ATL

Nos tambe ta den e saus. Russia, Ucraina y Aruba

March 28th, 2022

Hopi di nos tabatin un niñes diferente cu nos yiunan awendia. Cu tur su bon y tur su malo. Pero nos muchanan awe mester a pasa door di un pandemia y pa despues cay den un invasion di Ukraina door di Rusia. Covid-19 a disparce y awor ta misil cu tanki y soldaat nan ta mira den nan Tik Tok stream. Asina nan ta keda al tanto di e desaroyonan leu aya banda. Tin di nos adultonan no a ni hik y a sigui bida manera nada pasobra na fin di dia “no ta mi problema”. Wel, e ultimo pensamento aki no ta totalmente corecto pasobra kisas nos no ta mira ningun tanki di guera of misil aki banda, pero mi por sigura bo si cu nos, como pais, tambe ta hinca den e saus aki. Sigui lesa y lo mi purba aplica. Ta bon si pa tene cuenta cu e tensionnan entre Rusia y Ukraina no a nace awor despues di Covid. Desde 2014 caba Conseho Europeo a impone un serie di medida restrictivo contra Rusia (lesa: persona, compania of institucion) pa via di actonan Ruso cu ta mina e integridad teritorial, e soberania y e independencia di Ukraina. Esaki ta formula hopi diplomatico pero crioyamente bisa, nan a stoot Rusia cu poco medida den su body. Den prensa internacional ta papia di “sancion”.

Conseho Europeo a actua

Na 2014 caba Europa a saca un schouder pa Ukraina. E sancionnan di e tempo ey tabata poco light pero si tabata un inicio di aplicacion di un tipo di guera cu tin un caracter mas economico y menos militar. Awor di e tempo ey algun Ruso a cuminsa sinti e sancionnan. Kico Europa a haci? Banda di nan sancionnan, a bin cu un lista di nomber di hende y di compania cu tin un relacion cu Rusia of cu gobierno Ruso. Wak e manera un lista preto. Si bo nomber ta riba e lista, tur e sancionnan cu Europa a impone ta aplica pa bo.

E sancionnan

E sancion riba nan mes no ta un castigo. Nan ta medidanan restrictivo cu ta diseña pa ta temporal y pa tin un efecto preventivo y ta parti di e hermentnan uza pa Europa pa por cumpli cu un maneho of yega na un cierto obhetivo. E ta parce poco kisas e faha (of “la chancla”) of e faha cu bo mester a wanta “pa bo siña”. Aunke faha sa cay tambe como castigo. Ey por nota cu e liña entre “medida preventivo” y “castigo” den practica por ta hopi cerca di otro. Por impone sancionnan ora tin violacion serio di derecho humano pero e no ta tuma luga como persecucion penal, sea den corte di e pais en cuestion of sea door di corte internacional.E sancionnan en general ta:

  • Sancion dirigi na persona of entidad manera freeze fondonan of obhetonan, haci recursonan economico no accesibel y nenga entrada na un pais Europeo.
  • Medidanan financiero cu ta bay mas leu manera prohibicion di participa den transacionnan financiero of nenga un pais credito. (No confundi esaki cu ora Hulanda ta nenga di duna Aruba sosten di likides, esey ta algo ful otro).
  • Prohibicion di importacion/exportacion di arma, material militar y productonan cu por uza priva of pa uzo militar.
  • Prohibicion di importacion/exportacion di cierto producto, programa of tecnologia.

Ta depende di kico ta impone den e resolucion Europeo ora di emiti esaki di con leu e medidanan aki ta bay cada bes cu e Conseho Europeo los un set di sancion. Na 2014 ora e Conseho Europeo a emiti medida, a pone un anexo na e medida y ey a pone  esun cu ta persona of entidad sanciona.

Februari y maart 2022

Luna pasa ora Rusia, uzando su argumentonan of hustificacionnan, a crusa frontera di Ukraina cu forsa militar, ekipo militar y cu atakenan aereo. Intencion tabata pa pasa raspa nos brothernan Ukraino y tuma over manera nada. Pero el a dal den duro. Di un banda e Ukrainonan a para, a lucha y te awe ta luchando pa nan pais. Compara kisas cu nos bisiñanan pazuid ey unda masha hopi mes a sali na careda pa exterior y for di e comodidad di nan penthouse a protesta contra e regimen. Pero ban laga nan afo. Paisnan manera Europa, Inglatera, Suisa y Merca a lansa un serie di sancionnan hopi pisa contra Rusia, como pais pero tambe contra un gran cantidad di politiconan Ruso, companianan Ruso y ciudadano Ruso. Locual esunnan aki tin den comun ta un of otro relacion pega cu e Kremlin. Kremlin ta unda e presidente di Rusia, Vladimir Putin, ta sinta. Ademas di a implementa mas sancion, a haci e anexo 1 mas largo. Di februari pa awor tabatin varios biaha cu Europa a mula e mokel mas y a keda agrega mas y mas hende na e lista.

Pero nos ta leu toch? 

Na aña 2006 caba Aruba a conoce e Ordenansa di Sancion. A base di e ley aki Aruba tambe tin rol pa cu temanan di sancion. After all, nos no ta biba nos so riba e planeta aki, aunke hopi di nos ta pensa cu mundo ta draai rond di Aruba. Desde e tempo ey, por ehempel, Aruba a emiti sancionnan specifico contra por ehempel Libia. Na 2014 tambe en conexion cu Ukraina. Awor bou di e structura di 2006, Aruba mester a implementa decretonan (LBHAM) ora cu Europa a tuma medida. Sowieso nos legisladornan no ta conoci pa tin mucho speed (of conocemento) y e parti cu ta toca gobierno tambe por sufri retraso. Sea pa falta di capacidad of sea pa motibo di otro prioridad. Di otro banda como cu Hulanda si tin cu cumpli cu e medidanan Europeo na tempo y sin hi, ni ha. Gobierno di Reino na juni di 2016 a pasa un Ley di Reino (Rijkswet) caminda a stipula cu manera Union Europeo of Nacionnan Uni tuma un medida, cu automaticamente esaki ta conta pa Reino Hulandes completo, dus tambe pa Aruba. Aki nos no tin nada di bisa. Pero tampoco mi ta wak pakico si Aruba lo mester tin un rol den esaki. Ademas e ta trata un tema di relacionnan exterior y esaki ta den man di Reino, no di Aruba. Pa Corsou y Sint Maarten ta conta mescos. Boneiro, Saba & St. Eustatius sowieso ta aden pasobra nan ta forma parti di Hulanda. 

Saus

Esaki kiermen cu e sancionnan tuma recientemente ta mara Aruba tambe y esaki kiermen cu Gobierno, Banco Central, Corte, Camara di Comercio, notarionan, abogadonan, car dealers y tur otro cu ta cay bou di supervision di Banco Central mester ta alerta y check bon pa nan no viola un of mas di e sancionnan aki. Cu otro palabra, nos ‘ki banda tambe ta den e saus di sancionnan.

Share on social media

Facebook
Twitter
LinkedIn