Kico ta Raad van Toezicht di abogacía?
June 14th, 2021
Kico ta Raad van Toezicht di abogacía?
Recientemente a publica un decision di Raad van Toezicht pa abogacía. Kisas un bon momento pa elabora riba e organo aki y comparti un tiki di su rol y su funcionamiento.
Ley di abogacía
Ta regla e profesion di abogacia den nos Ordenansa di Abogado Advocatenverordening. E ley aki, mescos cu hopi otro, ta basta anticua y mester renoba. Den mi periodo como decano di orden di abogado nos a presenta un concepto di ley na parlamento. Esey tabata basta aña pasa y asina leu cu mi sa e proceso ey no ta canando. Mientrastanto nos lo mester sigui traha cu esun cu tin. E ley ta regla entre otro e rekisitonan cu un persona mester cumplí cu ne pa por huramenta como abogado dilanti di Hof. E rekisitonan ta inclui educacion specifico y e candidato mester pasa un screening prome cu e por huramenta. E ley tambe ta proteha e título di abogado. A base di esaki solamente personanan cu huramenta conforme di e ley ta permiti di carga e titulo di abogado. Sa pasa cu un of otro persona ta zwaai cu e titulo aki sin cu e ta abogado. Esaki ta un hecho castigabel. Ta bon pa check cu corte of orden di abogado si bo kier ta sigur cu e persona en berdad ta un abogado y no un charlatan. Si un persona asina aki ta cuminsa cu gaña cu un título cu e no tin, abo como persona cu ta busca asistencia legal no por spera mucho di dje y bo por wordo perhudica. Por check e website www.ova.aw caminda tin e lista completo di abogado.
Raad van Toezicht
Raad van Toezicht ta un organo crea pa e ley di abogado. Den e organo aki tin un hues di corte di prome instancia di Aruba y dos abogado. E oficina di e organo aki ta na corte di prome instancia di Aruba. Su tarea ta pa controla e comportacion profesional di abogadonan. Nan ta haci esaki independiente di ora nan ricibi un keho por escrito contra un of mas abogado. E keho ta wordo evalua a base di criterio den e ley y tambe e reglanan di honor gedragsregels cu e orden di abogado ta traha pa su mes. Den e sentido aki abogacía tin un sistema auto regulatorio.
E procedura
E procedura ta cuminsa cana ora un persona, sea cliente of ex cliente di un abogado, sinti cu e abogado no a trat’e conforme di e reglanan di honor of si esaki a actua di tal forma cu e ta of a actua contra di locual ta wordo spera di abogadonan. Asina cu e keho drenta, e secretariado di e organo ta habri un caso y ta manda un copia di e keho pa e abogado y ta dun’e un oportunidad pa defende su mes di e keho por escrito. Una bes esey tuma luga, lo pone un fecha riba cual ta trata e caso. Riba e dia ey e demandante y e abogado ta presenta na corte, sea nan so of nan por wordo representa door di nan abogado. E caso ta wordo trata porta cera o sea e partidonan so, sin presencia di publico of prensa. Na final di e caso e ta wordo cera y e organo lo tuma un desicion den algun siman.
Posibel resultado
E sentencia por contene un di e siguiente resultadonan aki. E caso por wordo declara infunda ongegrond. Esaki kiermen cu e demanda no tabatin base. Esaki sa pasa cu frecuencia. Si Raad haya cu e caso ta funda, e por tuma un of otro medida. E medida por ta cu ta declara funda sin ta necesario pa tuma un medida disciplinario of por consisti di un aviso waarschuwing cual ta un medida leve of e por ta un reprimanda berisping. E por ta tambe un suspension di eherce e profesion pa un tempo schorsing y den casonan extremo e organi por destitui e abogado di eherce e profesion schrapping di tableau.
Apelacion
Ambos partido por apela e decision aki na e Raad van Appel cu lo trata e caso den ultimo instancia. Kiermen cu despues di esaki no tin mas recurso legal contra e decision y no por bay casacion na Corte Supremo Hoge Raad.
Funcion
Via e mecanismo aki e cliente of ex-cliente y e profesion di abogado ta wordo protegi pa por regula e profesion, cu porcierto ta un di e profesionnan di mas bieu na mundo.Otro profesionnan manera dokternan, accountants y notarionan tin mecanismonan similar. Pa mas informacion por contact e organo via su secretariado na corte of por consulta un abogado.