ATL

Hues a aproba retiro pa director di compania Vrijmento durante or’i trabou cu casa di su trahado!

Hues a aproba retiro pa director di compania

Vrijmento durante or’i trabou cu casa di su trahado!

Awendia bo djis dal Facebook of Instagram habri, lo bo dal den yen di selfie atractivo y tin biaha kisas hasta cu un toke provocativo. Tin ta hasta dal poco “photoshoot” formal pa asina yena nos feednan cu nan imagennan basta sexy. Tin di e feednan ey kisas hasta traha un tiki riba bo imaginacion. Esaki sin conta e WhatsApp cu den e skina ey tambe “anytime” por drenta cu un of otro potret, emoji of hera un invitacion poco leuk. E contenido aki por yega cerca bo den bo tempo liber of durante ora di trabou. Depende di unda bo ta traha esaki no mester ta un problema necesariamente. Locual si por bira un problema ta, si bo dicidi di bay haci un custumber di tene relacion sexual cu un colega di trabou, cu un cliente of cu casa di un otro trahado, anto durante ora di trabou. 

Esaki a causa cu un ehecutivo halto den un compania a cay den problema cu su trabou. E siman aki e caso particular aki ta topico di bo columna LEGAL.

E caso

E actornan den e caso aki ta:

A = doño di trabou

B = director 

C = manager cu ta traha bou di B

D = e casa di C cu ta traha como recepcionista pa un otro compania y cliente di A.

Kisas ya caba bo ta sinti den cua direccion e co’ ‘ki ta bay. E homber B (61) y e muhe D cu ‘by the way’ ta hopi mas hoben cu B, tabatin un relacion amoroso pa lunanan largo. E pober homber C no a ripara nada. E compania A tampoco. Awo claro cu e co’ a bruha pasobra si no e lo no ta topico awe.

Divorcio 

E cos a cuminsa bay for di man riba 13 di februari 2022 ora e muhe D ta bisa su casa C cu e kier divorcia di dje. Imagina e cos ey, un dia prome cu Valentine’s Day anto e ta pidi e homber divorcio! E siguiente dia, Valentine’s Day, e homber C a “meld ziek”. Kisas el a keda cas ta scucha vallenato y dal poco aguardiente henter dia. En todo caso e no tabata tin e facil.

Algun dia despues, dia 20 di februari 2022, C a bin topa riba e laptop cu e ta share cu su casa D, e WhatsApp Web di e muhe. Ey e homber a bin topa potret, video y mensahe cu cual a bin mustra cu su casa tabata mantene un relacion sexual pisa cu su hefe directo (B). E potretnan tabata inclui potret di B y di D total of parcialmente sunu. E relacion mes a cuminsa na juli 2021 caba. E ora el a bin compronde dicon e muhe a pidi divorcio.

 

Tip:

No comparti laptop personal cu ningun hende y si bo ta uza WhatsApp Web riba bo laptop, corda log out!

Cu prueba den man, C a bay cerca su doño di trabou A y a entrega un keho formal contra B. Esaki a pone cu e compania a cuminsa un investigacion y a keda confirma cu B y D tabata bezig sexualmente pa basta largo y basta “heavy”. Despues di e investigacion, e compania a purba yega na un areglo pa termina e relacion di trabou cu B den un forma amical. Ora cu esey no a logra, e asunto mester a bay corte. Ta pa motibo cu el a bay corte, awe e ta topico di e columna aki y tambe a bira topico di noticia. 

Ta bon pa abo cu ta lesa e columna aki tur siman sa cu e decisionnan di corte di Aruba, pero tambe di resto di Reino Hulandes, ta wordo publica online semanalmente. Esaki riba su mes no ta nada straño pasobra e sentencianan di corte ta proclama publicamente. E publicacion online ta un recurso importante pa esunnan cu ta practica ley pasobra e ta permiti nos studia e casonan cu por ta relevante pa un caso cu mi ta bezig cu ne.

Tip:

Tin bes, miho bo yega na un areglo y tene e cos discreto, cu bo bay corte anto e ta cay den e dominio publico y bo tin chens di bira noticia.

Hotel AirBnB

For di e investigacion, entre otro, a sali na cla y minimo cinco biaha riba diabierna, cu B y D tabata topa sea na un hotel of cas cu e meta di bay “gooi een hout” di 2 pa 3 ora largo.

Leuk…

Kisas bo ta pensando, wel tur esaki ta un asunto priva y e doño di trabou no tin nada di bisa. Kisas esey ta un punto valido pero den e caso aki, na momento cu C a entrega un keho contra B cerca A, e asunto a bira un tema laboral. 

Celular

Ademas, a bin sali afo cu B tabata uza su celular di trabou pa tene y mantene su “affair”. E tabata basila pisa via WhatsApp. Ay… pero ki ta 2 of 3 WhatsApp, lo bo puntra. Huh, wel laga mi bisa bo cu fin di september 2021 pa comienso di october 2021, durante 9 dia, nan a manda otro 1.261 whatsApp durante ora di trabou! 

Tip: 

Bay suave cu e WhatsApp di trabou!

Basila durante ora di trabou 

Tambe a resulta cu varios di e encuentronan sexual a tuma luga durante ora di trabou. Awo berdad ta cu como un director, manera e meneer aki tabata, tin hopi libertad pa con e ta “handle” cu su oranan, basta e produci “sales” pa e compania. Kisas e encuentronan ey hasta tabata subi su performance. Pero e cos por yega na un punto cu awa ta pasa hariña.

Tip:

No bay Moko 30 durante ora di trabou

Corte

Corte a bay hopi diep den e caso ‘ki y a hasta pasa den tur e WhatsAppnan pa wak fecha, ora y contenido di esaki. Corte a saca afo, cu B, hopi biaha net prome cu e drenta un meeting, e tabata saca un potret di su curpa of parti di su curpa y manda pa e chick, cu nan tabata planea nan encuentro durante ora di trabou y hasta tabata tene relacion sexual cu otro durante ora di trabou.

Tip:

E potretnan ey por bin bek pa bo. Pens’e dos biaha prome bo primi send

Abuso di funcion

M’a menciona awor ey cu ora cu e muhe a pidi C divorcio cu el a “meld ziek”. Nos por imagina cu e muhe lo bisa esaki na su amante B tambe (e director). Wel, e ultimo aki, riba dje, a presiona C pa e corta su AO y bin traha. El a bay asina leu di menasa e pober, cu si e keda cas esaki lo perhudica su trabou. Pakico e director a haci esaki mi no por a saca for di e sentencia.

Defensa

Claro cu ora e cos a bay corte, B a purba saca su curpa afo di tur sort’i manera. El a hasta purba bolter e cos y exigi un suma di mas cu 2 miyon florin como compensacion si e mester perde su trabou. 

Y kico hues a bisa?

Hues a bari su argumentonan for di mesa. Hues a nenga su demanda miyonario, a dicta cu e ta perde su trabou y riba dje hues a bisa cu e mester paga su doño di trabou un suma di placa bek cu el a ricibi na salario pasobra en bes di traha e tawata pasa dushi cu D. 

E aventura amoroso a sali e tercio ‘ki caro. Cu esaki riba su record y 61 aña di edad, e lo mester bay mira con e ta haya un otro trabou. Spera p’e haya un otro trabou cerca un hefe cu ta dispuesto pa confie.

PS:

No ta conoci si B y D a sigui nan relacion despues di tur e baina ‘ki.

 

Share on social media

Facebook
Twitter
LinkedIn