Ta busca driver independiente! hmmmmm……
Ta busca driver
Ki dia ey m’a mira un post riba Facebook di un servicio cu ta busca “driver independiente” pa haci deliveries. Segun mi, deliveries di cuminda. M’a duna un comment cu e concepto di un “driver independiente”, o sea un driver cu no ta den servicio di e compania, probablemente no lo traha na Aruba. Tampoco si ta “part-time”. Awe lo mi comparti mi pensamento riba e topico aki.
Pandemia
Laga mi cuminsa pa aplaudi con nos comercio y nos hendenan a adapta durante pandemia, unda nos por a nota entre otro restaurant, supermercado, wholesalers a incorpora servicio di delivery of entrega te na nos porta di cas. Si nos por a combina esaki cu pago online lo tabata fantastico, pero como cu nos como pais no a innova riba e tereno ey, nos mester a sigui paga cash, tuma riba cuenta of paga via banco y manda prueba di pago pa asina toch haya nos producto. Jammer, pero esey ta algo cu nos tin cu biba cu ne como pais subdesaroya, riba entre otro e tereno di e-commerce. Pero OK, nos tin hopi otro cos manera nos beachnan, nos biento y hopi otro cos great mas.
Delivery service
Ora e oferta pa entrega, por ehempel cuminda na cas subi, e demanda pa e servicio di entrega tambe ta subi. Claro pasobra por ehempel un restaurant normal no tin un fleta di auto standby pa haci delivery tampoco un cantidad di drivers. Vooral cu hende na cas cu auto y cu mester entrada, e ta parce un match natural pa e partidonan aki yega hunto y soluciona e problema. Awor, si nos mira rond di nos na Merca tin UberEats, na Colombia tin Rappi y na Europa nan conoce Deliveroo, e no mester ta hopi dificil pa haci algo asina tambe na Aruba y segun mi tin un of mas. Awor mi ta bisa acerca tambe cu mi no conoce nan modelo di negoshi pero mi ta duda cu nan lo a inverti den un fleta di auto y tuma cantidad di hende den servicio “djis” pa haci deliveries. E modelo mas comun ta, di uza un driver independiente, o sea un hende cu rijbewijs, cu su mesun auto y cu un celular di Digicel pa asina esaki por ta disponibel pa ricibi order di un restaurant, bay busca e order y entrega na e cas di e cliente.
E ta make sense
Ami ta haya cu e ultimo aki ta make sense. E restaurant ta gana, e driver independiente ta gana y esun cu a bestel ta gana. Pero ora tin algo cu ta mas of menos mustra bon semper bo ta haya hende cu mester mete la pata, critica of daña cos. E biaha aki mi no ta papia di un ehempel di Aruba pero un di Hulanda, asina ta ‘relax bo juice’ y sigui lesa trankilo.
Con e ta na Aruba?
Na Aruba nos conoce differente tipo di servicio. Nos conoce compania di entrega cu a inverti den auto y den trahado, cu ta cera un contract cu un restaurant of otro compania, pa tuma tur servicio di entrega for di nan. Den cierto forma e restaurant ta sub-contrata e servicio di entrega na e compania aki y ta paga nan direct. Claro nan ta conta e gasto aki den e prijs final di e nan producto. Pero, tin e mesun sistema internacional tambe, den cual restaurant, supermercado of hasta pizzeria, ta busca chauffeurnan sin compromiso cu ta bin cu nan mesun auto full tank, tin un rijbewijs y ta entrega, por ehempel pizza, y ta gana algo extra y ta haya tip di e cliente. Nan no ta den servicio di e restautant, sino ta haci esaki simplemente pa “gana algo extra”. E di tres por ta un compania cu a busca drivers independiente anto e restaurant ta avisa e compania anto e compania ta manda un driver busca y entrega.
Deliveroo ta un servicio Britanico di delivery di cuminda cu ta opera entre otro tambe na Hulanda, Belgica, Francia, Italia, Hong Kong y Kuweit. Nan tin contract cu restaurant y ami y abo por registra cu nan como driver. Nos ta traha ora nos kier y nan ta paga nos cada dos siman, plus nos tin chens di suta extra placa na tips. Cu algo asina, hopi den e paisnan ey lo por gana poco cen extra. Pensa tambe riba, por ehempel, e muchanan na cas cu ya tin rijbewijs of e mama of e tata cu den su tempo liber kier gana poco cen extra pa yuda sobrevivi cu e costo di bida di awendia.
Grupito sabi
Na un cierto momento, un grupito di drivers di Deliveroo cu a juist kies pa bay gana poco cen extra, a cera cabes y a bin cu un demanda caminda nan ta bisa cu nan no ta independent drivers pero cu nan ta empleado di Deliveroo. Cu otro palabra? nan a bolter e co’ gewoon riba e compania.
Corte
E caso a bay corte di prome instancia, apelacion y awor te hasta e ta na nos Corte Supremo. Te awor, e grupito aki a haya rason y awor recien hasta e Abogado-General di Corte Supremo den su opinion a bisa cu e tambe ta haya cu ta existi un contract laboral entre e drivernan y e compania! Awor ta Corte Supremo so por bolter e cos ainda. Mi lo no bay den mas detaye den e columna aki.
Consecuencia pa Aruba
Pero locual si mi por bisa ta, cu mirando e hurisprudencia, si mañan un of mas driver independiente bay corte contra un servicio manera Deliveroo, cu nan tambe lo gana nan caso. E ora nan lo por claim tur derecho di trahado. Belasting lo cay aden, pone aanslag riba e servicio pa loonbelasting no paga y probablemente esaki lo pone un fin na e compania y lo no por duna servicio mas na e restaurant. Consecuentemente, of e restaurant ta stop di ofrece delivery of inverti den su mes auto y driver. Masha poco lo haci esey, pasobra di mes cos ta tight caba. Esun na cas lo sali perhudica y e mes lo mester bay busca su “take-out”.
Ley?
Awor imagina bo cu bin un ley cu ta regla e cos aki vap-vap y crea un industria extra pa nos aki na Aruba? No laga mi crea speransa falso. Segun mi, un iniciativa di ley asina lo no bin. E lo ta mucho innovativo y mi no ta kere nos ta cla p’esey. Miho crusa dede warda si Corte Supremo haci algo, si no ayooo Deliveroo y tambe ayoooooo na servicio asina na Aruba!
E buki nobo di labor ta disponibel online riba e pagina https://www.aboutthelaws.com den e webshop por haci e bestelling y tambe paga cu sea credit or debit card. E
prijs di e buki ta Afl. 99.– Tin un opcion pa delivery tambe.
Messenger mi si tin cual kier pregunta.