ATL

Ley ta bisa A, pero nos ta haci B

Den e columna aki di tur siman mi ta comparti un topico di ley. Tin biaha door di limitacion di espacio nan ta sali den dos parti. E topiconan tipicamente ta toca algo actual of ta cubri un aspecto en particular di nos leynan. Den e edicion di awe mi lo trata un tiki di e structura di nos leynan en general, pa asina por haya sa con nos leynan ta hinca den otro y un parti lo mi duna algun ehempel di practica unda cu nos aparato publico no ta actua conforme e mesun constitucion cu nan a huramenta pa protege.

Motor di ley = DWJZ

Ta conoci cu e proceso pa nos yega na un ley ta cuminsa sea door di un iniciativa di ley presenta door di un parlamentario of door di un iniciativa di parti di gobierno. Den practica e motor tras di nos leynan ta e departamento yama Directie Wetgeving en Juridische Zaken (DWJZ). Aki e huristanan di e departamento aki, ademas di hopi otro tarea, ta esunnan cu ta produci e textonan di ley y e splicacion cu ta acompaña esakinan. Skirbi ley ta un disciplina riba su mes. E no ta un trabou cu cualkier hurista por haci. Tin curso universitario of post-academico dedica na esaki. DWJZ ta importante pa nos pasobra ta nan ta traha e fundeshi pa e funcionamento di nos pais door di traha y actualisa e reglanan necesario cu nos ta yama ley. Por menciona cu como departamento tambe nan sa tin falta di personal cualifica y kisas cierto recurso pero con cu bay bin, nan ta produci leynan si.

Structura

Cierto ley ta cuminsa cu un parti general prome y despues ta bay den detaye, excepcionnan, etc. Na comienso hopi biaha e legislado, o sea parlamento – pero en realidad DWJZ – ta defini un of mas terminologia cu ta specifico na e ley. E motibo pa haci esaki ta pa asina por elabora e resto di ley teniendo cuenta cu e terminologia ya defini. Esaki e ora ta resulta den un ley cu un lenguaje consistente. Tene cuenta cu e por pasa cu un definicion legal no necesariamente mester cuadra cu e mesun definicion cu kisas bo por haya den un diccionario. Pesey ta bon pa tene cuenta cu e definicion legal.

Regla

Tin ley ta stipula reglanan pa nos por funciona manera un estado di derecho. Ta bon pa para keto un rato na esaki pasobra den un estado di derecho tin regla manera ley cu ta salvaguardia e derecho, entre otro constitucional, di cada ciudadano. Esaki ta algo valioso y nos mester reconoce e nificacion di esaki. Contario, por ehempel na otro paisnan, incluyendo esun “pazuid ey” unda segun experto internacional, no ta respeta e estado di derecho, of no ta existi y abuso di poder ta na ordo di dia. Ta bon pa tene esaki den mente ora den nos bida diario, sea profesional of personal, si nos ta actua den un forma cu ta conforme regla, of si nos mes ta ignora esaki y ta cuminsa leun den direccion di un estado di caos, marea “pazuid ey”. E escogencia ta di nos tur pero mester tene cuenta si, cu si awe abo ta haya ta bon pa ignora un regla den ley y esaki ta afecta un hende – anto abo ta hustifica esaki cu bo mes – tene cuenta cu mañan ora un otro haci mescos cu bo, no core grita “mi derecho” pasobra dia abo a haya ta bon pa trapa ley, bo no a worry ora el a grita “mi derecho”. Manera e grandinan ta bisa: Si bo sembra biento, bo lo cosecha horcan!

Derecho di peticion

Un ehempel di un regla den ley cu ta hopi importante pa nos democracia – nos estado di derecho – ta e derecho constitucional di peticion, esta articulo I.14 (recht van petitie). Esaki ta encera cu cada ciudadano tin e derecho di dirigi su mes cu un peticion na gobierno of cualkier instancia di gobierno. Esaki ta e regla. Ban wak si ta aplic’e bon?

