Parti 2: Un dia mas of menos? Ora di herencia

Siman pasa

E base, den e caso aki e echonan y e circunstancianan pa e columna di e siman aki, ta den e columna di siman pasa di dia 12 di april 2022. Esaki tabata diamars en bes di dialuna door cu dialuna tabata di dos dia di Pasco Grandi y no tabatin edicion di Trempan. Si bo a miss esaki, check bo Trempan di dia 12 di apil of wak e tambe na https://bit.ly/3vxKcJv. E intencion ta pa uza e contenido antertior pa duna mas color of background na e caso ficticio aki. Ban p’e.

Mama cu papa desilusiona

Despues di tur e tangana cu tabatin na cas, e pareha aki a keda desilusiona con cada yiu a actua. Tanto cu nan a haci nan best pa duna nan tur cos y pa nan lanta hunto manera ruman. Nan a pensa cu cos lo bira pio so si mañan, cu Dios kier, nan mester bay parti herencia pasobra ni un bonchi nan por pela hunto. Nan a dicidi di pidi un cita cu nan abogado y columnista faborito pa wak ki opcion nan tin. E dia a yega y compaña cu un pandushi y un boca di koffie nan a discuti e tema. Siman despues nan a bin bek hunto y e pareha a dicidi cu, si no tin herencia, tampoco lo por tin pleitamento. Haciendo uzo di e ley nobo, nan a dicidi di deshereda tur cuater yiu. Antes esaki no tabata posibel, pero awor si! Nan a laga formalisa esaki y a sigui cu nan bida normal. Namora di otro mescos cu dia nan a casa casi 70 aña pasa.

Beneficio den e caso aki

Nan a pensa cu, haciendo esaki, nan ta soluciona diferente problema. Na prome luga no tin pleito mas, pasobra no tin nada mas pa pleita p’e. E yiu mayor di “Aruba nooit meer”. Wel, lag’e keda trankil aya na tera friu cu su pareha. Di mes nunca nan tabata mucho eens cu e situacion ey. E yiu muhe sowieso kier a duna su parti na misa, wel ya cu e no ta kere den nada material, e lo no sinti falta di e herencia tampoco. E ruman cu ta den mal caminda tambe lo keda man bashi y lo no haya ningun cen pa e bay gasta riba porkeria. Miho asina! 

Pa locual ta e otro yiu cu ta cu nan den cas, a bira tempo cu e tambe para riba su mesun pia y e busca un muhe p’e casa cu ne. Nan a dicidi di pone tiki placa un banda p’e. Con cu bay bin, e ta compaña y cuida nan. Cualkier dia esey por yud’e bay dilanti. Pero nan a pone un condicion cu si un di nan muri, anto e yiu no trata esun cu a keda atras bon, cu e placa ey ta bay stret pa nan parokia pa asina yuda misa yuda otronan. 

Un stap mas leu

Pa e siguiente parti mi ta bay asumi cu e yiunan no a wordo deshereda y cu tampoco nan tin un testament.

E mayor cu biba mas largo

Pa nos por papia di herencia, nos mester di un defunto. Den e caso aki, pa asumi cu e tata di e famia ta prome cu a bay sosega. E mama e ora, pa ley, ta esun cu a of ta biba mas largo. Esaki ta relevante pa e posicion, di den e caso aki e mamam pasobra a menos cu e homber a laga un testament atras cu ta determina otro, e mama desde 1 di september 2021 ta hereda tur cos!

Kico? E mama ta hereda tur cos? Y e yiunan awor?

Si, si acaso e homber no a traha un testament “saltando” e mama, e ora e muhe ta hereda tur cos. Esaki ta inclui e derecho di biba den e cas matrimonial te dia e cera su wowo y e mag di dispone di tur pero tur cos. E yiunan stima mester dobla, sinta y warda te dia mami cera wowo pa e ora nan bay parti locual a keda atras. Esaki ta parti di e ley nobo cu ta na vigor awor aki y desde 1 di september 2021. Awor esaki no kiermen cu e yiunan no ta heredero, locual e kiermen ta cu mami ta bira doño di tur cos – lusten en lasten – y yiunan ta haya un claim riba e mama pa nan parti. Nan no por cobra esaki te dia mami muri of cu declar’e failliet. Aki atrobe e yiunan lo haya daks den wowo! 

E tercio aya

Awor riba su mes esaki kisas no ta nada malo pa e yiunan. Awor e chens semper ta existi cu mami ta haya un yoncuman – kisas un yambo bieu – cu lo sa di consol’e y comparti bida cu ne. Door cu bida ta cortico, nan por hasta bay Las Vegas casa y dal un honeymoon di biaha ey! E ultimo aki kisas lo por dun’e “conseho” di con pa inverti su placa of pidie pa e para borg pa un of mas fiansa. Si esaki ta e caso, e yiunan por haya sa mañan cu tin beslag riba e cas of cu e cuenta di banco ta basta gedeuk of te hasta mal den cora mientras cu e tercio, in the meantime a laga cay dia bieu y a bay tras di otro “amor”.  

Awor damas, prome cu boso cuminsa manda hatemail, hate comments, etc, corda cu ta un ehempel ficticio esak. Obviamente boso nunca lo haci algo asina. Ademas, e ehempel ta conta mescos cu si e mama a muri prome. Den e caso ey, djis cambia e palabra “tercio” pa “mamasita” y agrega cu e tata a casa na Medellin y adopta un par di yiu di e muje na Colombia y ta cla. Den e caso aki por yama e homber pa ‘tur sorto di nomber’.

Macho pensa bo bon

Awor kisas den mi ehempel e homber a muri y a laga placa atras y e mama ta responsabel y serio, cu no tin wowo pa otro “amor” cu ta bin cu mal intencion y tampoco e no tin e tendencia di gasta placa pa loco of cu no ta vulnerabel di wordo estafa door di mal influencia. E ora kisas abo macho trahado bo no mester worry cu e patrimonio cu bo a traha pe, cu intencion pa laga esaki pa bo yiunan, lo no yega su destino. Tambe kisas e yiunan mes no ta interesa mes den herencia pasobra nan mes tin nan cen y nan ta satisfecho cu locual abo como tata a haci pa nan durante bo bida y manera cu a sa di stima nan. Awor, si esaki no ta e caso of kisas just in case somewhere somehow bo tin un duda cu ta molestiando, anto kisas ta bon ora pa busca conseho cerca bo abogado faborito of cerca un notario of un estate-planner y informa bo mes ki otro opcion bo tin. 

Un tip: Bay bo so asina bo por haci bo preguntanan liber y bo no lanta cacho for di soño. Si bo no take action anto ruman e ora por ta laat. Cualkier discusion cu ta envolvi placa y emocion, tin e dos ingredientenan principal pa e discusion ey bruha pio cu un nasi goreng.

Y pa e damanan potente, excelente, fabulosa, independiente, etc., etc., ta conta mescos. E patrimonio cu bo a traha pe, cu bo a acumula cu e sodo di bo frenta, pensa bon si bo ta confia cu esaki lo yega na bo yiunan y no end up na Colombia. Informa bo mes y planea e asunto bon.

www.AboutTheLaws.com

Si b’a perde un columna of kier wak otro publicacionnan di mi, incluyendo mi bukinan riba temanan civil of laboral, bishita mi blog libremente.

Lesa tambe:

 “Wak bon ora dos wowo cera” – bit.ly/3MuWUQ3