ATL

Problema? Ban regla cos via mediacion

September 27th, 201

Problema t’ey den tur skina. Diferencia di opinion na granel. Awor berdad si no tabata pa esey, mi profesion lo no ta existi. Pero di otro banda, nos por haci e pregunta si ta abogado y corte mester resolve tur diferencia di opinion? Den e columna di awe mi lo elabora riba posibel otro manera pa regla cuenta.

Problema = kort geding! of?

Ora tin problema anto acerca mi, hopi biaha e prome cos cu e cliente ta bisa ta, cu e kier dal e brochi cu a dal e un cara abou, ban cu un kort geding. E ora mi ta splica cu no ta tur ora por cu un kort geding y cu lanta un kort geding no ta mescos cu hospital ta parti paracetamol pa tur cos. Ban laga e kort geding un banda pa awor.  Den esencia, problema huridico ta draai rond di placa. Ken debe ken y cuanto precies. Of e ta draai riba mishimento of te hasta grapa cu un derecho. Awor, banda di esey, hopi biaha ta sirbi un problema asina den un saus di emocion y sentimiento. Kiermen no solamente e placa of e derecho, pero storianan manera: El a horta mi of ami a haci hopi p’e anto esaki ta e manera cu e ta paga mi of m’a confia den dje, etc. Tin biaha por hasta parce cu e “feelingnan” ta hasta mas importante cu e placa of cu e derecho mes.  E ora kisas por haci e pregunta: kico mi echt kier? Haya mi placa bek? Mi derecho? Causa daño bek? Of kisas drecha e cos? Haci e preguntanan aki kisas ta bon pa reflexiona poco prome cu bay guera. Tambe ta bon pa analisa si bo bay corte y considera e tempo, energia y gastonan cu esaki ta trece cu ne, si echt bo kier cana e caminda ey. Y corda cu na final, e por ta manera tira un pinalti…of e ta bay aden of e ta bay afo. Den corte masha poco wega ta empata. Ta sali un ganado y lo tin un perdedo

Mediacion

Awendia tin otro forma pa soluciona diferencia di opinion. Un di e metodonan ta mediacion. Esaki ta un proceso unda dos partido ta acerca un persona (of un instituto) pa e intermedia den e conflicto cu nan tin. Cu partidonan dal e paso aki ta di aplaudi. Tin biaha un hues mes ta manda partidonan pa medicacion si ta mira cu esaki lo por beneficia partidonan mas. No ta tur abogado tin aprecio pa mediacion.

  Elementonan di mediacion 

Tin algun elemento cu ta esencial pa un mediacion.

  1. E mediado mester ta imparcial y mester evita cualkier señal di posibel parcialidad
  2. Partidonan mester ta dispuesto pa cana e caminda aki y tum’e na serio
  3. Mediacion ta mas un ciencia cu un arte

Pa locual ta e ultimo aki, lo siguiente. Mediacion ta un disciplina riba su mes y cu ta conta cu su mesun regla, norma y hasta acreditacion. E proceso aki ta resultado di hopi estudio y cu a perfecciona cu tempo. E proceso ta inclui cu partidonan memey di nan diferencia di opinion, ta para un rato, baha tur arma y firma un acuerdo di mediacion. Den e acuerdo aki ta stipula e reglanan di mediacion. 

Scol di bida, experiencia, bla bla

Mi ta enfoca riba esaki pasobra hopi biaha por scucha hende ta critica profesionalnan, argumentando cu papel no ta tur cos y cu esun cu no tin e preparacion ta bati riba su pecho cu e si a bay scol di bida. Wel ruman, nos tur cu of sin diploma ta na bida y a bay scol di bida, no esun grupo ey so. Experiencia ta di aprecia. Pero si un hende ta bay uza su “experiencia” (of creencia) en bes di un proceso di mediacion profesional, kisas e por resolve e diferencia, pero kisas e por haci mas daño cu bon!

E proceso y resultado

Asina cu e proceso cuminsa, ta keda na e partidonan, guia pa e mediado, pa yega na un solucion pa nan diferencia di opinion. Den corte e enfoke ta competitivo, o sea pa gana. Den mediacion e ta poco diferente. Aki e enfoke por ta pa pone e diferencianan un banda – kisas no tur – pero pa yega na un resultado unda cu ambos partido por biba cu e solucion y cu ademas por permiti e partidonan pa despues di esaki por sigui padilanti, sea hunto of den un forma cu no tin enemistad mas. Si acaso partidonan no por sali afo, por termina e mediacion y e ora sigui cu e proceso na corte. Den caso di un mediacion profesional, e contenido di e mediacion ta privilegia y no por uz’e den corte. Den caso di un mediacion, estilo di e scol di bida (so) of experiencia, e privilegio aki no necesariamente ta conta.

Bo kier purb’e?

Mediacion ta posibel na Aruba tambe. Corte tin un lista di mediadonan profesional cu corte sa uza. Un ehempel di un mediado certifica ta Edwin na VB Mediators https://vbmediators.com/. Recientemente Doc Opledingen a duna un curso cu ta prepara hende pa certificacion. Si bo mester un guia, por contact Gomez Coffie libremente y nos lo yuda bo cu e proceso.


Share on social media

Facebook
Twitter
LinkedIn