Ley laboral: Ontbind e co’!

Ley laboral: Ontbind e co’!

Nos leynan laboral ta basa riba un sistema cera, o sea un sistema limitativo di con un relacion di trabou por termina. Awe lo mi toca un di e forma nan. E forma aki yama “ontbinding” of disolucion di relacion di trabou. Pa esunnan cu kier read along den nos codigo civil e ta regla den artículo 7:685 antes e tabata den 7A:1615w. Si bo no tin bo buki di ley laboral ainda, bo por bestel e na www.AboutTheLaws.com. Pero bo por sigui lesa trankil si cu e buki den bo man.

Mi a scoge e topico aki pasobra e ta un procedura poco apart y e casonan ta leuk pa haci. Ban wak.

Ontbinding

Ley ta reconoce cu tin circunstancia di tal indole cu ta pone cu, sea: (1) esaki ta trece cu ne un motibo pisa (dringende redenen) of (2) un cambio di circunstancia di tal índole (wijziging van omstandigheden) cu e relacion di trabou no por continua y mester yega na un fin pronto. Den e caso aki, riba ordo di corte. Na mes momento corte lo determina ta pa ken su falta esaki ta y si e partido cu tin falta aki tin cu paga un compensacion na e otro of no y si ta si, cuanto.

Con e co’ ta bay?

Sea e doño di trabou of e trahado mes por inicia e procedura di ontbinding. Ta hacie mediante un peticion na Corte di Prome Instancia. Un peticion asina mester ta completo, bon motiva y mester inclui e pruebanan pa demostra cu e peticion ta hustifica. Si bo ta empleado, mester paga Afl. 50 na gasto di corte (griffierecht). Un doño di trabou ta paga mas, Afl. 450! E discrepancia aki por mustra un tiki staño pasobra afterall t’e mesun corte y e mesun procedura. Aki parce Hof a aplica e principio conoci como “schouder hancho” cu politiconan tambe gusta uza masha. Pero bula riba of bula bou Hof a stipula esaki pa tur e islanan y ta asina e co’ ta bay.  Despues cu corte a cobra y procesa e peticion, ta manda informa esun cu a haya e demanda contra dje. E ta haya un copia di e peticion hunto cu un carta bisando e tin pa presenta riba x fecha y cu e tin te e dia ey pa entrega un reaccion por escrito na corte (verweerschrift) cu un copia pa e demandante. E no mester haci e ultimo aki pero ami ta haya esey consehabel.

Tratamento

Riba e dia di tratamento (zitting), e partidonan ta topa den corte. Usualmente compaña pa nan abogado pero nan por bin nan so tambe y presenta na argumento direct. Ey hues, compaña pa un griffier lo ricibi e partidonan y trata e caso.

Awo pa esaki tin tres style. 

1. Un style ta unda cada partido ta haya e chens pa splica nan ponencianan den corto y despues cada un ta haya chens pa reacciona riba locual a trece padilanti y djey hues por haci pregunta of fula tera mira si partidonan no por yega na un areglo. Si esey no ta e caso, e lo pone fecha pa dicta sentencia. Aki ta trata di dos rond di hiba palabra pa cada partido.
2. E di dos style ta cu hues ta duna un rond so unda e demandante por reacciona den corto riba e verweerschrift y despues esun cu a demanda ta haya un ultimo palabra. Aki ta trata di un rond di hiba palabra pa cada partido.
3. E di tres style ta cu dos rond di palabra pa cada partido (o sea via nan abogado) y e hues ta duna cada partido mes chens pa duna un ultimo palabra. Esaki por parce un di tres rond.

Pakico tres style?

Esaki ta un bon pregunta cu over curso di e (25) añanan cu mi tin ta bay corte m’a maak mee hopi hues y tambe hopi desaroyo. Locual por remarca ta cu cada hues tin su mesun style pero tambe cada hues tin e tendencia di run su show na su gusto. Ora un hues pone regla den sala, partidonan no ta keda cu mucho choice. Esaki ta cay bou di discrecion di e hues. Aunke e partidonan no ta di acuerdo cu con e cos ta bay of si e style a cambia di un día pa otro. Cu excepcion kisas di e storia di un abogado cu hopi aña pasa su buchi a yena, el a paketa su cosnan y bandona sala memey di e caso.  Ora hues a puntr’e dicon e ta bay, e di algo manera: “mi ta bay prepara e apelacion contra bo sentencia”. Pero ban sigui riba e tema no laga mi coba den e bahul di storia di corte. E bahul ey ta keda cera te despues cu mi retira.

E desicion

E decision normal ta sigui entre 2 pa 4 siman despues di tratamento. Si corte nenga e peticion e relacion di trabou ta sigui mane nada un pasa y e partidonan lo mester wak con nan ta regla nan problema cu otro. 

Si corte honra e peticion e por disolve e relacion di trabou y scoge di duna of no un compensacion rasonabel. Con pa calcula esaki tambe tin diferente criteria. Un di nan yama Kantonrechersformule. Awo di e formula aki tin esun bieu y tin un nobo. Awo cua lo uza den bo caso, nunca bo n’ sa. Tin hues ta gusta coy e nobo y tin ta prefera di coy e bieu. Tin ta djis dal un cifra sin menciona formule mes. Awo, den caso asina, ora un doño di trabou actua fo’i sla hues a yega di straf e malamente anto lag’e sintie den su cartera y duna compensacion di 200 mil, 300 mil of hasta 400 mil (plus) florin. Di otro banda, ma yega di mira trahado sali man bashi tambe di un caso asina, vooral si nan a bay corte pa djis tira un para (gelukzoeker).

Mi por apela?

No, e procedura aki ta diseña pa ta rapido y eficiente. Pa e motibo aki e partidonan no por apela e sentencia. Excepcion cu tin riba e regla ‘ki lo mi no trata door di limitacion di espacio.

Dal e?

E procedura di ontbinding no ta un solucion tipo one size fits all pero e ta un instrumento cu ta bale la pena considera como opcion ora e relacion di trabou ta poco stroef. Awor tampoco e no ta un alternativa pa e Mini-Mega di Fundacion Lotto pa Deporte. Check cu #BoAbogadoFaborito prome cu dal e stap ey of si nan hiba bo corte.

Pregunta?

Si b’a lesa te ‘ki nan y bo tin algun pregunta, hacie libremente via mi Facebook (please keda al caso) y lo mi haci mi best pa contesta.