Cannabis vs CBD-oil con e ta regla den ley?

November 8th, 2021

Pa un tempo caba nos por a tende di e uzo y e beneficionan di cannabis como un tratamento medico of como un alternativa pa tratamento. No solamente na Aruba, pero tambe na Merca y Europa. World Health Organization a conseha Nacionnan Uni pa elimina preparacionnan di e producto puro di cannabidiol (CBD) for di e lista internacional di substancianan controla (narcotico). Mescos cu productonan di CBD cu nan porcentahe di THC ta menos cu 0.2%. Aruba a tene cuenta cu esaki y na december 2019 a bin cu regulacion pa brinda comunidad e posibilidad pa scoge pa producto di CBD cu un porcentahe di THC di menos cu 0.2%. Entretanto e productonan aki ta obenibel riba mercado. E importacion ta mara na un permiso special y un registro di e producto prome cu import’e. Esaki ta beneficia salubridad publico y e consumido. Awe mi lo comparti con e regulacion aki ta funciona.

Azeta di cannabis

E azeta aki ta contene substancia THC, un substancia psicoactivo cu ta e elemento den cannabis cu ta crea e sensacion di “high” si acaso bo consumi suficiente cantidad di dje. Na Inglatera por ehempel azeta di canabis, un un porcentahe di THC mas di 0.2%,  ta reconoci como remedi y uza como tal tambe. Esaki ta pas den e trend mundial. E trend aki ta basa si riba un remedi oficial y produci conforme tur e normanan aplicabel di fabricacion y no un brother sinta bou palo ta dal un cheiba y un tiki rom mientras e ta traha un “azeta campeon”.  Pashentnan na Inglatera y a otro paisnan por haya e remedinan aki exclusivamente via receta medico. Awor ta bon pa realisa si cu pashentnan cu ta haya tipo di remedinan ey no ta hende cu pa kibra siman kier bira halto un rato, sino hendenan cu ta sufri di malesanan pisa y cu probablemente nan calidad di bida no ta ni permiti nan pensa riba “kibra siman” corda pa bira halto. 

Na Merca, e instancia conoci como FDA tambe a aproba cierto medicina asina pa trata cierto casonan hopi extremo di epilepsia. Un enfermedad cu nos no lo kier. Ademas, sin un seguro adecua, e gasto pa tratamento ta exorbitante cu ta pone e remedi ey for di alcance di cierto hendenan. Mi ta verwacht cu tardi of trempan esaki lo ta e caso tambe na Aruba of kisas esaki ta e caso caba, pero estrictamente como parti di un tratamento medico y cu recept.

Azeta di CBD

Azeta di CBD (Cannabidiol) ta un extracto di e mata hennep. E substancia farmacologico activo no ta duna of crea un sensacion di “high” pero tin su efecto positivo riba cierto condicionnan medico y uza pa tratamento contra dolor. Un CBD por tin THC den dje of no. Tin CBD cu no tin THC y pa locual ta trata uzo di suplemento, depende di e pais, e contenido di THC den CBD por varia entre 0.1 pa 0.4%. CBD ta yuda den e areanan di:

• combati dolor
• combati convulsion
• relaha musculo
• anti-oxidante
• anti-psicotico
• anti-inflamatorio
• Protehe nervio

 Nos tur por beneficia di e efectonan positivo aki y ta pesey na Hulanda y depsues na Aruba a adapta e ley pa haci e productonan aki accesibel.

Stap 1 Ley narcotico  

Nos ley narcotico, cu na su turno ta basa riba tratadonan narcotico, ta regula y ta prohibi uzo di substancianan cu ta aparece riba lista di e tratado. E lista ey ta inclui: cannabis (marihuana),  hennep y hopi otro mas. Door di esaki ta contra ley pa tin y/of uza e substancianan aki. Na december 2019 e minister di salud a haci uzo di e mesun ley ey pa exonera productonan di CBB cu un contenido maximo di THC di 0.2% di e ley. Cu esaki a decriminalisa e categoria aki habriendo caminda pa e producto por yega na comunidad.

Stap 2 Ley di remedi

Na mesun momento, o sea december 2019, e minister di salud a clasifica  productonan di CBD cu un contenido maximo di THC di 0.2% como remedi. Door di haci esaki e productonan aki ta cay bou di un regimen existente di registro y importacion di remedi. Esaki ta trece cu ne cu e producto mester wordo controla y registra pa un importado cu e permiso necesario prome cu e por subi mercado. 

Control 

Asina comunidad tin un control riba e productonan y evita cu ta yena e mercado cu productonan cu kisas no ta contene CBD of THC y asina ta pasa e consumidor un 6 pa un 9. Abo como consumidor semper por check cu Inspeccion di Remedi si un producto di CBD ta registra prome cu bo haci uzo di dje. Un importado cu no ta cumpli cu e reglanan di importacion probablemente no lo preocupa mucho tampoco pa e producto cu e ta pusha riba mercado. Of como consumidor bo por puntra e tienda cu ta bende si e producto ta registra y a base di e contesta dicidi si bo ta cumpr’e of no.

Drugtest

Bo no ta bay bira halto si bo dal un paar di drop di CBD oil cu THC max 0.2%. Si na trabou bo no pasa un drugtest ta pasobra b’a dal algo otro, no pasobra b’a hala bo pia cu CBD oil of b’a dal poco bou di bo lenga prome cu b’a bay drumi. Si bo bebe ful e boter mes, tin chens cu lo bo saca prome cu bo bira halto mescos cu si bo bebe un boter di shampoo. 

Final

Uzo di CBD oil cu of sin THC (max 0.2%) como suplemento tin su beneficio. E scogencia ta keda uno personal. CBD cu mas cu 0.2% tambe tin su uzo pero no como suplemento, sino bou di guia medico y via botica cu recept. Uzo di cannabis lora den papel pa huma, sea recreacional of medicinal no ta cay bou di e regulacionnan cu mi a menciona den e columna aki.