ATL

Mi avion

Nos baranca tan stima ta rondona di lama. Nos prome bishitantenan manera e Indjannan, Alonso de Ojeda y e driekielnan tur a yega nos isla via lama. Awendia e trafico aereo ta mas comun y mas accesibel. Sin e comunicacion aereo ey nos no por imagina un Aruba manera nos conoce awe. Por caracterisa avion como un ekipo mobil. No manera un telefon celular pero si como un ekipo cu pa motibo di su mobilidad merece extra atencion pa su aspectonan huridico. E columna di awe lo trata e topico aki.

Tratado di Capetown y ekipo mobil

Ban cuminsa cu e terminologia ekipo mobil. Esaki ta ekiponan cu pa motibonan di nan balor halto, nan  caracteristicanan y nan uzo no tin un locacion fiho. Por pensa, por ehempel, riba avion, motornan di avion, helicopter, trein y satellietnan. Tur e cosnan aki costa cen y mester financia nan di un manera of otro. Bo banco local lo no tin ningun idea di con pa haci esaki, los cu nan lo no tin e forsa financiero necesario pa financia e ekiponan mobil menciona. Di otro banda, esey no ta nan negoshi tampoco. 

Jet priva

Pa trece un tiki den perspectiva e avionnan cu ta cay bou di e categoria aki, no ta un avioneta cu ta uza pa bay Punto Fijo bin bek. Nos ta papiando di fabricantenan manera Gulfstream, Boeing, Embraer, Dassault y Cessna. Si nos papia di price range nos lo ta papiando di anywhere entre Afl. 3.5 miyon pa Afl. 175 miyon. Tur cos ta depende di bo gusto y e mision cu bo tin pa bo avion. Tin hende no tin mester of kier un avion cu un rangehopi largo mientras juist otro kier esey. Esun kier biaha cu 6 hende comfortabel mientras un avion presidencial ta carga 75 hende mientras e presidente tin su mesun camber, comedo, baño y oficina abordo.

Lening of lease

Awor cu un tiki idea di e prijsnan, ta mas comprendibel kisas pakico e avionnan aki mester di financiamento. Sea den forma di un prestamo of den forma di un lease. Bou di tur dos scenario esun cu ta financia lo kier tin un of otro manera pa protega su mes. After all, manera bo entrega e ekipo na e cliente, e ta bula bay, letterlijk. Pa yuda stimula, structura y regula e financiamento aki, a bin cu e Tratado di Capetown y ekipo mobil. Esaki ta conta solamente pa paisnan cu ta miembro di e tratado.

Nos tambe … polaga

Aruba tambe ta parti di e tratado aki. Reino Hulandes a ratifica e tratado aki pa pais Aruba y pa pais Antia dia 1 di september 2010. Dia 10 di october 2010 o sea “10-10-10” e tratado a bira valido pa pais Corsou, Sint Maarten y pa e islanan BES. Esaki na rason di un iniciativa di un abogado local cu ta activo den e ramo di aviacion. E guy ‘ki a pusha e idea, a duna conseho y a pusha e proceso cu e gobiernonan di Aruba, Antia y di Hulanda pa por a yega asina leu. Porcierto, esaki tabata e prome biaha cu Reino Hulandes, riba peticion di e islanan, a ratifica un tratado. 

Normal Reino Hulandes ta hinca e islanan den tratado solamente ora cu e ta un obligacion internacional cu Reino Hulandes mester cumpli cu ne. Pa tratado cu ta trece beneficionan economico, por ehempel e tratadonan fiscal cu ta haci Hulanda sede di compania multimiyonario manera Starbucks y Booking.com, e ora Hulanda no ta hinca e islanan aden. Tambe “pasobra e islanan ta autonomo y nan mes por cera tratado cu nan kier”. En todo caso, e tratado aki ta pone cu Aruba ta un pais atractivo pa structura di financiamento di avion y otro ekipo mobil. Esaki kisas ta un bon ehempel di con sector publico por zorg pa un infrastructura adecua pa asina sector priva por opera y produci sin cu esaki ta costa e sector publico placa. Ademas, na aña 2009, Aruba formando parti di Reino Hulandes, a pasa e audit cu e organisacion www.icao.org a haci riba tereno di aviacion. Danki na esaki Aruba a mantene su status di categoria 1.

Tratado di Chicago

Cumpra of financia un avion ta facil. Poco cen bo mester. Awor, pa por bula e avion ey bo mester cumpli cu poco rekisito. Esakinan ta similar na tur pais. E reglanan aki tur ta basa riba e Tratado di Chicago. E tempo ey, na aña 1944, un total di 54 pais a bin hunto pa carga e iniciativa aki, o sea pa bin cu reglanan internacional pa aviacion civil. Mester bisa cu 52 di e 54 paisnan a basha firma pa duna e tratado aki, no solamente bida, pero tambe un base amplio pa asina sigura su efectividad y su exito. E reglanan aki lo mester a forma un base pa tur pais traha nan leynan domestico na nan manera, pero teniendo cuenta cu e tratado.

Aviacion civil

E palabra “civil” den aviacion ta haci e distincion for di aviacion militar. Pa aviacion militar tin otro regla. No ta cu aña 1944 tabata net na final (of rond) di e di dos guera mundial. Mundo tabatin mester di un impulso grandi pa recupera y aviacion civil mester a hunga un rol importante den esaki door di transporta hende y carga.

Y nos awo?

E Ordenansa di Aviacion di Aruba tambe ta basa riba e Tratado di Chicago. Eyden por ehempel ta regla cu cada avion mester wordo registra na un pais. No por tin avion spirito, o sea cu no ta registra ningun caminda. Di otro banda, un avion no por tin dos registro valido pareu. E origen di e rekisito di registro aki tambe ta bay bek den tempo di guera. Ora den tempo di guera mi ta bulando mi avion di forsa aereo di Aruba y mi topa un otro avion, sea si mi ta bulando over of bou di dje, mi mester por mira e marcanan di registro riba of bou di su halanan of na su rabo (pesey e expresion tail number) pa mi por reconoce y sa si e ta amigo of enemigo. Awendia e aspecto visual ta hunga menos rol pero si e registro ta sirbi pa reconoce y tin un registro di cada avion. Asina ta yuda organisa y haci posibel pa por controla aviacion civil. Aruba tin diferente elemento cu ta haci registro di un avion na Aruba masha atractivo. Pero no ta Aruba ta e unico Coca Cola den desierto, ni tampoco e miho. Na Europa. por ehempel na Irlanda, Malta y Isle of Man, nan ta hopi activo riba e tereno aki. Cada un cu nan mesun business model y sabor y tur, mescos nos aki, cumpliendo cu reglanan vigente na beneficio di aviacion civil en general.

Share on social media

Facebook
Twitter
LinkedIn