ATL

Esun cu no kier tende mester……. PRIZON PA DEBE!

Esun cu no kier tende mester…….

PRIZON PA DEBE!

Mi no sa si e titulo di e columna di e siman aki ta un dicho como tal den nos idioma Papiamento, pero kere mi, en todo caso e ta un frase cu hopi di nos sa bon bon. Na cas e tempo aya ora e frase aki cay, bo sa cu mamai su hemchi a yena of ta e ta den yena. Ora e palabranan ey cay, ta un bon ora pa para keto y pensa hopi, pero hopi bon kico ta bira bo next move. Pasobra si bo faya, wel esunnan cu sa di kico mi ta papia, pasobra nan a bib’e, manera mi amigo Patrick cu su mama di Dakota, locual lo sigui no ta bay ta ningun tiki leuk. Man duro lo baha y e chens ta hopi grandi cu un otro biaha bo no ta bay ripiti e mistake cu bo a caba di haci. Pasobra corda bon, e tempo aya no tabatin ni 911, ni 131, ni ningun otro number of hende cu por scapa bo. Lo bo bisa esey ta cos di mucha pero e siman aki mi ta bay mustra bo cu hende grandi scapa tambe de bes en cuando mester un man duro baha riba nan ora nan no cumpli cu un sentencia di un hues. E man duro ey por pone cu deurwaarder ta bin bo cas, lanta bo for di bo cama y hiba bo cera, tur esaki pa ta cabes duro! Con esaki por? Ban wak…

Sentencia civil

Hopi di nos sa cu si pasa den luz cora, corta un hende, deal den droga of coy plac’i hende, cu Ministerio Publico por bay bo tras, hiba bo corte y ey un hues por sentencia bo pa bay sinta un castigo den prizon aya na Santo di Patia. Locual kisas ta menos conoci ta cu bo por end up den un huis van bewaring, manera nos KIA, si bo no cumpli cu un sentencia di hues den un caso civil!

Caso civil

Ban para un rato pa analisa kico ta un caso civil. Un caso civil ta un caso entre un of mas partido unda esun ta demanda un cierto cumplimento di e otro. Pa hacie mas simpel ainda, laga mi uza un ehempel. Partido A ta cuminsa un caso contra Partido B pasobra esaki ta nenga di haci algo cu pa ley e mester haci. A ta bay corte contra B y hues ta dicta na fabor di A y a base di e sentencia ey B mester entrega A e mapa di un tesoro scondi cu B a bay cu ne un dia cu el a bay dal bitter na cas di A anto A a cont’e di e tesoro scondi (“Caso 1”). Awor A tin un sentencia den su man cu el a haya cu ayudo di su #AbogadoFaborito y awor e ta bay deurwaarder pa deurwaarder ehecuta e sentencia. Un deurwaarder, manera mi amigo deurwaarder Roos, ta bay cas di B y ta bis’e: “Ruman, riba ordo di hues,  bo tin dos (2) dia pa entrega mi e mapa di e tesoro pa asina mi entreg’e na A. Si bo no hacie, anto e ora hues a determina cu lo bo tin cu paga A un dwangsom o sea un montante di placa, style di boet, pa cada dia cu bo keda sin cumpli”. Ban asumi cu den e caso aki e dwangsom ta Afl. 5000,= pa dia.

B ta poco cabes duro y ta nenga di entrega e mapa den dos dia. E deurwaarder ta bay bek y ta dal e un citacion mas y e dwangsom ta cuminsa core. Pero B no ta worry, despues di 20 dia ya B debe 100 mil Florin na dwangsom pero keto bay e no ta cumpli cu e sentencia di debolbe e mapa. Kico awor?

Prizon pa debe

Wel aki ta unda e titulo di e columna di e siman aki ta bin cay aden. Pasobra ley ta duna, den e caso aki A, e posibilidad di bay corte bek y exigi pa corte sentencia #PrizonPaDebe, contra B (“Caso 2”). Na Hulandes esaki yama lijfsdwang of gijzeling. Awor, e debe den e sentido aki no ta e 100 mil Florin di dwangsom cu B a laga acumula den su contra, sino e obligacion cu B tin pa cumpli cu e sentencia pa entrega e mapa di e tesoro bek na A. 

Si corte bay di acuerdo cu A, e ora corte lo sentencia cu si B no cumpli, por ehempel den 24 ora despues di e sentencia, cu A por aplica #PrizonPaDebe. Esaki lo trece cu ne cu deurwaarder por bay cas di B of si e top’e riba caya mes, ta invita B pa subi auto cu ne y e deurwaarder lo dun’e un Über gratis pa KIA unda e deurwaarder lo entrega e persona na KIA y KIA lo traha luga pa ricibi B como huesped te ora e dicidi di cumpli cu e sentencia di Caso 1 y entrega e mapa of pa e maximo di tempo cu hues a ordena. Awor, claro cu e deurwaarder por pidi asistencia di e brasa fuerte di ley – polis – si B no kier coopera cu e deurwaarder of si e kier hunga Hulk riba e deurwaarder. 

Awor B kisas por tin cabes duru y kisas kier para duro y nenga di cumpli cu e sentencia, pero asina e ta instala den KIA, bo lo mira con e lo bira “moli moli” manera cierto politiconan cu nos conoce.

 

 

 

 

 

 

 

Ki ora por pidi prizon pa debe? 

Prizon pa debe ta posibel den dos situacion. E prome ta ora cu sentencia di corte ta algo otro cu no ta paga un suma di placa. Por ehempel, den e caso aki entrega e mapa of bay firma na notaris pa un herencia. Pero no por uz’e, por ehempel, ora bo debe Island Finance.

Pero ora di alimentatie si por

Pero, pero…si acaso por ehempel C a wordo sentencia pa paga alimentatie na D y toch ta keda sin paga, e ora ey si por uza #PrizonPaDebe pa cobra un suma di placa. M’a wak un caso di aña 2019 unda hues a duna un dama e derecho di aplica prizon pa debe contra un homber cu a laga e debe di alimentatie subi te cu casi 40 mil Florin!! Den e caso ey, hues a duna e macho 14 dia pa paga y si no paga e mester bay sinta un maximo di 30 dia pariba aya na KIA. Un cos si, nos por ta casi sigur cu si e compay ey no kier tende di hues, e lo sintie pariba ya den KIA.

 

Con e ta para?

E #PrizonPaDebe ta para

  1. Ora e periodo maximo cu hues a stipula yega y e persona ainda no a cumpli. 
  2. Ora cu e persona dicidi di cumpli finalmente cu sentencia di e caso 
  3. Si A of C bay di acuerdo.
  4. Si ta proba medicamente cu si #PrizonPaDebe lo perhudica salud di e persona di tal forma cu por pone su bida na peliger.
  5. Si e persona echt no por cumpli, por ehempel si B no tin e mapa di e tesoro mas pasobra esaki a kima durante un candela na su cas.
  6. Si A haya e tesoro sin e mapa, of
  7. Si tin otro manera legal pa forsa e cumplimento di debe.

Tip

Si bo haya bo den corte, busca conseho legal, sea particular or via carchi gobierno, tuma e asunto na serio. Defende bo mes adecuadamente y pensa bo bon riba e posibel consecuencianan si bo no cumpli cu ordo di hues.

www.GomezCoffie.com

FB @GomezCoffie

 

 

 

Share on social media

Facebook
Twitter
LinkedIn