Ma taha: Keda sin vacuna y…
July 26th, 2021
Algun siman pasa mi a presenta ehempelnan di casonan den corte den exterior pa locual ta trata e posibel opcionnan pa esunnan cu tin un trabou pero ta nenga di vacuna contra Covid-19 sin cu por mustra un riesgo concreto pa nan salud. Tabatin basta reaccion riba e articulo. No tur hende tabata di acuerdo cu e argumentonan presenta. Esey ta normal. Locual ta curioso ta e contenido di cierto di e comentarionan y con lihe cierto hende ta bira emocional y te hasta ta recori na palabranan ofensivo. Un ehempel di esaki ta un empleado, “terminal services officer” na nos aeropuerto, Aruba Airport Authorithy, Giancarlo Ras, cu a haya necesario pa lansa ofensa den direccion di mi mama cu a fayece y mi persona uzando palabranan cu mi ta sigur no ta wordo tolera na aeropuerto di Aruba. E comentario ey mi ta lag’e pa su cuenta y mi a pone den file. E columna aki ta pa comparti informacion riba topiconan legal y asina contribui di e forma ey. Bo no mester lesa e columna, e ta opcional. Tampoco mi ta mira pakiko hendenan adulto no por tin un intercambio na cierto nivel. En fin, na esunnan cu ta sigui e columna aki, danki pa sigui comparti y pa e feedback positivo
Caso na Corsou
Siman pasa corte na Corsou a dicta un sentencia cu a hala hopi atencion. Den e caso specifico aki y basa riba argumentonan presenta, corte a bisa dos cos:
- Un retiro di inmediato (ontslag op staande voet) NO ta hustifica den caso cu un trahado nenga di tuma e vacuna contra Covid-19; y
- E hecho cu un empleado ta nenga di tuma e vacuna por trece un cambio den e circunstancianan na trabou cu por trece cu ne cu corte por disolve e relacion di trabou.
Kico a hiba na esaki?
Vooral e ultimo aspecto aki a hala hopi atencion. Awor pa mijnheer Ras di aeropuerto compronde, no ta ami a dicta e sentencia, sino ta Corte di Prome Instancia di Corsou a duna e opinion aki. Y kisas ta bon pa analisa cua ta e factornan of elementonan cu a hiba n’e decision aki. Corte a considera di un banda e hecho cu no tin un obligacion legal pa vacuna y di otro banda e obligacion legal di un doño di trabou pa protege su empleadonan y otro nan contra contagio di Covid-19. Esaki kiermen cu, mescos cu e doño di trabou a haci un escogencia entre e dos aspectonan legal aki, corte tambe mester a haci esaki den e caso specifico aki y husga cua di e aspectonan aki ta pisa mas. E empleado tabatin 5 aña den servicio y durante e periodo ey su doño di trabou a paga pa varios curso di capacitacion p’e sigui desaroya su mes. E empleado tabatin 25 aña di edad. E tabata traha den un espacio di oficina hopi limita di 25 m2. E ta comparti e espacio ey cu tres otro empeado di 64, 67 y 69 aña di edad. E ultimonan aki si a vacuna. E doño di trabou a purba yega na un solucion varios biaha cu e persona y tambe a tuma extra medida pa limita e riesgo di contagio. Despues a stop di huur e espacio di oficina y a sigui traha for di cas. Mirando e situacion aki y e hecho cu e empleado no vacuna tampoco lo ta bonbini na cas di e doño di trabou, futuro di e relacion laboral ta pinta scur. Na final corte a dicidi cu tin suficiente base pa disolve e relacion di trabou. E empleado a haya un compensacion di Afl. 7,500 menos cesantia.
Sorpresa?
E sentencia no ta un sorpresa. E decision di e empleado pa no vacuna ta di dje, pero di otro banda, corte a tene cuenta cu e obligacion di e hefe pa percura pa un luga di trabou sigur pa su empleado- y clientenan. Awor e empleado en cuestion ta totalmente liber pa bay traha na un otro caminda cu si lo ricibie brasa habri y cu lo aplaudi su derecho y escogencia di no vacuna. Pa e empleado, e resultado tampoco por tabata un sorpresa. Den e desicion por lesa cu e hefe a purba varios biaha pa yega na un solucion y a bis’e cu si e no vacuna, cu esaki lo por cost’e su trabou.
Riesgo
E hecho cu e tabata dispuesto pa pone personanan di casi 70 aña di edad “at risk” door di su actonan, ta un asunto peculiar. Di otro banda, si e empelado a haya Covid y contagia un di e hendenan ey, nan lo por tuma paso legal contra dje, pasobra el a infecta nan. Por pensa riba un caso civil di daño di perhuicio of lo por entrega keho contra dje na recherche pa maltrato. Depende di con malo e persona bira, e nivel di maltrato por ta mas severo!
Nivel global
Mientrastanto e siman cu a pasa na Merca un assistant coach di e team di futbol Mericano, Minnesota Vikings, Micahle Eaves, a perde su trabou pasobra el a nenga di vacuna. Esaki pasobra NFL ta exigi vacunacion entre loke nan ta yama Tier 1 Staff. Mescos a pasa cu un coach di New England Patriots. Na Francia, presidente Macron a anuncia medidanan adicional riba e tema aki. Desde 21 di juli na Francia bo mester bo paspoort di vacuna pa por drenta teatro y cinema. Esaki lo sigui den algun siman cu biahamento, barnan y restaurant. E demanda pa vacuna a subi asina cu a haci e anuncio. Y no ta Francia so. Na Portugal y Grecia bo no por drenta un restaurant sin paspoort di vacuna. Dus bo tin derecho di come na bo cas sin vacuna pero no di bay un restaurant. Na Italia tur esunnan cu ta traha den cuido mester vacuna of nan lo perde trabou. E paspoort di vacuna ta necesario pa por drenta clubnan nocturno y otro eventonan unda tin aglomeracion di hende.
Y awor?
Cu e sentencia na Corsou kisas nos lo mira mas caso bin dilanti. Vooral awor cu e cifranan di contagio a cuminsa subi atrobe. Corte lo mester evalua cada caso riba su mes. Den caso di trabou den oficina, tienda, hotel, cuido, aeropuerto of restaurant, mi ta kere cu corte lo sigui e liña di Corsou. Pa un empleado cu ta traha pafo den aire liber of cu ta traha exclusivamente virtual of isola, esaki por ta diferente. Tempo lo dicidi. Si bo kier lesa ful e sentencia: https://uitspraken.rechtspraak.nl/inziendocument?id=ECLI:NL:OGEAC:2021:132. Mientrastanto sigui cuida curpa y mi ta desea tur hende hopi salud y bendicion.