ATL

Ley a cambia: Tin regla nobo ora di pone beslag riba salario

October 11th, 2021

Sa pasa cu basta frecuencia cu banco, otro fiado di placa of pa motibo di un caso civil, cu ta pone beslag riba salario di un empleado. Esaki ta poco fastioso pa e empleado pasobra di golpi e no por cobra ful su salario mas pero tambe pa esun cu a pone beslag pasobra e persona no a cumpli cu locual el a firma cu banco of e conocido fiadonan local. Di otro banda por observa un tendencia den acumula debe diferente caminda en bes di spaar of acumula bienes. Enfin, cu e codigo civil nobo cu a drenta na vigor dia 1 di september 2021, a bin algun regla nobo pa locual ta ponemento di beslag riba salario. Ban wak esaki un rato pa abo, sea como doño di trabou of esun cu ta hande payroll of HR of abo como empleado make sure cu cosnan ta bay na ordo. Antes un beslag por a bay te cu ⅓ di salario di e trahado. Ban wak con e ta awo.

Beslagvrije voet

Tin un parti maximo di bo salario cu e ponedo of ponedonan di beslag por tira man riba dje. Esaki ta asina pa percura cu un persona por dispone di placa pa por cumpli cu su obligacionnan esencial of basico manera huur, awa, coriente y comestibel. Ta yama esaki beslagvrije voet. Ta un tema di dialogo entre gobierno y e “partnernan social” den e periodo augustus pa november 2012 cu e proposito pa drecha poder di compra.

Con pa calcula beslagvrije voet

Ley ta stipula e salario minimo, cu actualmente ta Afl. 1.815,35. Segun Departamento di Labor, e salario minimo netto ta (rond di) Afl. 1.700. Den e caso di salario minimo, e 25% aki no por surpasa 90% di e minimumloon, segun stipula pa ley. Pues, e 90% di Afl. 1.700 ta Afl. 1.530 o sea por pone beslag riba un maximo di solamente Afl. 170 pa luna, si e persona ta gana net minimumloon. Esaki kiermen cu pa minimum loners, de facto, ta conta un tarief di 10%. Fiadonan di placa sa esaki pesey ora di presta placa nan lo no fia bo mucho si nan sa cu ora cos bay robes ta Afl. 170 so nan por beslag di un hende cu ta gana minimumloon. Si e persona ta gana mas cu salario minimo, semper mester tene cuenta cu bou di ningun circunstancia e beslag por laga e empleado cu menos di Afl. 1.530. Pero corda cu esaki ta los di tur otro gasto cu lo mester wordo paga despues manera entre otro alimento, transporte, huur, etc. 

Beslagvrije voet te un maximo di 25%

Articulo 7:632a di e Codigo Civil ta stipula e regla general cu ta bisa cu si bo salario ta te cu Afl. 36.000 bruto pa aña, e ora por pone beslag te cu un maximo di 25% di bo salario. Tene cuenta cu si e beslag ta poni pa un menos bedrag e resto te cu 25% ta keda disponibel. Awor e regla aki parce simpel pero e no ta mes facil cu e ta parce. Laga nos aplica esaki riba e salario di Patrick cu ta 3 mil florin bruto pa luna dus bou di Afl. 50.000 pa aña. Mi ta uza e ehempel aki pasobra m’a wak Directie Arbeid duna un splicacion uzando e suma aki pero mi no por a volg e splicacion mucho bon. Ami lo purba splic’e na mi manera. Cu e salario bruto di Afl. 3.000 pa luna, segun Directie Arbeid, e ta mas of menos Afl. 2.700 netto. Kiermen cu e beslag por ta maximo 25% di Afl. 2.700 cu ta Afl. 675. Nos ta calcul’e a base di netto, no pasobra e Codigo Civil ta bisa pero nos mester tene cuenta cu tin un otro ley, e Codigo di Procedimiento Civil cu ta bisa cu un beslag riba un salario no por cubri e partinan di salario riba cual ta haci un inhouding a base di ley – pensa riba loonbelasting, AOV, AOW – of un seguro medico of spaar pa pensioen (“Inhouding”). Sabiendo esaki y asumiendo cu e porcentahe di inhouding den e caso di Patrick ta (mas of menos) 10%, anto awo si nos por calcul’e bon.

