ATL

Compliance: oportunidad pa trabou!

April 6th, 2021 www.trempan.com

Compliance: oportunidad pa trabou!

Economia no ta pasando den su miho momentonan. Esaki a pone cu hopi negoshi, sea mester a cera of mester a reduci personal of mester a busca un otro modelo di haci negoshi. Trabou den cierto area ta scars, sigur pa esunnan cu ta traha den e area administrativo. Pa locual ami ta observa, mi ta kere si cu pa esunnan cu tin interes, tin hopi oportunidad pa trabou den e area di complianceLagami defini prome kico mi kiermen cu compliance.

Manera ta conoci, pa algun aña caba Banco Central di Aruba ta encarga cu combati labamento di placa y financiamiento di terorismo. E tarea aki a bin cu cierto ley cu practicamente nos tur riba e pida baranca aki ta sinti ora bo deal cu un banco, notario, abogado, accountant, casino y otronan.  Cada rato e bendito papel di 5 florín, cada rato un copia di bo paspoort, pregunta cu for di unda e placa ta bin, etc.  Awe mi no ta bay den e detayenan di e ley, ni duna cualkier opinion riba esaki. Locual si mi kier comparti ta lo siguiente. Pa esunnan cu ta traha de e area administrativo of na un oficina, e area di compliance ta brinda hopi oportunidad di trabou. Tur compania cu ta cay bou di supervision di Banco Central awor pa ley mester tin un compliance officer y un reporting officer.  E companianan aki a bay di no tin un departamento di compliance, pa tin un y guess what? Esaki hopi biaha ta e departamento cu mas ta crece den e compania. Pa traha den compliance no ta dificil. Si bo ta haci tareanan di oficina of si bo ta desea esey, bo ta cla pa dal e prome stap. Bo no mester ningun tipo di diploma. Bo por bay curso aki na Aruba mes y online tambe tin hopi curso y training. Cu cada certificado cu bo haya extra chensnan pa trabou y un salario mas halto ta subi. Dicon? Tin masha poco hende den e area y e demanda ta hopi pa e tipo di hendenan aki. Dicon? Pasobra tur compania sa cu Banco Central por bay controla nan anytime. Y si ora esey pasa y nan cosnan no ta na ordo, boet pisa por cay!  Esey kiermen cu nan ta prefera inverti den e departamento di compliance pa proteha nan mes miho. Si compara esaki cu por ehempel un departamento di HR of payroll, esakinan no ta duna e mesun oportunidad di crecemento y pago pasobra tin hopi hende pa e trabounan ey y e parti ey no ta cay bou di control di Banco Central. Cu otro palabra, si bo ta buscando pa posiciona bo mes pa un trabou di oficina cu bon pago y hopi oportunidad di crece, busca pa siña mas di compliance. Ami mes sa bay training na https://caribbeanidentity.com/ (CICC) compania specialisa riba e tereno y cu ta duna varios curso pa aña. Pa cada curso bo ta haya un certificado cu por yuda bo CV pa ora di solicita. Online tambe tin opcion manera https://www.acams.org

Pronto lo cambia y actualisa e ley di compliance. Esaki lo trece cu ne cu cos lo ta mas streng ainda y cu companianan lo tin mester mas y mas hende pa traha den compliance. Berdad ta cu esaki lo pone mas gasto pa e compania pero pa abo cu mester di un bon trabou, un trabou sigur y cu ta paga bon y pa cual e demanda lo sigui crece den futuro

 

Share on social media

Facebook
Twitter
LinkedIn