ATL

Cera conoci cu e rol di Camara di Comercio y Industria

January 31st, 2022

Diabierna cu a pasa Camara di Comercio a organisa un “business mixer” unda e instituto a presenta su directiva. E presidente nobo ta den persona di mr. Monica Kock, kende ta un abogado di profesion. Un abogado hopi abil, cu hopi experiencia y un colega respeta. E vice presidente a keda den persona di Gavril “Gabo” Mansur. Gabo ta un ehecutivo bancario cu tambe tin amplio experiencia riba su tereno. E combinacion aki ta brinda un directiva cu hopi conocemento di comercio y su diferente facetanan. Comercio por tin confiansa den e liderazgo cu mi ta sigur cu nan lo sa di brinda. Nan ta sigui un liña di personanan respeta den comunidad manera por ehempel Robert “Chobby” Croes y otronan cu a duna di nan parti pa yuda comercio. Presidente saliente Omar Tromp por baha trankil lagando e timon atras den bon man. Mi ta desea nan exito cu nan tarea. Awor, mescos cu den otro columnanan cu ta cubri institutonan importante di nos pais, awe lo mi enfoca riba e instituto aki, nos Camara di Comercio y Industria.

Historia

Segun e website di KVK, e instituto a cuminsa na november 1929 door di un iniciativa di un grupo di mas of menos 30 comerciante cu a pidi e gezaghebber di e tempo ey pa bin cu un organisacion pa representa nan interes. Na september 1930 a firma un decreto pa haci esaki posibel. Si nos analisa bon, esaki a sosode den apenas 10 luna! Awendia gobiernonan, por lo general, no tin e agilidad ey. CdC como tal tin un historia di casi 92 aña. Pa hopi aña CdC tabata situa na Playa panort di Willem III Toren. Awendia e ta estableci den un edificio moderno situa den e parke comercial banda di Banco Central y Divi Hotels. Un edificio, diseña pa e arkitecto local Micheal Habibe. A inaugura e edificio algun aña pasa den presencia di Famia Real.

Corsou

Na Corsou e desaroyo aki a cuminsa prome. Na aña 1884, Gobernador a lanta Camara di Comerio y Fabricanan di Corsou.

Base legal

No a lanta e instituto aki via un acta di notario manera un NV of un Asociacion. A lant’e door di un ley aproba pa Parlamento. E ley aki ta e Ordenansa di Camara di Comercio y Industria. E ley aki nos a tuma over di Antias ora a drenta nos Status Aparte na aña 1986. E ley aki hunto cu un otro ley, e Ordenansa di Registro Comercial ta reglamenta e existencia y funcionamiento di Camara di Comercio.

Directiva

CdC ta representa comercio grandi y comercio chikito. E ley ta prescribi cu nan ta consisti di un directiva di 9 miembro, apunta despues di un eleccion. Ta apunta 5 door di comercio grandi y e resto door di comercio chikito. Negoshi grandi ta esunnan cu nan capital ta surpasa 100 mil florin. Miembronan mester ta doño di un negoshi of tin un funcion di director of subdirector. Solamente esunnan cu ta registra den Censo pa minimo 2 aña, cu tin e nacionalidad Hulandes y cu ta mayor di 25 aña di edad, por ta miembro. E presidente ta representa Camara di Comercio na tur momento.  

Director

Mientras cu ta eligi e directiva periodicamente CdC tin un director permanente. E ta emplea door di CdC y ta encarga cu e maneho diario di e organisacion. Esaki ta e maneho di personal y operacion, mescos cu cualkier otro organisacion.  E director actual ta den persona di Martijn Balkenstijn.

Tarea

Pa ley CdC ta obliga pa duna e minister encarga cu economia conseho of informacion relevante pa comercio na momento cu e minister pidi esaki. Tambe CdC por tuma e iniciativa di su mes.  Ademas di esey, CdC tin autoridad pa entre otro: duna subsidio na instancianan cu ta promove comercio, emiti declaracionnan cu ta na beneficio di comercio, legalisa firmanan cu ta aparece den e registro comercial y cobra pa su maneho. Tambe, CdC por encarga su mes cu cierto tareanan cu ta wordo asigna door di gobierno. Pa cu e ultimo aki por pensa riba e maneho di e registro obligatorio di accionista di companianan y den un futuro cercano e UBO-register.Camara di Comercio ta un organisacion cu mester ta auto-suficiente o sea e mes mester percura pa cubri su gastonan. Esaki ta wordo haci cu e tarifanan cu nan ta cobra. Mientras cu CdC ta independiente, cierto decision mester aprobacion di e minister encarga cu economia.

Ordenansa di Registro Comercial 

E ley di registro comercial ta e base pa e registro aki. A base di e ley ak, a crea e registro comercial y poni bou di maneho di CdC. Kisas esaki ta e funcion cu mayoria sa di dje. Tur negoshi mester ta registra den e registro aki. Specialmente ora como comerciante bo kier haci algo y nan ta pidi bo un uitreksel di CdC. E registro tin un sistema importante den nos mundo comercial y civil pasobra ta a base di e registro aki un hende por mira den e registro y verifica ken en berdad ta legalmente autorisa pa representa un compania. Solamente e director of directornan di un NV por firma un contract y mara e compania legalmente. Si un otro persona, por ehempel un ehecutivo, manager of empleado firma, ta bon pa check si e tin e autoridad pa haci esaki. Si e no ta aparece e ora e mester presenta un volmacht firma door di e director. Asina ta mantene ordo den e mundo di comercio y ta proteha un compania cu no ta ken cu ta por firma y mara e compania zomaar.  

Excepcion

Tin cierto operacionnan cu no mester registra den e registro. Esaki ta entre otro: organonan publico, cierto bendedonan riba caya, cunukero- y piscadonan. Si bo tin duda si mester registra of no, tuma contacto cu CdC y nan lo por guia bo.

Cambionan

Solamente un doño di negoshi of un director por haci cambio den e registro comercial. Esaki ta logico, pa asina proteha intregidad di e registro y cu esaki proteha no solamemte comercio pero tambe ciudadano cu mester por verifica y confia cu e ta deal cu un hende cu en berdar por mara e compania legalmente. Leu a leu sa pasa cu un of mas hende ta purba haci cambio den e registro sin tin e poder pa haci esaki. Of sa pasa cu papelnan cu ta presenta, ta mustra poco off. Den e casonan ey CdC por nenga di haci e cambio. Esun cu kier haci e cambio e ora por back off of hiba Camara di Comercio dilanti Corte. Ora di bay corte, hues lo scucha partidonan y dicidi ken ta ken y ken ta autorisa. Si e gana anto CdC lo haci e cambio. Riba e asepcto aki CdC ta lijdelijk of pasivo. Gomez Coffie a haci diferente di e casonan aki den pasado. Si bo tin necesidad di asistencia of un conseho riba e tema, consulta cu bo abogado favorito of cu autor di e columna aki.

 

Share on social media

Facebook
Twitter
LinkedIn