E acuerdo di cuido medico

October 4th, 2021

Ultimo tempo ta parce cu mas y mas nos tur ta haya nos mes ta deal cu famia of amigo cu ta sufri di un of otro kebrante di salud. E manera cu ta brinda servicio medico tambe ta afecta door di e protocolnan di COVID. Kisas un momento oportuno pa para un rato y analisa algun aspecto di e relacion medico y pashent for di un punto di bista legal.

E acuerdo

E acuerdo entre un dokter of dunado di servicio medico y e pashent ta regla den nos codigo civil. Specificamente den e di 7 buki, titulo 7, seccion 4. E clasificacion aki kisas parce esun di bijbel un tiki. Bien por ta, ya cu ambos ta sistemanan pa organisa y ordena volumen grandi di informacion. E acuerdo aki ta encera cu un dokter of un dunado di cuido medico ta compromete su mes na duna cuido of servicio medico na un persona. 

Start

E acuerdo aki ta cuminsa asina cu un persona haci un pregunta specifico na un dokter y esaki contest’e of ora e persona meld su mes cerca un dokter y ta sinta den e wachtkamer pa wordo atendi. Tambe por ehempel den caso di un verwijsbrief y un specialista a ricibi e file di e pashent prome cu e mira e persona mes.

Un bon dokter

Durante e cuido, un bon dunado di cuido mester comporta su mes y actua manera un bon dokter. E frase aki por ta zona straño of parce innecesario pero e no ta. E actuacion como un bon dokter ta un termino cu ta encera mas cu kisas nos por pensa. Esaki mas cu un frase, e ta un norma di conducta cu dokternan mester tene nan mes na dje ora di brinda cuido. Nan mester tene cuenta y percura pa brinda un bon cuido manera comunidad por spera di un bon dokter y e mester duna esaki teniendo cuenta cu standard profesional cu ta conta pa dunadonan di cuido den e ramo ey.

Un dokter por nenga di duna cuido?

Un dokter casi no por nenga di duna cuido medico. Tin 3 motibo principal cu un dokter por y kisas mester nenga di drenta den un acuerdo pa brinda cuido medico.

1. Si e necesidad di e pashent ta bay mas leu cu e dokter por brinda
2. Si a base di experiencia anterior no tin un base di confiansa pa traha hunto
3. Si e dokter mes tin motibo pa nenga. Por ehempel door cu e dokter mes ta AO of cu pensioen of kisas si e dokter tin algun sentimiento special pa cu e pashent.

Algun aspecto di cuido

Un bon dokter mester splica su pashent den un forma cla over di e tipo di examinacion cu ta bay haci y e plan di di tratamento cu e ta bay duna. Si e pashent pidi esaki e dokter mester dun’e por escrito. Un documento completo y firma pa e dokter lo ta parce di ta mas na luga cu algo skirbi na man riba un pida papel ranca di un notepad. Pa por duna cuido, e dokter mester di e consentimiento di e pashent y si acaso ta trata di un menor di edad y cu no a yega e edad di 13 aña ainda, lo mester consentimiento di mayor.

Terminacion di e acuerdo

Un pashent por termina un acuerdo di cuido na cualkier momento y pa cualkier motibo. Pa un dokter e no ta asina facil. E dokter por termina e relacion di cuido cu e pashent solamente a base di motibonan serio. Ley mes no ta splica cua esakinan ta pero danki na Corte, a defini e motibonan. Esaki ta inclui e mesun motibonan pa por nenga di duna cuido. Ademas por tin otro factornan cu por hunga un rol, manera si e pashent trata e dokter malo of den un forma agresivo of si e pashent nenga constant di paga su cuentanan. Den caso di nos aki cu AZV, e ultimo categoria aki no lo por pasa facil. Cu AZV ta laat cu pago di un dunado di cuido of no pag’e suficiente, no ta duna e dokter rason pa tuma medida contra su mesun pashent. Si un pashent mes tambe nenga di coopera cu su mesun cuido, tambe por ta un motibo balido cu e dokter por opta pa termina e relacion.