Doño di negoshi por exigi trahadonan pa tuma vacuna?
April 12th, 2021 www.trempan.com
Segun un post di nos Minister di Salud, Dangui Oduber, tin casi 28 mil persona na Aruba vacuna contra Covid-19 y casi 40 mil persona registra pa vacuna. Mi ta kere cu esaki ta un logro y cu pronto nos por caba di vacuna nos pais. Mi kier felicita e minister y tur hende cu ta trahando pa esaki. Ainda tin hende cu ta opina cu nan ta contra di e vacuna aki. Nan opinion ta personal y esey ta OK, semper y cuando e persona aki biba isola y no forma parti di nos comunidad. Na momento cu nan kier participa den un forma activo den nos comunidad, nan mester tene cuenta cu otro aspectonan. Ban tuma como ehempel na pia di trabou. Nos por haci e pregunta si ta na su luga cu e doño di trabou pone como rekisito cu tur empleado mester ta vacuna pa por traha. Prome cu mi duna un opinion personal mi ta prefera pa analisa con esaki por ta for di un punto di bista legal.
Mondkapje
Den un decision na Hulanda, hues a dicta cu un empleado mester cumpli cu e instruccion di su dunado di trabou pa bisti un mondkapje na trabou. Ora cu e empleado a nenga di bisti e mondkapje, e empleado a wordo poni riba non-actief y a suspende su salario. E empleado a cuminsa un caso sumario den cual (entre otro) el a pidi pa corte sentencia e dunado di trabou pa reanuda e pago di su salario. Tambe e empleado a pidi corte pa ordena e dunado di trabou pa lage traha bek den su posicion di chauffeur. Corte a evalua diferente circunstancia y a dicta cu e dunado di trabou mag di obliga e empleadonan pa bisti un mondkapje na pia di trabou, teniendo cuenta cu e pandemia. Segun e decision di e hues aki, e mondkapje por yuda pa mantene trabou sigur y sano, teniendo cuenta cu e obligacion di e dunado di trabou pa zorg pa un “safe work environment”. Tambe e dunado di trabou tin un interes pa protege su negoshi, ya cu e tin cu paga salario di un empleado si e empleado ta A.O. Mester menciona cu e argumento di e empleado contra e obligacion di uza e mondkapje no a convence e hues. Si mi uza e caso aki como referencia, lo mi por argumenta cu esaki lo mester por conta pa e vacuna tambe uzando e mesun argumentonan. Esaki tawata un caso local. Di otro banda Corte Europeo recientemente tambe a toca e tema di vacuna obligatorio. Pero tratando e pregunta si un pais por obliga mayornan pa vacuna nan yiu. Aunke cu esaki no tawata specificamente e vacuna contra Covid-19. Corte Ingles ta dicidi si un mucha mester wordo vacuna mescos cu otro muchanan den caso cu mayornan ta diferencia di opinion. E interes di e mucha ta prevalece segun hues. Nos corte tambe ta aplica e criteria cu e interes di un mucha ta e factor cu ta prevalece. E caso aki no tawata relata cu e vacuna di COVID pero corte a considera cu e vacuna ey tambe lo por cay bou di esaki.
“The case of M v H (Private Law Vaccination) [2020] EWFC 93) is a timely reminder of the approach the court takes to a decision which requires the exercise of joint parental responsibility. In circumstances in which parents with parental responsibility are unable to agree on medical treatment for a child, to include the administration of vaccinations it remains necessary for the court to intervene in order to make such welfare decisions. Whilst it remains to be seen whether children will receive the COVID-19 vaccination, the case confirms the position that if a vaccination has been approved for use in children, it is difficult to foresee circumstances in which the court would not then endorse a child receiving that, absent peer-reviewed research indicating significant concern for the efficacy and/or safety of one or more of them, or specific contraindications for the child in question.”
Si mi analisa e dos casonan aki, mi ta kere cu por ta na su luga cu un doño di trabou pone como rekisito cu tur empleado cumpli cu e vacuna como condicion pa por traha. Mi ta tene cuenta cu referencianan legal. Di otro banda, mi no ta sigur cu mi ta mira un argumento pakico un empleado lo kier nenga di vacuna. A menos cu e empleado aki tin e preparacion pa haci un analisis analitico di e vacuna y splica ta ki substancia of combinacion di substancia den e vacuna por hustifica esaki. Di otro banda, kico lo pasa si na un compania, di un banda un empleado cu ta nenga pa tuma vacuna y di otro banda un otro bisa cu e ta nenga di traha banda di of cu un colega cu no ta vacuna? Con e doño di trabou lo mester haci? Y cua trahado e sindicato lo sostene? Ami ta kere cu un sindicato responsabel lo promove vacuna. Lo ta curioso pa mira ki posicion e sindicatonan lo tuma. Di otro banda mi por imagina tambe cu clientenan di cierto negoshi por stop e relacion si ta conoci cu e empleadonan di un cierto compania no ta vacuna. Resumiendo mi ta kere cu tin base pa argumenta cu un empleado mester cumpli cu e rekisito di vacuna si su doño di trabou pone esaki como un exigencia. Si e empleado nenga, esaki por tin consecuencia pa su trabou. Esaki obvio ta libertad di un trahado pa no traha unda ta exigi cu mester vacuna. E ta totalmente liber pa bay busca un otro trabou na momento cu e kier para pa su desicion di no vacuna.