Bureau Interne Diensten (BID)

Esaki ta e punto oficial pa entrega peticion na gobierno. Awor por entrega esaki, por ehempel na oficina di un minister tambe, pero via BID bo tin prueba cu bo a entrega bo peticion pa mañan nan no bisa bo cu bo carta a perde, locual sa pasa de bes en cuando. BID ta manera e postkantoor oficial di gobierno. E cho cu tin un departamento dedica na esaki ta bon. Como postkantoor nan trabou ta pa ricibi y entrega. Nan tarea no ta pa evalua ningun peticion ni tampoco di nenga ningun peticion. Locual ta menos bon ta ora e departamento aki y hasta e hefe ta bin dicidi cu no ta tuma bo peticion pasobra e ta haya ta bon! Sa pasa cu bo ta yega ey cu un peticion y nan ta nenga pa tuma esaki pasobra e firma ta digital y no original. Hera e mester ta cu pen blauw tambe pasobra si ta preto nan no por wak si e ta original of si ta un copia. 

Den constitucion no ta para ningun caminda cu BID – of e tercio aki – tin e autoridad aki of cu e ciudadano mester baila na su amen. Den un ocasion ami mes a puntra e director, Brete, si e conoce e derecho di peticion den nos constitucion. El a contesta mi algo manera: “si pero na BID nos ta hacie otro”. Can you imagine? Un director di un departamento ta bisa cu e no mester actua conforme nos constitucion? Pa colmo, ki dia ey a bolbe pasa pero nan di “pa e biaha ‘ki nos ta tum’e”. Algo cu tampoco nan tin autoridad di haci. Wel, wel…pero asina pocopoco nos ta bay den direccion di e pais pazuid. Si mi ta robes kisas e director Brete por educa ami y comunidad door di mustra mi unda den e constitucion e ta saca e base legal p’esaki. Ami semper ta dispuesto pa siña.

Firma digital

Awor sigur door di pandemia nos a brasa tecnologia mas cu nunca incluyendo uzo di firma digital, p’asina nos mantene distancia. Ademas e firma digital ta regla den nos leynan tambe. Mi ta wonder si BID sa esaki?

 

Camara di Comercio 

Di otro banda, nos tin un Camara di Comercio (KVK) cu ta ful digital. Tur cambio ta haci electronicamente. Esaki tambe ta reduci uzo di papel y ta spaar gasto di storage di tanto papel pa añanan largo. Esaki ta di aplaudi. E director di BID lo cay flauw si e tende di esaki y si e bay tuma mando aya e lo para e cos ey sigur, basa riba su version di ley.  E sistema di KvK ta cera cu ta rekiri ora bo ta registra y gelink cu un compania pa bo por haci cambio electronicamente. Esaki pa evita mal uzo. Ta firma sea riba e screen, si bo tin un smartphone of cu e mouse di bo desktop. Awor firma asina no ta flow mescos cu firma cu pen dus e por pasa cu e firma por desvia un tiki. Di otro banda, mi ta sigur cu si nos firma 10 biaha cu pen riba papel, e firma no lo sali semper mescos. Awor en bes di move cu tecnologia na Camara di Comercio, e “Senior Commerce Foundation Registry Officer”, ta cuminsa nenga cambio “pasobra e firma no ta mescos cu riba e paspoort”. 

“Handtekening van de heer L.D. Gomez op het online document komt niet overeen met de handtekening op zijn paspoort”

Aha! Regla nobo parce, si e firma no ta 100% manera e ta aparece riba e paspoort, e no ta bon of e no ta legal. E ley ey mi no conoce. Pero nos aparato publico ta campeon pa inventa cos nobo basta nan por bisa “NO”. Awor kico lo pasa si Juancho su firma riba paspoort, rijbewijs of cedula no ta mescos? Ta con KvK lo haci? Keda sin acepta ningun? E solucion pa esaki ta mescos cu na paisnan civilisa, automatisa ful e proceso aki pa asina por haci cambio 24×7 y control ta tuma luga a base di algoritmo y no a base di kier of gevoel di un individuo.  

Tanto BID como KvK kisas lo mester enfoca mas riba brinda servicio corecto y di nivel en bes di wanta score di cuanto biaha nan ta contesta cliente “NO”.

www.Trempan.com 9 di Mei 2022

Share on social media

Facebook
Twitter
LinkedIn