human Rights and Fundamental Freedoms]. Any interference can only be justified under Article 8 § 2 if it is in accordance with the law, pursues one or more of the legitimate aims to which that provision refers and is necessary in a democratic society in order to achieve any such aim” (ECLI:CE:ECHR:2017:1128JUD007083813, § 55)

Berdad ta cu e derecho aki ta pone cu gobierno mester zorg pa tin suficiente proteccion y/of e leynan necesario. O sea, esaki ta conta entre e pais y e ciudadano y no necesariamente entre ciudadano y ciudadano, por ehempel den un relacion di trabou. Asina mes un trahado por haci un apelacion riba e derecho aki den su relacion di trabou si gobierno mes no haci suficiente. E ultimo ta posibel ora parlamento no traha leynan adecua of na tempo. Nos tur sa cu den parlamento e atencion por lo general ta riba zundra, ofende y ataca otro y no riba traha ley, pero esey ta un otro storia.

Final 

E caso aki ta particular. Lo mi tin gana di mira un caso similar pero unda e hefe a haci un miho trabou cu su carta di retiro of cu un miho preparacion prome cu a bay over na retiro pa analisa si e resultado lo ta mescos. No por kita afo cu mira un trahado via su webcam pa 8 ora largo ta manera poco creepy pero kisas tin alternativa. E screen sharing ta un, pero kisas, tambe depende di e funcion di e empleado y e compania, observa of graba un trahado na trabou ta na su luga of hustifica of te hasta necesario, tambe kisas hasta pa e siguridad di e trahado mes. Pensa riba un teller den banco, un dealer den casino of un security na aeropuerto. E tema ‘ki no ta facil y e cos no tur ora ta preto of blanco.

Si bo tin duda na pia di trabou, sea como hefe of trahado, por tuma contacto libremente cu  #BoAbogadoFaborito pa asina por evalua e situacion y bin cu recomendacion con pa handle e caso specifico ey.