ATL

Ley nobo: “Muri-Premie” Un luna di salario pa muri

Nos codigo civil ta na vigor y segun tempo ta pasa mi por comparti un tiki mas. Awe mi lo comparti un articulo cu ta poco peculiar den e contexto di un relacion laboral.

Relacion laboral

Un relacion laboral ta wordo caracterisa cu tin dos partido di cual un tin e autoridad y e otro e obligacion di haci e trabou. Como compensacion pa e trabou, tin un salario. Si no tin trabou, tampoco tin pago. Esaki ta conoci como no work no pay. 

“Muri premie”

E codigo civil awor tin un articulo nobo cu ta bisa cu e doño di trabou of e clase empresarial tin e obligacion di paga un (1) luna di salario na famia di e empleado cu fayece. E periodo di luna ta cuminsa core riba dia cu e empleado a fayece. Esaki ta irespecto si el a fayece na pia di trabou, na cas of a causa di su propio negligencia of otro causa. 

Pa ken e placa ta bay?

E placa ta bay pa e casa, si nan tawata biba manera un pareha casa of na e persona cu e empleado tawata biba cu ne o cu esun cu e tabatin un hogar. Lo no straña mi cu nos lo por topa cu un caso unda tin dos hende lo bin bati na porta di e doño di trabou y claim “nan placa”.

Straño

Den e contexto di e relacion laboral mi ta haya e articulo aki straño. Ley ta bisa cu e relacion laboral ta caba automaticamente ora un empleado fayece. Kiermen cu desde e momento ey no tin obligacion mas entre partidonan. Ademas, nos tur a bin na e mundo aki pa bay un dia. Esaki ta un realidad y e doño di trabou, mescos cu e empleado, no tin ningun influencia riba e suceso aki.  Den un caso asina, e doño di trabou ta hay’e confronta cu perdida di un trahado. Esaki lo afecta e doño di trabou y tambe su operacion y lo trece costonan directo y extra pa e empresa. Por ehempel, den forma di overtime of door di contrata un servicio pa yena e funcion. Esaki ta irespecto si e fayecido tawata un empleado ehemplar of si e tawata un menos ehemplar – pensa riba e famoso rotte appel cu ta cana rond den cierto empresanan. Awor cu e articulo nobo aki esaki ta bira un extra gasto riba e empresa. Un gasto no presupuesta ni tampoco un cambio cu mi a tende un minister, parlamentario of sindicalista papia riba dje prome cu e ley a pasa. Door cu no tin ningun prestacion laboral den un caso asina mi ta haya e articulo straño. 

Payroll?

Un otro pregunta ta, ken belasting tin cu cobra den un caso asina? E defunto no, pasobra e contract di trabou no ta existi mas. Ta con e doño di trabou lo boek esaki den su administracion? Lo mester pidi tur informacion di e heredera(o) pa suministra Departamento di Impuesto (DIMP) pa sa unda mester bati na porta pa cobra e luna ey di salario?

Y si a muri laga debe atras?

Un pregunta kisas ta kico ta pasa si e empleado tabatin debe cu e doño di trabou manera un voorschot of un fiansa? E doño di trabo por verreken esaki mescos cu ora e relacion di trabou caba bou di circunstancianan normal?

E flip side awor?

Awor hopi di nos por pensa cu e “muri premie” aki ta na su luga, pasobra e ta yuda e famia den un momento dificil. Tene cuenta cu ya caba via SVB e famia di un fayecido ta haya un suma paga. E sa pasa cu e suma aki ta wordo asigna na e mortuario pa yuda paga gasto di entiero. Asina mes kisas algun sindicalista lo bisa cu un (1) luna ta poco pa e clase trahado y cu mester ta hopi mas. Pero esaki ta otro storia. Awor e “muri premie” aki por ta bon, pero di otro banda, kisas e empresa cu antes di su mes tawata haci un gesto, door di por ehempel duna coleganan liber pa bay entiero, paga pa e labamento di man despues di dera, laga e salario sigui core pa e luna, duna algo extra na famia pa cubri gasto, of hasta cubri cierto gastonan pa e famia cu hunto lo por ta mas cu e un (1) luna, cu awor lo por bisa: Warda un rato, ley ta bisa mi tin cu paga 1 luna y that is it!  Si esaki pasa anto per saldo e famia ta bay atras. Awor di mes mi amigonan sindicalista lo bisa “pero si antes pa haci un gesto, pakico awor no mas?”. E contesta segun mi ta facil, un gesto ta wordo haci door di un iniciativa propio y no pasobra un otro ta pidi.

E columna

Manera custumber, ta skirbi e columna aki pa comparti informacion y pa stimula discusion riba temanan cu kisas no tur ora lo wordo discuti.Tin baha ta skibie for di un cierto angulo pa stimula e discusion aki. E columna aki no ta un outlet pa mi opinion personal of posicion cu mi por tuma den un caso legal. Mi ta tene eseynan pa mi mes. Si bo ta enjoy e contenido, great. Si no, feel free di skip e y nada n’ pasa. Te otro siman, si Dios kier.

Share on social media

Facebook
Twitter
LinkedIn