Un dia liber legitimo of no?

http://www.trempan.com February 9th, 2021

Un dia liber legitimo of no?

E Ordenansa di Labor 2013 a encapara un modernisacion partial di nos leynan laboral. Un di e cambionan cu esaki a trece cu ne ta cu e dianan di fiesta y dianan oficial cu ta liber a wordo hinca den e ley aki. Articulo  22 ta pone un lista di e dianan aki. Esaki ta inclui dianan mane pasco, aña nobo y diabierna santo. Parlamento ta esun cu a aproba e dianan aki por medio di ley. E ley no ta duna e minister di labor e autoridad (bevoegdheid) pa determina e dianan aki. Consejo di minister tampoco tin e autoridad aki. Si gobierno kier bin cu un cambio den esaki, mester bin un cambio di ley y pasa esaki den menos cu 1 siman. Pa ta cla parlamento no por djis pasa un mocion tampoco y haci e día uno liber. Riba e dianan cu ta wordo defini den e artículo 22 menciona e empleado ta liber of si e traha e tin derecho di ricibi pago di overtime. Esaki ta ancra den ley y tur hende mester cumpli cu esaki. 

Riba un portal di noticia mi a lesa cu e minister a declara cu e ta duna dia 15 di februari liber.  Esaki ta e dia despues cu e parada grandi di carnaval lo a tuma lugar y segun ley e dia ey ta liber. Pero e problema cu e ponencia di e minister ta cu e aña aki dia 14 di februari no tin parada grandi di carnaval. Esaki ta trece cu ne cu pa ley e dia 15 di februari no (por) ta liber. Contrario na lo cual e minister a bisa segun e portal e ley ta hopi cla, a wordo modernisa recientemente y e legislador e tempo ey no a haña cu ta tin algo robes cu e texto di e articulo. E tempo ey tampoco parlamento of un parlamentario a reclama. Cu e minister no ta gusta e texto di ley por ta asina pero e minister, mescos cu cual kier otro ciudadano, no tin e autoridad legal pa cambia esaki ad hoc manera a wordo sugerí. 

Awor door cu e minister no tin e autoridad legal esaki ta trece cu ne cu su ponencia no ta crea un derecho pa un trahador di haña liber ni tampoco di cobra overtime. E doño di trabou por lo tanto no tin e obligacion pa paga overtime e dia ey y pe y su trahadornan ta un dia di trabou normal. Den mi opinion ningun trahado ni doño di trabou mester bai tras di e ponencia contra ley di e minister di labor pa asina tambe evita tension innecesario na pia di trabou. Vooral den e temponan aki cu situacion ta dificil.  Mi consejo na e doñonan di trabou ta pa informa tur empleado di immediato di e ilegalidad di e ponencia di e minister di labor pa asina nan ta informa correctamente y pa nan ta consciente di e posibel consequencianan di por ejempel si nan keda sin presenta na trabou dia 15. Den mi opinion un trahado no por disculpa su mes scondiendo tras di e palabran di e minister. E discusion aki ta parce uno incecesario mirando e circumstancianan actual y cu por trece disoputa na pai di trabou.  Di otro banda como cu un minister por wordo teni personalmente responsabel ora e actua contra ley e ponencia di e minister ta trece un risico financiero y personal pa e minister cu segun mi tambe ta inecesario.  Di con? Pasobra si e e minister actua contra ley y pesey doñonan di trabou sinti nan llama pa paga overtime e ora nan por tene gobierno responsabel pa e daño cual lo ta minimo e 100% extra di salario paga pa cada empleado. Pa evita esaki (un siguiente) gobierno lo por paga e daño aki pero esaki tambe lo ta contra ley cual lo pone cu otro ministernan lo por wordo teni personalmente responsabel door di  (un siguiente of me mesun) gobierno.