WEB ARUBA N.V: Carni of pisca?

December 20th, 2021

WEB Aruba N.V. ta un compania vital pa nos pais. De facto, e ta encarga exclusivamente cu produccion di awa y coriente pa nos comunidad. Den pasado e tawata un departamento di gobierno pero desde aña 1992 a dicidi di cambia su structura legal y hinc’e den structura di un NV. WEB Aruba y N.V. ELMAR a wordo incorpora como companianan independiente bou di capa di Utilities Aruba N.V., un compania cu tin Gobierno di Aruba como su unico accionista. Riba e website di WEB por mira entre otro e historia di desalinacion di awa na Aruba. 

“E historia di desalinacion na Aruba a cuminsa mas cu shen aña pasa cu produccion di proceswater na 1903 na e mina di oro, Gold Mining Company (1899-1916). Hasta den e prome etapa aki, tawata obvio cu e awa natural y awa colecta di awasero no tabata suficiente pa e proceso kimico di extrae oro. E decision a wordo tuma pa desalina awa di lama, colecta for di Spaans Lagoen”. Tambe ta curioso pa lesa cu tabatin un periodo cu WEB no por a cumpli cu demanda halto di awa y pa WEB por a cumpli cu demanda e mester a importa awa di bebe na aña 1982, 1983 y 1990 for di Merca, Venezuela y Dominica. 

Compania priva?

Ta ser bisa cu e servicio di suministro di awa a wordo privatisa na momento cu a hinc’e den un NV. Kisas mas bien mester uza e terminologia independisa. Di otro banda e ta wordo yama patrimonio di pueblo y un compania unda semper gobierno mester tin di bisa.  Ora di forma gobierno, WEB ta cay bou di un ministerio cu ta politicamente responsabel pa esaki y cu tin entre otro e poder pa nombra entre otro director y miembronan di e board. Aunke tambe ta ser bisa cu e minister no tin nada di bisa, e no ta mete etc. Esey ta trece cu ne cu e compania un rato ta parce carni anto un rato e ta pisca.

Pandemia WEB 1

Den pandemia tambe nos por a wak dos diferente WEB. E prome WEB (“WEB 1”) ta esun cu publicamente via instrucion directo a wordo yama door di gobierno pa corta 12.6% di su gasto personal. Esaki pasobra como compania di gobierno of compania estatal of NV publico e tambe mester ta solidario of mester yuda baha gasto di gobierno pa asina “cumpli” cu exigencia of palabracion cu Hulanda. Aki WEB 1 a wordo cualifica manera un parti integral di gobierno, pa gobierno y pa sirbi e interes general. A splica den un forma hopi extenso dicon WEB no ta zomaar un NV pero cu e ta un entidad cu un carakter publico. Den corte y den medionan WEB e tempo ey a bisa cu nan no tin choice y cu nan mester cumpli cu instruccion di gobierno o sea cu ordo a bin di ariba. Tur esaki a wordo treci den un forma asina pasiona y convincente cu hasta por a kere den e sentencia cu corte a haci un excepcion nunca antes visto y a considera e interes general di pais Aruba como un di e motibonan pa interferi den e relacion laboral y permiti un cambio unilateral den e condicion primario di trabou o sea den e pago di e trahadonan di WEB. Sentencianan cu ta desvia di e normanan huridico asina ta cay manera un sorpresa y ta laga bo ta pensa so. Di otro banda ora bo bay corte bo mester por spera tur cos, tambe cu un excepcion of sorpresa asina. Di experiencia di mi y otro coleganan por wak of tende cu durante un caso e (mal) beis di e hues e dia ey por pone cu bo ta end up cu un sentencia cu ta desvia y cu bo tin pa biba cu ne te ora e corte di apelacion kit’e for di mesa. Fastioso y kisas no locual bo ta haya durante bo estudio pero si un realidad. Pesey tin biaha ta bon pa considera alternativa prome cu bay corte. Den pasado mi a elabora por ehempel riba e opcion di mediacion.  

NDA WEB 2

E ultimo siman(nan) a papia hopi di un contract entre WEB y un compania Mericano. Parlamento a pidi pa wak esaki y gobierno a bisa cu no por comparti e contract pasobra tin un NDA. Un NDA ta e afkorting pa un non-disclosure agreement. Por medio di un acuerdo asina partidonan ta palabra cu nan lo mantene cierto informacion cu nan lo comparti cu otro, den forma secreto. Riba su mes esaki ta un practica comun entre partidonan priva. Di otro banda, un gobierno tin un carakter publico unda ta papia hopi di  transparencia. Mi no ta bai den mas detayes di e NDA, pasobra tampoco mi sa kico e NDA ta bisa precies. Locual tawata remarcabel ta con diferente nos a bay di WEB 1 pa WEB 2. Den parlamento WEB 2 ta (of a bira) un compania los di gobierno, cu directornan y comisarionan cu ta opera independiente di gobierno, den cual e unico accionista – gobierno – no ta y no por mete. Esaki ta zona hopi otro cu e WEB 1 cu ta un empresa publico y cu mester sigui instruccion di e accionista. Awor WEB ta wheel and deal y gobierno no tin nada di bisa y e poder di parlamento a wordo limita via di un NDA. Awor ta gobierno no tin choice y mester baha cabes pa WEB 2. Straño cu esaki por zona pero asina e cos a bay. 

Den corte na 2022 cua WEB?

Otro luna e caso di e sindicato di WEB contra WEB lo continua. Algo cu sigur lo ta curioso ta si den corte lo presenta WEB 1 of e WEB 2. E WEB publico di pueblo cu ta corta salario riba ordo di gobierno of e compania full independiente di gobierno cu lo no insisti cu e recorte salarial pasobra esey ta un peticion di gobierno cual WEB – of course – no ta mara na dje y e lo paga e salarionan manera ta acorda den e contratonan laboral y contratonan colectivo.Nos lo haña sa pronto si WEB ta carni of pisca!