Kico nos a siña di Lotto? N’ ta tur ta consultant

Kico nos a siña di Lotto? N’ ta tur ta consultant

E siman cu a pasa ‘ki, e titular di Trempan tabata “E N’ GANA LOTTO”. Cu esaki redaccion a indica cu e (awor ex) director di Fundacion Lotto Pa Deporte (FLPD) no a gana e fundacion den corte. Segun e sentencia, a termina  e relacion di trabou dia 23 di november 2022 pa motibo causa pa e ex-director y cu e mester paga tur gasto di corte. Mi lo no bay den detaye di e sentencia pasobra mi tabata un di e abogadonan den e caso y den e columna aki mi ta limita mi mes na observa, analisa y comenta sucesonan interesante y mi ta evita di bruha un cos cu e otro. Ademas, den tipo di caso asina, un ontbinding, ley no conoce of permiti apelacion. Como tal e sentencia ta final y definitivo.  

Kico ta un relacion di trabou?

Segun ley, un relacion di trabou ta existi ora cu ta cumpli cu tres elemento. Ademas mester remarca cu e intencion di partidonan ora a cera nan relacion di trabou mes no ta relevante pa e contesta riba e pregunta si ta existi un relacion di trabou of no. 

E tres criterianan ta:

• Trabou (arbeid)
• Salario (loon)
• Autoridad (gezag)

Si mi ta haci un trabou, mi ta ricibi un salario y mi tin un hefe cu ta manda riba mi, mi tin un relacion di trabou! No ta importa si mi tin un contract di trabou firma. Awor, si mi tin un contract firma, no ta importa si e contract tin un titulo di “contract di trabou” of si e no tin titulo mes of si partidonan a dicidi di yam’e contract of algo otro manera kisas un “M.O.U” of un “Acuerdo di consulting” of un “Acuerdo di servicio”. Tanten cu e elementonan menciona ariba ta presente, huridicamente e ta un relacion di trabou! Esaki ta trece diferente consecuencia legal cu ne, cu e partidonan mes kier of no. Y ta esaki ta pone cu mi ta uza e sentencia den e caso di FLPD di Roland Tuitt pa ilustra un di e consecuencianan ora hues determina cu e tres elementonan ta presente.

No ta hues so!

E criterianan menciona no ta relevante pa e partidonan mes of pa un hues so. Inspector di Impuesto of fiscal di Ministerio Publico tambe por investiga pa determina presencia di e tres elementonan aki. E referencia na e dos ultimonan aki no ta basa riba mi opinion of un teoria cu ami ta presenta. Esaki ta mas bien basa riba diferente sentencia den caso civil, den caso di impuesto y hasta den caso penal.

Pa ilustra

Den e caso di Lotto, a apunta e ex-director como un experto (financiero) of como un consultant a traves di su compania. Como consultant a otorg’e e posicion di director interino y tabata pag’e un “fee” di 17 mil florin pa luna, mas beneficio manera auto paga, vakantie y cierto gasto mas. E montante aki tabata igual cu e director cu el a reemplasa den forma interino. FLPD tabata pag’e e “fee” aki tur luna na su N.V. (“Periodo A”) Despues a apunta e meneer aki como director (vast) di FLPD y a firma un contract di trabou cu ne  pa 17 mil florin pa luna, mas beneficio of miho bisa, cu e mesun beneficionan (“Periodo B”).

For di e sentencia por saca afo cu durante periodo A, e NV di e “director interino” no tabatin ningun otro cliente. O sea e compania tabata sirbi unicamente y exclusivamente FLPD. Den e periodo B tambe e meneer tabata traha solamente pa FLPD, aunke cu esaki no ta mucho relevante. Locual si ta relevante ta cu e trabou, tarea y salario di e “director interino” y e “director (vast)” ta mesun cos.

Wak e criteria..ojo!