  • Salario Patrick pa luna  Afl.  3,000 
  • Inhouding, belasting etc (Afl.   300)
  • Salario Netto pa luna   Afl.  2.700
  • Beslag te cu 25% di Afl. 2.700 (Afl.   675)
  • Resto di salario Afl.  2.025

O sea, e suma cu e fiado por pone beslag riba dje ta te cu Afl. 675,=. Den e ehempel aki e beslagvrije voet no ta hunga un rol pa e calculo pasobra e salario netto ta mas halto cu e cantidad di e beslagvrije voet. Directie Arbeid, den nan splicacion ta menciona e beslagvrije voet den e ehempel cu e cifranan aki, pero segun mi esaki ta bruha mas cu e ta yuda. En todo caso el a bruha ami y mi mester a wak e bon, vooral cu e departamento aki no tur ora ta consistente den aplica ley manera sa y a pasa. Pues, si e salario netto ta menos cu Afl. 2.040 e ora e beslagvrije voet ta relevante pa e calculo. Cu otro palabra, no ta asina cu semper t’un parti di e salario ta beslagvrij y local surpasa esey riba esey por pone beslag. Awor si tin masha fiado y nan tambe pone beslag, e bolo di e Afl. 675 ta bira mas chikito cu consecuencia cu e fiadonan lo tarda mas pa haya e debe paga, cu kiermen e empleado lo paga hopi mas interes ainda.

Beslag te un maximo di 33%

Articulo 7:632a di e Codigo Civil ta stipula e regla general cu ta bisa cu den tur otro caso, o sea ora e salario pa aña ta mas cu Afl. 50.000 bruto, e porcentahe maximo di e beslag ta 33.33%.  E manera di calcula ta mescos. 

By-pass? No way!

E siguiente articulo di e Codigo Civil ta pone cu si un fiado purba di laga e empleado fiado/empleado firma algo pa asina e fiado por cobra pa luna mas leu cu e proteccion di e beslagvrije voet of e porcentahe maximo pa ley, cu esaki ta nulo! Esaki ta conta tambe pa un eventual volmacht of standing-order cu sa uza pa e placa bay direct di e salario pa e dunado di credito. Ley ta bisa cu por cancela un volmacht asina any time. 

Pero unda e placa ta bay?

Laga nos bisa cu e fiado a hiba bo corte y a gana. Mi no sa awor pero den pasado riba rol di diaranson bo ta haya fiadonan manera Island Finance cu caso contra hopi hende y mayoria biaha e hendenan no ta presenta mes na corte y e fiado ta haya un sentencia pa cobra un suma di placa for di e debedo. Na e momento ey deurwaarder ta pone beslag executorial riba salario di e empleado, a base di articulo 475 di Codigo di Procedimiento Civil. Ora cu cumpli cu e formalidadnan, e compania tin e obligacion pa manda cada quincena of luna sea e 10%, 25% of 33.33% cu ta aplicabel pa e deurwaarder cu a pone e beslag. E deurwaarder na su turno lo percura pa ricibi e placa y manda esaki – kitando su gastonan – pa e fiado. Awor si bin un otro deurwaarder cu un otro sentencia executorial riba e mesun empleado, esaki no ta cambia nada pa e doño di trabou ni pa e empleado. E suma original lo sigui bay pa e prome deurwaarder y di eynan 2 fiadonan lo mester yega na un acuerdo con ta parti e bolo. Lo mi verwacht cu entre e banconan y fiadonan lo tin cierto acuerdo entre otro pasobra nan interes ta similar. Awor si tin un fiado y un otro partido cu tin un sentencia pa un otro tipo di claim y kisas e partidonan aki no por yega na otro, un di nan lo por bay corte di prome instancia pa nombra en hues-comisario pa dicidi riba esaki.

No por otro?

Tin otro manera pa atende cu e concepto di beslagvrije voet. Por ehempel, tin otro paisnan cu a of sa uza un tabel unda ta pone e beslagvrije voet y ta varia depende di si bo ta casa of no, si bo tin yiu of no of si bo ta pensionado of no. Depende di bo categoria, ta stipula e beslagvrije voet y bo ta yega na e suma mas lihe y ta tene cuenta kisas mas cu situacion di e persona.

Kico esaki kiermen pa bo?

Tanto e compania como e empleado ta beneficia si e calculacion y e pago wordo haci bon. Mi ta verwacht cu e sistemanan di payroll lo of ya caba a programa esaki. Di otro banda, ta bon pa controla esaki pa bo no wordo perhudica. Tambe ta bon pa check si ta aplica e articulo bon, vooral pasobra e ta algo nobo. Y ora e ta nobo mester analisa e bon paso aki, e famoso scol di bida of experiencia of copy paste n’ ta traha tur ora.

Duda?

Si bo tina algun duda of pregunta, por contact Gomez Coffie pa un consulta individual of pa conseho structural riba temanan di labor www.GomezCoffie.com

Nota

Un danki na mi colega y socio Bryan Coffie pa su contribucion pa cu e materia aki. Mi ta gradici pa su critica y comentario.

 

Share on social media

Facebook
Twitter
LinkedIn