Bo vakantie, bo derecho Vakantie….di bo e ta!

Bo vakantie, bo derecho

Vakantie….di bo e ta!

Tur siman, diferente fuente ta inspira mi pa e topico di cada columna. Tin biaha e ta un caso interesante, otro biaha un noticia pero tambe tin biaha door di abo, e fiel lesado di e columna LEGAL. E ultimo aki ta pasa door di feedback of pregunta cu mi ta haya, sea via medionan social of ora nos topa riba caya of den botica of na supermercado. E columna di e siman aki ta inspira door di un pregunta den un tienda na Playa.

Nos no mag haya vakantie awo

Un señora a acerca mi y a conta cu el a pidi un siman di vakantie awo na comienso di december pa asina e por haci su cosnan. Su doño di trabou a neng’e pasobra “December ta druk pa nos y ningun hende mag haya vakantie”. M’a keda wak e señora poco asombra. Djey m’a splic’e con e cos ta hinca den otro y m’a bis’e cu lo mi dedica un columna LEGAL na e topico aki. Awel señora manera piminti. At’e ‘ki!

Un bon doño di trabou

Asombra pasobra m’a pensa cu lo bo por verwacht di un bon doño di trabou pa e ta habri pa considera peticion pa vakantie na momento cu e wordo haci y no aplica un “regla” general cu no ta permiti vakantie den december y ya. Si esey ta asina, e ora e persona aki of su coleganan nunca lo por tuma vakantie den luna di december. Esey lo ta poco straño.

Marco legal

Den pasado nos tabatin un ley special pa reglamenta vakantie na pia di trabou. Desde prome di september 2021, a elimina e ley aki y a pasa e tema ey pa nos Codigo Civil den seccion tres di titulo dies di e di shete buki. Mas facil kisas ta pa menciona pagina 26 di mi buki di ley laboral pa esunnan cu tin e.

Pakico vakantie?

Awor, prome cu nos bay wak kico precies e ley ta bisa, kisas ta bon pa para keto un rato na e pregunta pakico e tema di vakantie ta relevante den e tema laboral. Claro nos tur mester un break pero e motibo ta cu tur persona mester tin e oportunidad di por dal un time out di tur dia y pasa un tempo cu no tin cu sigui e schedule di trabou tur dia y punch-in / punch-out. 

Organisacionnan manera International Labor Organisation (I.L.O), ta di e opinion cu ta esencial pa un trahado tin e chens pa descansa durante un vakantie y cu e descanso aki ta vital pa e stabilidad y desaroyo mental, social, emocional y fisico di un persona. After all ta hende nos ta y nos no ta un mashin traha di hero.

Ta bon pa e trahado tambe realisa esaki y no solamente tuma vakantie en bes di spaar e dianan pa nan bira hopi t’e bay gol. Pero tambe pa probecha e vakantie pa descansa. Claro ta keda na cada ken kico nan ta haci durante nan vakantie, pero no tuma vakantie of tuma vakantie pa bay traha un otro caminda y no descansa, pasobra esaki no ta mucho sano a largo plaso. Antes den ley tabata hasta stipula cu ta prohibi pa traha durante bo vakantie.

Bo vakantie ta bo derecho

Ley ta stipula cu un doño di trabou ta obliga pa duna un empleado e oportunidad pa tuma minimo e vakantie cu el a acumula te cu na e momento ey. Si e tin acumula 10 dia, anto e kier tuma 15 dia di vakantie e doño di trabou no ta obliga di duna e 5 dianan extra ey pero e 10 dianan si.

A menos cu esaki ta regla otro den un contrato individual of colectivo, e doño di trabou tin e obligacion legal pa permiti un trahado tuma su vakantie riba e dianan cu e ta desea, a menos cu e doño di trabou tin un motibo hustifica pa no haci esaki.

Pidie por escrito

Aunke awendia hopi cos ta bay verbal, pa abo como trahado, ta recomendabel pa bo haci bo peticion pa vakantie cu tempo y por escrito. Claro, no ta asunto di bo hefe unda bo ta bay of lag’i bay, ni cu ken, pero si bo agrega detayes, por ehempel, cu bo ta planea pa bay den exterior y mester haci preparacion necesario, pa esey of si e ta lago relaciona cu motibo familiar of kisas medico, esaki den mi opinion ta trece si cu ne cu e ora e doño di trabou ta yama pa tene cuenta cu e circunstancianan aki ora di evalua y dicidi riba e peticion pa vakantie. Ademas, asina cu bo haci e peticion por escrito, bo hefe tin seis siman pa contesta. Si e no contesta den e periodo ey, automaticamente bo tin derecho di haya e vakantie manera bo a pidie! E periodo di seis siman ta parce mi mucho largo. Na Hulanda, segun mi, e ta mas cortico.

E decision 

Asina cu e vakantie ta pidi, sea cu ta den un temporada druk of no, e doño di trabou tin pa consider’e y e espacio cu e tin pa nenga esaki ta limita. Solamente si tin circunstancia, cu na e momento ey en particular ta hustifica esaki, e lo por nenga e vakantie. 

Si e ta un hotel of un restaurant, e no por bisa cu den december no mag tuma vakantie y punto. Awor, si den bo departamento ya caba tin diferente hende cu vakantie, e ora kisas si por nenga bo peticion. Pero, e ora mester bisa y splica esaki. Kisas e ora ey por papia di un of otro alternativa, kisas un siman mas trempan of mas laat. E motibo pa nenga mester ta basa riba algo cu ta impacta of stroba e operacion di e negoshi den un forma pisa. Si e restaurant tin 15 waiter y un kier bay vakantie pasobra su ruman ta casa of ta malo, esey no kiermen cu e ta stroba henter e operacion den un forma pisa. Por adapta schedule of busca un hende pa val in. Kisas un otro hende kier traha poco overtime den e mesun periodo ey. 

Awor, si abo ta e executive chef y abo kier bay vakantie net durante Pasco ora hotel ta ‘rand rand’ y cu yen di evento paden y pafo di hotel pa cater, kisas e ora si ta hustifica pa nenga e vakantie. Of mester planea adelanta y percura pa un remplaso of organisa e kitchen staff di tal forma cu e no ta impacta e operacion.

Un approach mas humano

Den e tema laboral semper mester busca un balans entre locual esun kier y e otro. Hopi tin e inclinacion di mira si kico ta nan derecho como trahado of kico ta nan autoridad como dunado di trabou. Pero si uza un approach unda ambos partido ta analisa mas bien kico ta nan obligacion pa cu e otro, esaki por yuda crea un ambiente mas humano na pia di trabou. Imagina bo un trahado cu ta enfoca riba su obligacion pa duna lo miho di dje na e compania. Di otro banda un compania cu tambe ta enfoca den duna lo mas y miho di e compania na e trahado.  Den mi horeanan, esey ta zona manera un “dream team”.