ATL

Docente poco fresco…fula y frega!!

Den e dianan aki cos ta hot riba tereno laboral. Cu boso permiso e siman aki tambe lo mi trata un caso laboral. Esaki ta un cu nos Corte Supremo a caba di dicta e siman cu a pasa ki.  

Kico a pasa?

Kico a pasa mes mes, wel…un docente di un banda a duna un studiante un masashi poco intimo dilanti klas unda el a mishi tambe partinan intimo di un studiante. Banda di esey el a klap un otro studiante na su atras bisando cu ta basta tempo caba e tabatin gan’i klap e. Wel manera boso por spera, cos a bruha na e scol y e retiro aki a bay para te na Corte Supremo. Prome cu e caso a yega asina leu, e docente (cayente) ‘ki a wordo kita pero el a baha cu 80 MIL EURO. O sea el a haya 80 mil Euro (mas cu Afl. 150.000) pa, criyoyamente bisa, pa fula y pa frega dos studiante (mayor di edad). Wel wel…

Compensacion di transicion

Prome cu mi drenta den detaye, laga nos para keto un rato y wak e caso bon. Pa cuminsa, e caso a tuma luga na Hulanda, sino di mes lo boso lo a tende di dje riba 24ora of lesa den www.trempan.com caba. Na madre patria ta hinca den ley cu bo tin derecho riba un compensacion di transicion (transitievergoeding) si acaso bo doño di trabou dicidi di kita bo sin cu abo a actua foi’ sla. Awor, si b’a horta anto nan kita bo op staande voet ayo, bo no tin derecho di haya e compensacion di transicion. E cen cu bo ta haya si bo tin derecho riba dje ta 1/3er luna di salario pa cada aña cu bo tabata den servicio.

No tur ora

Awor si pa yega edad di pensioen anto e ora e no ta aplicabel. Tampoco si compania mester laga bo bay pa motibo comercial-economico, anto den bo CAO tin otro areglo hinca. Si bo ta menor di edad y bo no ta surpasa 12 ora di trabou pa siman.

Algo manera cesantia?

E areglo ey tin algo di nos cesantia pero e no ta mescos. Cerca nos no ta asina cu bo hefe por bisa bo ayo y ata bo cesantia ‘ki. E reglanan di nos cesantia ta otro. Awor, un biaha a wordo sugeri pa adapta e cesantia pa asina flexbilisa e mercado laboral, pero esey no ta algo pa humilde columnista opina di dje. Tampoco si mi lo ta na fabor of contra algo asina.

Bek na e caso

Awor prome cu tur hende cuminsa grita, si sa tur e detayenan laga mi bisa acerca cu e caso aki tabata stoba for di aña 2017 caba. Un hues na Maastricht a bisa e homber fresco ey no tin derecho di nada y e scol tabatin mag di kit’e sin dun’e ningun cen. Hof na Den Bosch a haya cu e sucedidio no tabata dje fo’i sla ey (niet ernstig verwijtbaar). Ora a yega Corte Supremo prome biaha, corte a mand’e bek pa un otro Hof y e Hof na Arhem-Leeuwarden di cu ya e masashi eigenlijk ta den cuadro di educacion – by the way ta trata di un scol di arte (toneel) – y cu si e tin derecho riba e compensacion di transicion y ey a sali cu e 80 MIL BUBU. Awor cu yega bek Corte Supremo, tabata pa contesta e pregunta si e empleado pa definicion su comportacion sexual exahera ta ernstig verwijtbaar pa e simpel motibo cu como docente, e alumno ta den un rol di dependecia riba dje. Cu otro palabra, si manera un docente hera mishi cu un studiante (mayor di dedad) si automaticamente e ta colga den e sentido cu e ta perde trabou y e ta keda man bashi.

Corte Supremo a contesta e pregunta ‘ki cu un NO! Corte Supremo ta opina cu den un caso asina tambe mester analisa tur e particularidad di e caso y tambe check si e doño di trabou tambe a haci suficiente di su parti pa monitor of evita esaki. Core Supremo no kier a bay asina leu di bin cu un regla cu ta bisa FAYA BO HAYA.

Colega Sagel

E caso a wordo bringa pa e scol na Corte Supremo door di colega abogado prof. mr. Stefan Sagel. Sagel ta un specialista riba tereno laboral y cu den pasado a yega di haci casonan di Aruba na Corte Supremo entre otro e caso di Hyatt di drug testing na pi’i trabou. Recientemente e tabata na Aruba pa duna un curso na Orden di Abogado hunto cu prof. Evert Verhulp. Den un comentario el a laga sa cu Corte Supremo a laga un chens bay perdi pa duna un guia pa asina e otro cortenan sa miho con pa deal cu casonan unda tin un comportacion cu pa motibo di su caracter of inclinacion sexual. Awor ainda segun e abogado e cortenan ta hopi varia riba e tema.

Na Aruba awor?

Na nos corte tambe sa yega casonan di intimidacion sexual. Un ehempel na februari 2020 un supervisor na airport, den e breakroom, a bisa un trahado di apenas 18 aña cu “den su locker tin condom y cu nan ta wordo uza den e break room so”…despues a mishi cu e hoben aki cu su man den e area di su barica. Aki si corte no a haci wega y e compai a bay cas man bashi! No ta conoci si e por a bay cas cu e condomnan. Na mei aña pasa tambe m’a wak cu nos Hof a para banda di un doño di trabou cu a kita un trahado pasobra e tabata intimida trahado(nan) sexualmente.

Desde aña 2013

Desde aña 2013 nos leynan ta adresa e fenomeno di #MeToo tambe. Haya sa mas di esaki den e recien publicacion di ley https://www.aboutthelaws.com/product/bwa-boek-7-titel-10-arbeidsverordening-2013-arubaans-arbeidsrecht/

 

Share on social media

Facebook
Twitter
LinkedIn