E posicion di un director di NV. E NO TA FACIL

August 2nd, 2021

E NO TA FACIL

Director di un compania (NV) ta esun cu ta na cabes di e empresa. E ta esun responsabel pa maneha e luga. E ta wordo paga pa esey tambe, tanto cu salario como tambe cu beneficionan secundario. Di otro banda, ora cos bay menos bon, su posicion ta poco delicado. Awe mi lo comparti un tiki rond di e rol y e posicion laboral di un director di un NV.

Naamloze Vennootschap (NV)

Ta bon kisas pa para un rato keto y analisa e structura di un tipico compania cu e structura NV. Un NV ta un persona huridico cu ta wordo crea door di pasa un acta di notario. Den e acta ey, ta determina su structura. Por lo general, e structura ta consisti di dos organo. Un reunion general di accionista (algemene vergadering van aandeelhouders) y un directiva consistiendo di un of mas director (bestuur). Den empresanan mas grandi, adicional por bin un hunta di comisario (Raad van commissarissen). Cada organo tin su autoridad, su funcion y su responsabilidad. Un organo no por asumi tareanan of autoridad cu no ta corespond’e. Esaki por trece problema, no solamente interno, pero tambe cu otronan. Mas riba e aspecto aki kisas un otro biaha. Pa awor, ban keda riba e funcion di un director.

Nombracion

Ta nombra un director por medio di un resolucion di reunion general di accionista. Na e momento ey e director ta asumi e rol di e organo di e NV como su directiva. E mesun asamblea (reunion general di accionistanan) tin e autoridad pa suspende of retira e director como organo. Pa haci esaki e asamblea tin poder hopi amplio. Pero esaki no kiermen cu e asamblea ta “hefe” di e director. Aunke hopi biaha ta bisa esey, pero no ta cuadra. Mescos un parlamentario no por bisa cu e ta “hefe” di un minister. Dicon? Pasobra e accionista no por bisa e director kico pa haci si no e accionista no mester di un director. E mes por nombra su mes y haci e trabou na su gusto. 

Resultado y confiansa

Como director abo ta responsabel pa resultado di e compania. Si e ta bon, e accionista ta contento. Y si e ta malo, e accionista su cara lo por ta largo. Aki no tin excuus di cu mi tabata malo of cu ta fout di un otro. Como director abo tin cu para p’e. Awor, den un relacion di trabou asina, ta parce miho pa tin un dialogo continuo y tene interes di e empresa na prome luga. Awor por tin diferencia di opinion di por ehempel e direccion cu e empresa mester bay. Awor si e accionista y e director yega na un conflicto y no por resolve, e ora e director ta den un desventaha pasobra e accionista tin e autoridad pa kita e director fo’i trabou. 

Relacion laboral

Banda di e rol corporativo cu mi a caba di menciona, tambe e director (por) tin un posicion laboral. Esaki ta locual ta su salario, beneficionan secundario y otro reglanan. Y rekisitonan di e trabou of empresa. Ehempel ta ora por ehempel nombra un empleado, despues di añanan di servicio, den e funcion di director. E tabata empleado pa hopi aña caba y awor ta haya e funcion adicional di e organo, como director. Como empleado e ta conta cu proteccion laboral cu nos ley ta ofrec’e. 

Terminacion 

Esaki ta trece cu ne cu den caso di un terminacion, lo tin 2 terminacion. Un como director y e otro esun di e relacion laboral. Sea e accionista ta hustifica of no. Con partidonan lo sali for di otro lo ta segun nan mes acorda of corte dicidi. E prome terminacion ta mara na un procedura formal y mester bay den un reunion di accionista unda e punto di agenda aki mester wordo trata y mester scucha e director. Awor por pasa tambe cu partidonan por dicidi di no lag’e yega asina leu y yega na un areglo den cual tambe ta termina e relacion di trabou. 

Golden handshake?

Den caso di un areglo, tin biaha sa papia di un “golden handshake”. Un otro palabra cu por wordo uza ta un compensacion pa consecuencia di e terminacion. E ultimo aki ta parce mi mas adecua. Pasobra e realidad ta cu un director lo stop di haya e entrada cu e ta gosa di dje, tin biaha hasta pasobra kisas algo a pasa cu ta for di su control. Corte a yega di dicta cu hasta un caida di entrada di un compania ta rason suficiente pa retira un director.

Final

Hopi biaha den casonan di retiro di un director, ta yega na e acuerdo  aki den e contract na momento cu cuminsa e relacion di trabou. Asina ambos partido sa unda nan ta para den caso cu nan mester despedi di otro. Si esaki no ta e caso, e por complica e proceso. Ta bon pa partidonan papia y regla esaki formalmente di antemano y no warda te ora cu cos bruha.