Esaki ta bon of ……? E muhe so ta hereda tur cos!

Esaki ta bon of ……? E muhe so ta hereda tur cos!

Asina mes, manera e titulo di e columna di e siman aki ta bisa, e muhe ta hereda tur cos si acaso su casa fayece. Ora mi bisa tur cos, ta pasobra ta echt tur cos y e yiunan mes ta keda man bashi!

Atencion

Kisas awor mi tin bo atencion. Manera mi a bisa varios biaha caba, ley a cambia den un forma pisa ‘ki, ora e Codigo Civil nobo a drenta na vigor dia 1 di september 2021. Particularmente ora ta trata di herencia. Den e mundo di herencia sa bisa:

“ora dos wowo cera, hopi ta habri”

Esaki, entre otro, ta enfatisa e tou di problema cu sa presenta ora un hende fayece y esunnan cu keda atras, en bes di celebra bida di e defunto, ta cuminsa pleita cu otro, ranca siboyo y hera ta keda sin sikiera bay entiero. Ta di lamenta ora cos mester bay asina. Pero hopi no ta realisa cu si bo regla bo cuentanan bon di antemano, bo por spaar bo famia poco dolor di cabes, poco placa y poco disgusto. E specialidad aki of disciplina aki ta conoci como “estate planning”. Na bon Papiamento “regla bo co”. Ademas bo por cera bo wowo trankil sabiendo cu bo laga e cosnan bon regla. Aunke kisas no tur hende lo gusta manera pa regla e co’, pero abo por laga nan keda zundra atras, pasobra abo mes e ora ey lo ta sosegando na paz anyway.

E muhe ta hereda tur cos?

Si, antes o sea bou di e ley bieu, ora e homber fayece y el a laga atras un casa, dos yiu (y kisas un “byside”), e viuda pa cuminsa ta hereda mita di e bienes matrimonial. Anto ta parti e otro mita den parti igual entre e 2 yiunan y e viuda. O sea e viuda ta keda cu 4/6e y cada yiu cu 1/6e.

Awor e cos a cambia y e viuda ta hereda 100% direct y den mi ehempel e dos yiunan ta hereda nada. Esaki kiermen cu e posicion di e viuda a bay dilanti awor. Ta keda na e viuda/mama pa pasa un of mas parti di e bienes na un of na e dos yiunan. Si e dicidi di gasta tur cos y crea debe, ta keda su decision!

Hopi bon

Awor tin hende lo bisa (vooral e damanan), cu e ley aki ta tremendo. Pasobra ta mas cu claro cu e muhe merece e 100% y eigenlijk mas ainda! Pasobra el a haya yiu, el a cria yiu, el a sostene e casa, el a sacrifica, etc, etc. Y bien por ta cu por lo general esaki ta asina tambe. E columnista ki no ta opina riba e posibel echonan aki.

En todo caso, cu e ley aki e muhe ta keda cu cas, auto, placa, accionnan den negoshi, etc. Un aspecto importante kisas ta cu e ta mantene un dak riba su cabes, irespecto si e yiunan ta den cas ainda of no. After all – e damanan lo bisa – como mama e sa miho y lo sa na ki momento pa parti cu e yiunan. Ademas y si e no parti mes, e sa miho y dia su wowo nan cera e ora e yiunan lo hereda tur cos anyway. Everybody happy!

Pero….

Di otro banda, kisas por puntra: OK, awor kico ta pasa si e viuda topa un yambo bieu of kisas un yambo nobo, anto e dicidi di casa atrobe? E ora ey mita di e bienes ey no ta pasa pa e yambo? Of awo si e no casa pero e namora di un homber cu “dos placa di tipo” y e bira un “sugar mommy”? 

Y si awor den nomber di amor of confiansa comparti y/of regala bienes cu e brochi ‘ki of laga e tercio aki atende tur cos p’e pasobra e no ta bon den e cos n’ey? Bien por ta cu tur cos ta bay bon y nan hunto lo prospera. E ora everybody happy. 

Pero, si awor mañan e macho nobo ‘ki baha na awa bay cu tur cos? Cos cu por pasa! Ya e muhe kisas lo keda heartbroken atras. Esey ta su problema pero si e casa nobo a bay cu cen lag’e bashibashi, di otro banda e (pober) yiunan tambe lo perde pasobra cada florin cu e boyfriend bay cu ne of malgasta, ta un florin menos cu e yiunan lo haya di locual nan tata a traha y soda p’e y laga atras pa nan. Awor, kisas e muhe por gasta ful e cen tambe na operacion pa drecha curpa y bay kapsalon tur dia pa asina e mustra bon ora e sali cu su gang.

Djis imagina cu bo tabata polis, risca bo bida tur dia pa laga algo atras pa bo yiunan, anto despues cu bo a fayece algo asina ta pasa bo. Lo bo ta bolter den bo graf bay off. Kisas su famia tambe lo ta sacudi cabes bisando wak con e muhe #*@$! ey a distribi tur cos.

Awor no laga mi ta asina pesimista. E viuda ta biba feliz y contento cu su casa nobo y tur cos ta great pero e ta fayece tragicamente den un accident. E ora ey e viudo ta hereda tur cos y e yiunan ta keda cu nul comma nul. E ora tambe e (prome) casa lo bolter den su graf pasobra su yiunan a keda sin nada.For di e punto di bista ey kisas e ley no ta di e fantastico ey manera nos a kere prome.

Con pa haci anto pa proteha e yiunan?

Un bola di cristal nos ningun no tin, pero un tiki precaucion y poco planning nunca ta di mas. Un posibel solucion pa e tatanan kisas drumi mas trankil, por ta tuma paso pa deshereda e casa di tal forma cu e bienes ta pasa direct pa e yiunan y toch duna e señora cierto beneficio, manera por ehempel uzo di e cas pa asina e ta sigura un dak riba su cabes. Tambe, por pensa di apunta un representante legal pa e yiunan menor di edad, cu lo por tira un bista y make sure cu ta salvaguardia e bienesnan pa e yiunan y si tin gasto cu mester haci, cu ta hacie den un forma responsabel. Opcion tin, ta cos di pensa un tiki, busca conseho y haci poco “estate planning”. Mester por papia cosnan asina abiertamente entre pareha. Aunke kisas bo haya bo ta drumi riba sofa un par di dia. #BoAbogadoFaborito #GomezCoffie 

P.S.: Tur locual m’a skirbi di e muhe ta conta mescos pa e homber den caso cu su señora fayece prome cu ne. P’e tambe poco estate planning ta na su luga, pa evita cu e “mamasita” no bay cu tur cos!