ATL

Kico ta Medisch Tuchtcollege? Colegio medico disciplinario

September 13th, 2021

E ultimo temponan aki nos sistema medico ta hopi den publicidad. Aki tin hopi aspecto bon. Pero tin biaha nos por scucha algún cos menos bon tambe manera ora hende ta keja cu – segun nan – un médico a faya. Bo tawata sa cu tin un órgano cu juist ta wak pa esaki? Kisas un bon momento pa elabora un tiki riba e rol di e colegio disciplinario médico y con e ta traha.

Ley di medisch tuchtrecht

E profesion di dokter, boticario, dentista y partera, tur ta cay bou di supervision di un Medisch Tuchtcollege den nos Ordenansa di Colegio Disciplinario di Medicina, conoci como Landsverordening Medisch Tuchtcollege. E ley aki no ta regula ken por practica medicina. E ley aki ta crea un organo – yama colegio medico disciplinario –  cu ta atende cu y cu ta evalua kehonan haci contra esunnan cu ta practica medicina den e categorianan cu m’a menciona. Esaki ta pa e grupo di profesionalnan aki, similar cu e Raad van Toezicht pa abogadonan. Den pasado mi a dedica un columna  cue topico “Kiko ta  Raad van Toezicht di Abogacia”. Pa e columna aki di 14 di juni 2021 click .https://www.facebook.com/gomezcoffie/posts/4998674266816654

Medisch Tuchtcollege 

Medisch Tuchtcollege ta un organo crea pa e ley menciona. Den e organo aki tin un hues di Corte di Prome Instancia di Aruba y dos dokter. E oficina di e organo aki ta na Corte di Prome Instancia di Aruba. Su tarea ta pa controla e comportacion profesional di tur cu ta traha den cuido. Nan ta haci esaki ora nan ricibi un keho por escrito contra un of mas dunado di cuido. E keho ta wordo evalua a base di criterio den e ley y e normanan of protocolnan profesional cu ta conta pa e circular di dokternan. Den e sentido aki, medicina tin un sistema auto regulatorio, aunke kisas e sistema aki ta poco conoci pa mayoria den nos comunidad. Tambe kisas pasobra no por exclui cu hopi ta pensa cu e dokternan ta sagrado.

E procedura 

E procedura ta cuminsa cana ora un persona, sea pashent of ex-pashent di un dokter, sinti cu e dunado di cuido no a trat’e conforme di e criteria of protocol profesional aplicabel of si esaki a actua di tal forma cu e ta of a actua contra di locual ta wordo spera di dokternan. Asina cu e keho drenta, e secretariado di e organo ta habri un caso y ta manda un copia di e keho pa e dokter y ta dun’e un oportunidad pa defende su mes por escrito di e keho. Asina cu esey tuma luga, lo pone un fecha riba cual ta trata e caso. Riba e dia ey e demandante y e dokter ta presenta den corte, sea nan so of nan por wordo representa door di nan abogado. E caso ta wordo trata porta cera, o sea e partidonan so, sin presencia di publico of prensa. Na final ta cera e caso y e organo lo tuma un desicion den algun siman.

Posibel resultado 

E sentencia por contene un di e siguiente resultadonan aki. E caso por wordo declara infunda, o sea ongegrond. Esaki kiermen cu e demanda no tabatin base. Esaki sa pasa. Por tin caso unda cu e pashent no a keda contento cu un tratamento of un resultado y ta dal un keho pa baha rabia of pa tuma revancha. E ley no ta skirbi pa esaki. Mester tene cuenta cu dokternan no ta Dios, pues nan no por haci milager. Esaki los cu den un pelicula cu m’a mira, nan ta conta e storia di un dokter cu tawata sufri di e God Syndrome cu ta pone cu e ta kere cu su conocemento y su actonan ta mas poderoso cu Dios. Mi mes no conoce un dokter asina na Aruba pero masha hopi dokters-assistenten si cu ta pensa cu nan ta Dios. Pero no laga mi desvia. Si e Colegio haya cu e caso ta funda, e por tuma un of otro medida. E medida por ta cu ta declara funda sin ta necesario pa tuma un medida disciplinario of por consisti di un aviso waarschuwing cual ta un medida leve of e por ta un reprimanda berisping. E por ta tambe un suspension di eherce e profesion pa un tempo schorsing y den casonan extremo e organo por destitui e dokter di eherce e profesion pa semper!

Apelacion 

Ambos partido por apela e decision aki na e Raad van Appel cu lo trata e caso den ultimo instancia. Kiermen cu despues di esaki no tin mas recurso legal contra e decision y no por bay casacion na Corte Supremo, esta Hoge Raad na Hulanda.

Funcion

Via e mecanismo aki e pashent of ex-pashent y e profesion di dokternan ta wordo protegi pa por regula e profesion, cu porcierto ta un di e profesionnan di mas bieu na mundo.Otro profesionnan manera abogado, accountant y notario tin mecanismonan similar. Pa politiconan no tin algo asina. Eynan tin otro “reclamant” y e God Syndrome ta hopi mas frecuente – a lo menos tanten nan tin e puesto. 

Kico mi por haci como pashent?

Si bo ta wordo atendi pa un dokter y no tin duda si e tratamento ta conforme e protocolnan vigente y criterio di e colegio medico disciplinario, puntra e dokter si esaki ta e caso. E pregunta por lo menos lo hacie pensa dos biaha. Si e bisa si, wel e ora e lo no por nenga esaki despues y si ta no porta bo ta keda sinta in tiki mas largo su dilanti y haya e cuido conforme e criterio y protocolnan. Corda cu esaki ta conta tambe pa dentistanan, partera y boticario.

Dokternan wak bo caya

Dokternan ta concentra pa atende e pashent cu nan maximo esfuerso, conocemento y experiencia. Ora nan ta bezig kisas nan no ta pensa pa mantene un record dinamico di cada caso. Ora mi wak un dokter skirbi algo riba un papelucho sin tin un record apropia, mi ta cuminsa wonder si nan ta bon prepara pa si nan haya un keho den nan body. Mescos ta conta pa e secretarianan cu God Syndrome, pasobra como dokter of specialista, abo tin cu para pa un keho si e empleado ey no cumpli cu locual ta wordo spera di un dunado di cuido.Ta bon pa busca asistencia of conseho huridico manera un keho drenta of miho ainda prome cu esey pasa pasobra e sala di corte ta un otro ball game cu e sala di examinacion di un dokter of un sala di operacion y tur bo bon intencionnan so no lo yuda bo sali for di un keho asina zo maar. Los cu su tras bo por haya un demanda pa daño di perhuicio. Den e cuadro aki ta bon pa ta bon sigura contra esaki.  Bo profession ta importante no laga un keho frivolo afecta esaki ni tampoco bo bon nomber como dokter of specialista.

Info

Pa leynan riba tereno medico, click AKI. https://www.iva.aw/leynan Pa mas informacion por contact e colegio via su secretariado na corte of por consulta cu nos na Gomez Coffie www.gomezcoffie.com cu ta conseha riba e tema aki y cu ta representa dokternan den casonan dilanti e colegio medico disciplinario.

 

Share on social media

Facebook
Twitter
LinkedIn