ATL

Bo sa kico ta un sepot?

Bo sa kico ta un sepot?

E siman aki e columna ‘ki ta inspira door di cierto actonan politico y di actonan door di un politico. 

Rasa apart

Pa cuminsa, tin hende ta haya politiconan un rasa apart. Naturalmente no ta bon pa generalisa pero hopi di nan ta hende cu pa falta di peso ta flota bin halto y ta end up den posicionnan importante, manera minister of parlamentario. Manera nan yega na e puesto ey, nan ta afecta tur sentido di realidad y e dos placa di sinti cu tabatin y nan ta cuminsa forma parti di un ecosistema unda interes di partido y interes pa sobrebibi politicamente ta parce e unico aspecto cu ta guia nan. Cu añanan mi por a wak e tipo di transformacion asina, unda hende cu prome cu politiek ta normal, educa y culto, ta pasa den un transformacion cu ta igual na esunnan cu ta flota bin halto y haya posicion. 

Mi conoce hopi cu ta comparti e pensamento aki y cu, ademas den sector priva, nunca lo pensa di contrata un politico pa asumi un rol importante den nan compania. Pesey tin varios “profesional” awendia cu ta bisti bachi y ta “experto” of “consehero” ora “nan” partido ta na mando. Esun cu ta contrata nan ta esun politico cu riba su mes no tin mucho peso y ta destaca den bati man pa su mes y su partido y bagatalisa, chercha of insulta oponentenan politico.  Un cos cu parce ta masha na moda awendia ta yena un tas cu papel y marcha bay Ministerio Publico, preferiblemente compaña door di un par di sostenedo o sea e ekivalente di un grupo di cheerleaders, no mas cu nan no ta mes bunita cu e cheerleadernan cu nos por mira na Cable TV. Tambe parce cu e politiconan aki no por yega oficina di Ministerio Publico sin cu nan invita prensa pa asina broadcast di biaha kico nan ta bay haci of a caba di haci y ki tipo di keho nan a entrega contra cua oponente politico. 

Avestruz 

E ultimo cu nos por a mira ta e parlamentario Avestruz cu a bay oficina di Ministerio Publico cu hopi fanfaria bay entrega keho penal contra dos oponente politico. Un ta Prome Minister y e otro ta un ex-minister y actual parlamentario. E siman cu a pasa Ministerio Publico a informa comunidad y e personanan concerni cu e keho a resulta den un “sepot”. Esey mester a baha manera un baño di awa frieu cerca Avestruz, pasobra su fli no a subi. Of manera cierto di mi amigonan ta bisa “palo a cay ‘ki” of e cos a “back fire”. Kisas miho e uza tempo pa enfoca riba su defensa cu bay haci mal uzo di e sistema hudicial. Pero cada loco cu su locura. E siman aki mi ta elabora riba e topico di “sepot” pa asina kisas yuda compronde e actuacion di Ministerio Publico den e dos casonan aki miho.

Sistema parlamentario

Prome cu mi trata e tema penal, kisas ta bon toch pa para un rato y analisa con e cos a cambia cu tempo. Nos sistema parlamentario ta uno apart. Banda di cu tin biaha ta parce cu e no ta funciona mucho. Normal si un minister no actua corecto of tin pregunta over di su actonan, parlamento tin e instrumento pa yama e minister en cuestion aden y question’e y evalua si e ta sigui gosa di confiansa di parlamento. Si e ultimo aki no ta e caso, anto parlamento por pasa un mocion di desconfiansa y manda e minister cas.  Esaki ta e sancion parlamentario cu nos democracia conoce y no kehonan penal.

Awor, si parlamento mes no uza e instrumentonan aki of si nos parlamento ta elegi presidentenan cu no ta apto pa e funcion, e ora ya e mesun politiconan no mester keha cu nan instrumentonan no ta funciona. Ta nan mes a traha e saus asina. Ademas, nan ta lubida cu e cuchiu ta corta tur dos banda. Awe abo ta burla di oposicion pero mañan nan ta burla di bo.

Parce cu esaki a hiba e ora cu si no por manda e minister cas via parlamento, ta scoge e caminda di Ministerio Publico pa coy un tema politico y cambie den un tema penal. Esaki sea pa gana punto of pa causa daño politico y parce cu si por tambe daño personal na nan contrincante. Ey nos por mira cu e politiconan por bay hopi leu. Asina leu cu hasta ta uza instrumentonan pa otro proposito pa cual a crea nan. Un desaroyo kisas poco desapuntante pero e ta pas den e serie di desapuntenan cu nos ta haya diariamente di e circo politico y e actornan envolvi. Incluyendo un paar di payaso.

Sepot

Sepot ta un instrumento cu ta disponibel na Ministerio Publico pa den un caso unda sea Ministerio Publico a ricibi un keho penal of si acaso a ricibi un proces-verbaal di polis, pa no bay over na mas investigacion of pa dicidi cu no lo persigui e persona of personanan contra cual tin un keho of investigacion andando. Den caso cu Ministerio Publico dicidi di duna un sepot, ta documenta e decision aki di fiscal y motiva den un carta manda na e persona en cuestion. Asina cu e persona ricibie, e tin e siguransa di parti di fiscal cu e caso no lo sigui y cu Ministerio Publico lo no bay over pa emiti un dagvaarding contra dje. En todo caso no a base di e echonan en cuestion. Cu esaki e persona(nan) ta absolvi y libra di e caso. Den e caso di siman pasa, e dos personanan a keda absolvi di e keho haci.

Motibo pa un sepot

Awor no ta tur caso ta caba cu un sepot. E caso por caba tambe cu un dagvaarding y finalmente cu un sentencia di hues. Un motibo pa un sepot por ta cu fiscal a investiga y no ta mira suficiente prueba pa por hustifica un dagvaarding. Tambe por a pasa cu den un caso unda cierto daño a wordo causa, cu e persona ya a compensa e daño causa y cu pesey den e caso ey no ta mira necesidad pa sigui cu un caso penal. Un otro tema ta si un persona, sea cu e ta un politico of no, cana yega Ministerio Publico cu echonan of storianan cu ta carece di base of cu ta asina sin pia y sin cabes cu fiscal no por saca ningun echo castigabel. E ora no ta keda nada otro pa Ministerio Publico cera e caso y informa esunnan concerni di e decision aki. Pa locual ta e sepot duna siman cu a pasa, Ministerio Publico a emiti un declaracion cu por lesa riba e website di Ministerio Publico. https://omaruba.com

Y awor?

Awor si esun cu a entrega keho no ta contento cu e decision di fiscal pa seponeer e caso, anto e por bay Corte di Apelacion y motiva cu peticion pa corte ordena fiscal pa inicia un investigacion penal toch. Pero esaki no ta bay cu e mesun fanfaria cu ora di cana bay Ministerio Publico cu boshi cheerleaders. Aki mester traha un peticion probablemente cu ayudo di un abogado y defende esaki. E ta costa un tiki placa pero si bo tin placa (kisas hasta cash den un envelope warda por alli) placa kisas no ta un problema y ademas asina ta tene e wega politico andando p’e siguiente eleccion.

 

 

 

 

Valse aangifte

Di otro banda, esun cu haci un denuncia falso ta core risico cu esunnan en cuestion por entrega un keho penal contra e valse aangifte y esey si ta un echo castigabel. Esey por bira poco fastioso y hasta “back fire” si mañan bo wordo sentencia pa un valse aangifte. Esey kisas ta cay bou di otro ley, e ley di karma.


Share on social media

Facebook
Twitter
LinkedIn