Huur di propiedad: Con esaki ta bay?

August 23rd, 2021

Tin un dak riba nos cabes ta deseo di nos tur. E ta un necesidad. Hopi tin cu huur e dak ey, o sea un cas of un apartamento of den caso di un negoshi, un local pa por cubrí e necesidad aki. E siman aki lo mi cubrí algun aspecto di huur.

Ley

Nos codigo civil ta duna e base pa contractnan di huur pa locual ta cas of apartamento of un local. Esaki di tal forma cu hasta lo bo por huur un luga sin contract y asina mes un gran parti di aspecto lo ta cubri caba a base di ley. Asina mes semper mi recomendacion ta pa partidonan cera un contract pa asina tin palabracionnan bon documenta y asina evita of minimalisa mal comprondemento. 

Contract

Den tur contract ta bon pa cuminsa cu e elementonan esencial, manera e obheto, den un caso di huur esaki lo ta e cas of apartamento of local y e prijs cu lo cobra y paga. Tambe ta bon pa defini e partidonan precies di tur dos banda. Si bo ta bay huur un propiedad, make sure cu esun cu ta ofrece bo e luga ta doño di e propiedad pa bo sa sigur cu bo ta huur di e hende corecto. Bo lo por bay Kadaster y verifica si e persona en berdad ta doño di e cas of apartamento of local. Sino pidi pa bo haya prueba riba papel cu e ta autorisa pa cera contract y cobra huur. Berdad kisas bo sa cu e ta yiu di e doño pero awor si e doño tin 5 yiu, con bo ta haci? Paga huur cinco biaha? Vooral ora tin herederonan envolvi ta bon pa verifica e cos bon.Tambe ta bon pa palabra riba cua dia di luna e huur lo wordo paga y no djis bisa “fin di luna” of “cuminsamento di luna”.  Ora di huur ta bon pa sa entrante ki dia, no solamente e contract ta cuminsa, pero tambe desde ki dia mester cuminsa paga huur. Partidonan por palabra, por ehempel, cu e contract ta cuminsa 1 di februari pero cu 1 maart mester cuninsa paga huur pa asina por muda y kisas drecha cualkier cos cu por tin pendiente. Si haci esaki, pone den e contract pa no bin bruhamento. Nos leynan mes ta determina cu durante e periodo cu ta huur e propiedad, cu tur trabou di reparacionnan “grandi” ta pa cuenta di e doño y reparacion “chikito” ta core pa cuenta di esun cu a huur e cas. Awor kico ta grandi y kico ta chikito? Ley ta duna nos e contesta ey. Ora di papia di grandi nos por pensa manera reparacion di dak of algun daño structural. Ora di chikito nos por pensa riba cambia un scharnier, un cranchi of verf un camber.

Ora huur caba awor?

Manera mas cos den ley, cuminsa ta facil, pero ora cu e cos mester yega su fin, e sa complica un poco. Ban analisa algun ehempel. Si partidonan no tin contract por escrito, hopi biaha nos lo papia di un contract pa tempo indefini. Pero ya indefini tampoco kiermen pa semper. Si e huurdo kier sali, normal e lo mester duna un luna di aviso. E por ta mas, si partidonan a palabra un otro periodo verbalmente. Awor si e doño kier su cas bek, e no por djis duna un luna di aviso. E mester bay Huurcommissie prome, pasa door di un procedura, cu of sin abogado y wak si Huurcommissie ta aproba pa caba e huur. Si esaki ta e caso, anto e ora e doño por manda un aviso di terminacion hunto cu e permiso di Huurcommissie pa e huurdo. Asina ey e por caba e huur. Straño kisas cu e cos mester bay asina pero esaki ta un ehempel mas unda nos leynan no ta trata dos partido igual den e mesun forma. E scogencia aki a wordo haci door di nos legislador o sea parlamento. Si no ta di acuerdo cu e decision di Huurcommissie bo por apela na corte. Tene cuenta si cu e tempo cu bo tin pa apela ta hopi cortico.

Excepcion

E procedura cerca Huurcommissie no ta aplicabel si e local en cuestion ta situa den aeropuertp, waf of den hotel. Aki nos legislador a pensa riba esunnan cu a haci un inversion mas grandi pa traha un aeropuerto, waf of hotel. Esaki riba su mes ta comprendíbel. Pero esaki ta parce cu no ta rima mucho bon cu por ehempel inversion haci den un shopping mall of e inversionista cu ta desaroya un compleho di cas pa huur. Pero ya…ley ta ley!

Tips

• Pone tur palabracion entre doño y huurdo riba papel
• Consulta cu un abogado pa check e acuerdo y pa verifica si locual ta palabra tambe ta permiti
• Si tin algo robes cu e propiedad, check si esaki ta algo “grandi” of “chikito” pa sa ken tin cu cubri e gastonan 
• E procedura na Huurcommissie por tuma su tempo y tambe e apelacion na corte. Cuminsa na tempo
• Mantene un bon dialogo entre partido pa evita disputa y conflicto
• Un consulta cerca un abogado prome cu bo huur algo por scapa bo placa y dolor di cabes