ATL

Privacidad, secrecia y transparencia

December 13th, 2021

E tres palabaran den e titulo kisas ta parce otro. Di otro banda, nan cada un ta diferente y cu nan mesun nificacion. Kisas e no ta cla pa tur hende, pero mi tin e impresion cu vooral nos politiconan ta gusta uza of mal uza e terminologia aki. Awor lo mi por sugeri cu nan lo mester sa miho como politico, pero mester tene cuenta cu e nivel di educacion memey di politiconan no tur ora ta masha halto, mientras esunnan cu si ta educa tin e tendencia di mal uza e conocemento aki ora ta cumbini nan so.

Privacidad?

Nos constiticuon a drenta na vigor dia 1 di januari 1986. Articulo I.16 inciso 1 di nos constitucion ta bisa cu nos tin e derecho riba proteccion di nos privacidad. Den e inciso 2 ta para cu, a base di un ley, ta nos pais lo zorg pa bin cu reglanan pa pa proteha nos privacidad pa locual ta trata registra y comparti informacion personal. Si nos wak esaki bon, por ripara cu e tema di privacidad riba su mes den nos constitucion tampoco ta limita. Ta trata privacidad pero solamente pa locual ta  trata registra y comparti informacion personal. Parlamento ta e organo cu mester a bin cu ley pa regla e tema di privacidad. Esaki a tuma luga pero parlamento mes a dura mas cu 25 aña pa bin cu un ley asina. Pa un tema cu ta mustra asina importante, ta bisto cu parlamento no a “give a damn” mucho. En fin, e ley a bin y yama Ordenansa Registro di Persona. E titulo riba su mes no ta straal uit hopi di e tema di privacidad. E ley aki ta defini e registro di persona como: 

“un coleccion di dato di diferente persona cu ta wordo maneha via un sistema automatisa of cu ta wordo colecciona cu e obhetivo di por consulta e datonan aki den un forma eficiente”

Ademas ta defini datos personal como:

“un dato cu por ‘trace back’ na un persona individual” 

Locual e ley aki ta bisa ta cu un regsitro di persona of su datonan cu por trace back na un persona, por ehempel un number di paspoort, un number di cedula of un persoonsnummer mag wordo haci solamente cu un proposito rasonabel di banda di esun cu ta crea e registro of database aki. Pero esaki no mag di ta contra ningun ley, ni orden publico ni contra moral. Si ta esaki ta locual e ley ta regla anto hopi lihe nos ta yega na e conclusion cu e termino legal di privacidad ta cubri hopi menos cu kisas locual nos ta pensa ora un hende bisa cu nan ta invadi su privacidad. Locual e ley ta proteha ta con e datonan ta wordo registra y ki ora mag of no. Cu nan papia di bo of publica bo nomber den media no ta parce di cay bou di e ley aki. O sea, ora un gobernante bisa cu e no ta menciona nomber pa motibo di privacidad of cu ta lamenta cu un documento a leak pasobra ta contra e privacidad di e personanan, no ta referi na e ley aki.

Secrecia y transparencia

Esaki tin dos aspecto. E parti priva y e parti publico. Un banco por ehempel kisas ta warda e infomacion di su clientenan secreto y kisas tin un bon motibo pa haci esaki. Aunke cu nos leynan no conoce un ley pa secrecia di banco. E decision ey ta un decision di e banco y ta un tema di e accionistanan y e gerencia di e banco. Otro hendenan no tin derecho di pidi informacion na e banco. Awor, ora ta trata e parti cu ta toca e aparato publico, e cos ta otro. Awor claro cu den un gobernacion semper por y lo tin secretonan di estado, pero esey ni kiermen cu tur cos cu un gobierno haci ta un secreto di estado of un secreto. Pa locual ta otro temanan, gobierno tin un obligacion di haci esaki publico o sea transparente na momento cu esaki ta den interes di bon gobernacion y democracia. Poco lo ta e momentonan cu ta maneha  informacion of decision cu lo mester wordo teni secreto o sea den e mayoria di instancia di gobierno lo mester di ta transparente cu informacion, a menos cu e informacion por perhudica siguridad nacional of lo por destabilisa gobernacion.

Ley anticua y Ley Europeo

A tarda 25 aña pa bin cu un ley di registro di datonan personal na Aruba y e ley ta laba laba 13 articulo. Na Corsou y Sint Maarten a modernisa e ley na 2015 y tin mas cu 60 articulo. Pa e islanan BES tambe tin ley moderno. Conclusion: Atrobe Aruba ta e ultimo den klas di Reino. Ta parce cu nos tin un parlamento cu ta of floho of cu ta bezig cu tur sorto di cos menos cu trahamento di ley. Mientrastanto, e ley Europeo di privacidad – e GDPR –  ta conta na Europa pero tambe ta aplicabel riba residentenan Europeo cu ta pafo di Europa por ehempel e Hulandes cu tin un condominio of cas na Aruba pero ta biba permanente na Hulanda. Kisas tin hende of organisacionnan cu no ta realisa esaki ora di atende cu dato di e personanan aki te dia nan haya un cayente for di Europa.

E bisiña y e brievenbus

Aruba ta keda atras riba e tereno di privacidad, pero no worry cu of sin ley e señora bisiña fastioso cu ta gusta redo lo biba bo bida mescos. E bisiña ey si ta un menasa pa bo privacidad mescos cu e famoso “brievenbus” ta un menasa pa e “privacidad” di nos politiconan.



Share on social media

Facebook
Twitter
LinkedIn