Si observa y analisa e periodo A y e periodo B y los e criteria menciona pa relacion di trabou, nos por ripara cu den ambos periodo e persona tabata: 

• Haci trabou exclusivamente pa FLPD (arbeid)
• Ricibi un salario di FLPD (loon)
• Responde na e Hunta di Supervision di FLPD (gezag)

Esaki ta trece cu ne cu huridicamente e periodo A y e periodo B ta cualifica como un relacion di trabou. Por cualifica periodo A como un “relacion di trabou fiscal” (fiscale dienstbetrekking). Cu esaki mi kiermen un relacion cu partidonan por yama kico cu nan kier, pero pa tema di impuesto, e ta un “relacion di trabou” y bo doño di trabou – esun cu a firma cu bo NV – ta obliga pa  retene y paga loonbelasting y e primanan social. Cu e “acuerdo tabata cu su “NV”, esey no ta kita afo cu legalmente tabata existi un relacion di trabou.

So what? Big deal…

Wel, kisas pa abo cu ta lesa e columna aki e no ta mustra un big deal, pero pa nos amigonan situa na Camacuri nr 2, Departamento di Impuesto, si esaki ta un big deal pasobra manera tin un relacion di trabou, e doño di trabou tin e obligacion legal pa hou in loonbelasting y e primanan social. Esaki cu of sin contract di trabou of si ta existi un relacion di trabou a base di e criterianan menciona – aunke cu partidonan riba papel a acorda otro of tabatin otro intencion of si partidonan bisa “mi n’ tabata sa”.

Commissaris of board member tambe!

Si bo tin e experiencia of experticio y b’a acepta pa forma parti di un raad van commissaris di un NV of di un board, tene cuenta cu ey tambe e  “relacion di trabou fiscal” (fiscale dienstbetrekking) ta aplicabel. 

Tip 1 di #BoAbogadoFaborito 

Wak bon y make sure cu e compania of fundacion unda bo ta traha ta hou in y draag af loonbelasting y e primanan social pasobra sino, lo bo por haya bo ta paga hasta despues cu bo no ta den e funcion ey mas. Esaki ta conta tambe si a nombra bo den un board of como commissaris pasobra bo ta famia of brother di un politico y e ultimo aki kier a “help bo out”.

No a cumpli

Den e sentencia por lesa cu durante periodo A, e “relacion di trabou di impuesto”, cu e “director interino” no a cumpli cu pago di loonbelasting y primanan social. Cu esaki, a perhudica tanto Departamento di Impuesto como FLPD. By the way, den e periodo B tampoco a cumpli cu pago di loonbelasting y primanan social! Corte a haya esaki un falta asina grave cu a ontbind e contract sin duna ningun tipo di golden handshake of compensacion!

Consecuencia

Awor, den un caso asina, Departamento di Impuesto no lo keda man bashi. E doño di trabou lo mester paga locual no a paga, riba su propio peticion of ora DIMP “snoek e” un aanslag. Pero, na su turno, e doño di trabou tin derecho di recupera e placa aki bek di e asina yama “consultant” a.k.a. e trahado.

Nada nobo

E liña di conclusion den e caso di Lotto no ta varia di e  liña cu corte(nan) den Reino of cu Departamento di Impuesto (nan) den Reino. 

Pero Gobierno awo cu su DVOnan?

Sa pasa cu gobierno ta cera un DVO of Dienst Verlenings Overeenkomst cu un hende of cu un NV. Gobierno ta liber pa haci esaki. Pero, si bin sali na cla cu den e relacion ey ta cumpli cu e tres criterionan ya menciona, e ora gobierno en bes di a paga e “consultant” e suma acorda bruto, mas bien Departamento di Impuesto lo mester instrui Departamento di Financien pa hou in y cumpli cu pago di loonbelasting y primanan social, pa asina cumpli cu ley. Ademas, impuesto lo mester bay over na “snoek” gobierno un aanslag pa cada DVO cu ta cay bou di e criterio aki. Tur esaki lo trece extra trabou pa Financien y Belastingdienst. Pa e “consultant” of “coordinador” kisas esaki por causa poco iritacion pasobra e ta bay cobra menos placa den su saco.

Por a evita tur esaki si a firma un contract di trabou normal en bes di scoge pa un DVO. Ta dificil pa imagina cu e departamentonan cu ta deal cu e tema di DVO no conoce e concepto legal di  “relacion di trabou di fiscal” (fiscale dienstbetrekking). Pero, kisas mi por ta fout.

Tip si bo tin un DVO. Wak Tip 1.

Te otro siman #BoAbogadoFaborito