HERENCIA: MAL PARA!

E mundo ta lora

Siman ta bin y siman ta bay y cada rato nos por analisa con nos bida di dia dia ta wordo afecta door di nos leynan. Leynan ta cambia cu tempo, nan tin cu cambia pa asina por “bay mee” cu tempo of pa adresa desaroyonan cu nos comunidad ta pasa aden. Tin biaha mester bin ley nobo di golpi ora algo pasa manera Covid. Pesey nos leynan t’ey pa yuda guia nos comunidad. Nos leynan di herencia, por ehempel, tambe nan a modernisa recientemente. Awe mi ta comparti un tiki di esaki.

Mal para

Si nos core rond awendia – aunke esey ta un luho mirando e prijsnan di gasolin y diesel – nos por mira diferente propiedad rond di nos isla cu ta mal para, hopi biaha den estado di decadencia, cu falta di mantencion, habita casualmente of door di desconocinan of hasta abandona. Si puntra rond kisas un storia ta sali di un of otro homber cu tawata tin un of mas yiu cu un of mas muhe y cu tawata tin un of mas propiedad, pero despues cu el a muri….anto eynan bo ta haya e comienso di e storia di con e propiedad ey a bin ta ‘end up’ asina.E storia por varia, pero hopi biaha tin un liña comun, door di e yiunan cu a nace, cu a casa, cu a haya mas yiu, cu despues a separa, cu despues un paar a bay for di Aruba y na caminda nunca ta falta un bon pleito entre famia. Den un columna anterior m’a duna algun ehempel.

Mas problema

Banda di esaki tambe sa pasa cu tin of mas hende sa (of cu ta kere) cu nan tin parti, pero nan no sa, no por saca afor con grandi e parti aki ta. Esaki por pasa facilmente ora bo no tin bista completo riba e stamboom. Kisas bo no por traha un stamboom, sea pa motibo di placa of pasobra bo tin e cen, pero bo no sa mes ken ta ken of unda nan ta. Otro aspecto ta cu den pasado no semper e registracion na Censo tabata cana bon. M’a yega di tende di persona cu dia nan a bay registra nacemento di su yiu pero pa e tempo ey e mucha ya ta cana y a cana drenta cu e mayor(nan) cu a bay pa registr’e. 

Parti di e bolo?

Tambe kisas abo cu ta lesando awor no sa mes cu bo tin derecho den un herencia. Kisas bo parti ta 10.000, 1000, 100 of 10 meter cuadra di tereno, pero bo no sa mes. Awor si ta 10.000 meter cuadra kisas e ora bo ta bay su tras pero si awor nan bisa bo bo tin derecho riba 10m2 net pabou di e dump di Parkietenbos, porta lo bo no ril mucho. Cu otro palabra, depende con grandi bo parti den e bolo aki ta, bo por ta interesa pa bay su tras. Kisas hasta bo tin parti den diferente bolo, e ora bo tin chens di strica banda banda.

Parti di e debe?

Awor si bo strica ta bon, pero awor di banda banda bo haya sa cu en bes di 10/000 meter cuadra na tereno, b’a bin hereda Afl. 25.000 na debe di belasting y varios otro debe, anto e ora e panorama ta cambia. Un opcion ta naturalmente pa asumi e debe ey cu honor, orguyo y paga esaki pa asina e bon nomber di bo antepasadonan keda protegi. Awor esey ta bira mas dificil si bo no sa mes drechi ken ta ken of si bo mes tin suficiente debe caba y bo no tin espacio pa carga mas.Otro opcion ta pa bo worry y sigui wak Netflix manera nada un pasa. Tambe por, pakico no? Por sigur, pero un detaye ta si, cu e ora bo ta coy un problema di bo generacion y pas’e pa bo yiunan y potencialmente nan yiunan. Mas tempo pasa, mas e cos ta bruha manera un bol di hilo of manera un bon nasi goreng. Bo yiunan mañan lo ta masha agradeci cu bo a pasa e baina aki pa nan.

Y awor?

Locual m’a menciona te awor, no ta conoci cerca comunidad so. Nos legislado tambe ta na altura di esaki y ora di a modernisa e codigo civil, a tene cuenta cu e situacionan aki. Den e codigo civil un herencia asina ta wordo yama un “een onverdeelde boedel”. Mi ta tuma e libertad di traduci esaki pa “un patrimonio no reparti”. Si esaki no ta corecto, lo mi tende di e puritanonan linguistico. E punto ta, cu segun ley, ningun hende ta obliga pa keda den un patrimonio no reparti. Pa saca bo mes for di algo asina bo tin pa tuma paso si, cuminsa pa pone Netflix riba un pauze.

Corte

Bo no ta obliga pa keda hinca den en “patrimonio sin reparti”. Si bo kier regla cuenta, bo por bay corte y pidi corte pa haci un reparticion. Tin diferente manera pa haci esaki, un di nan ta pa bay Google un poco, download locual bo ta kere ta un voorbeeld bon, yen’e y manda cos. Esaki no ta parce mi e miho manera y kisas e alternativa ta pa bay serca bo abogado faborito pa asina e informa bo adecuadamente prome bo manda cualkier cos pa corte. 

Persona neutral

Den caso cu bo no por a logra haya tur famia cu tin of cu por tin un parti, ley ta duna e posibilidad cu corte por nombra un persona neutral, pa sea firma documento necesario of pa warda e parti corespondente di e patrimonio pa esun of esunnan cu ta “spoorloos”. Mi ta kere ta bon pa menciona cu si tin un of mas cu ta “spoorloos”, bo parti di e bolo no ta bira mas grandi. Locual por pasa normal ta cu si un cay afo, su yiunan ta hereda su parti. Corda si cu e echo cu un hende ta “spoorloos” no kiermen cu e ta “dood”. Ta solamente ora e ta “dood”, su viuda of su  yiunan ta hereda. Tanten cu e ta na bida no! Juist door di e posibel incertidumbre rond di cu si e persona ta “spoorloos” of “dood”, e persona neutral ta brinda un solucion.

Awor por

Cu otro palabra, awor por! Danki na nos legislado, cu a sigui esunnan di Corsou y Hulanda, awe e problemanan aki por pasa pa pasado y bo por sali di e baina, cu kisas sin cu bo tabata kier, b’a cay aden. E leynan t’ey awor, e ta keda na abo si bo ta bay dal e stap of si bo ta keda mal para.