Weed a dal e! E por dal abo tambe

SUMMARY:

In this week’s column, I discuss a labor case involving the immediate dismissal of an employee based on a violation of the employer’s zero-tolerance drug policy. The court ruled that the dismissal was justified. In the end, I give some recommendations for both employees and employers that may have to deal with drug use on the work floor. I also at the link to my latest labor law publication which can be obtained online.#work #employeerights #employmentlaw #employmentlawyer #gomezcoffie #law

INTRO

Casonan di labor ta bin dilanti cu hopi frecuencia den corte. Regularmente ta publica sentencianan. Esaki riba su mes no ta nada straño pasobra tratamento di e caso ta publico y e sentencia tambe ta pronuncia den publico. Esaki ta ancra den ley. Awor, si bo lesa y studia sentencianan den caso laboral, hopi biaha bo por nota den cierto caso un liña cu corte tin tendencia di sigui.

Un liña asina nos por nota den casonan unda un trahado ta test positivo pa weed ora na trabou na haci un random drug test y esey ta pone cu e trahado ta hanya un retiro di inmediato den su body. Den e columna di awe lo mi comparti un caso recien unda esey a pasa y unda por mira e liña menciona. E sentencia mes ta di aña pasa pero ta recientemente a public’e online. E ta anonima conforme reglanan di corte. Conforme e mesun regla, ta menciona nomber di un di e partidonan. Ami lo haci mescos.

ASTEC

ASTEC ta e compania stiwado riba waf y como tal ta ricibi y maneha tur carga cu yega Aruba via maritimo. ASTEC ta opera tambe den un area di siguridad halto, un area di aduana y cu acceso ristringi. Riba e tereno di ASTEC mester tene control continuo pa tur movecion cu tin.

Cero tolerancia

Segun e sentencia m’a lesa cu ASTEC ta mantene un maneho di cero tolerancia pa locual ta uzo di droga door di su empleadonan. Esaki ta hinca den e contratonan laboral, den e manual di empleado y den e contrato colectivo. Den e manual di empleado ta para:

“General

ASTEC ta prohibi uzo, pocesion, benta, compra, traha, distribui, of reparticion di alcohol of droga (lesa: “sustancianan”) riba cualkier di su propiedadnan durante ora di trabao regular of overtime.

Uzo, posicion, benta, of distribucion di “sustancianan” y/of ta bao di influencia di e “sustancianan” ilegal riba cualkier propiedad di ASTEC ta causa pa terminacion di e relacion di trabao de inmediato. (…).

Droganan ilegal ta defini como cualkier droga of sustancia cu:

1. No ta obtenibel legalmente, of

2. Obtenibel legalmente, pero no a wordo obteni na un manera legal (prescribi), of

3. Ta wordo uza na un manera, of pa un motibo, no prescribi of cu intencion maligno. Droganan ilegal ta inclui pero no ta limita na Marihuana, Cocaina, Opiates, Amfetamina y Phencyclidine (OCO).”

Parti di e maneho aki tambe ta inclui haci random drug testing na pia di trabou. Esun cu test positivo generalmente den ASTEC lo wordo retira di trabao pa un motibo urgente. Aki ta mustra cu segun ASTEC: “bo faya, bo ta haya”.

Ki a pasa?

Riba un diaranson – pero no na un treinstation #jeon – a instrui un persona cu ta traha como security officer di ASTEC pa haci un random drug test. E test a sali positivo pa uzo di weed. E empleado a nenga e oportunidad pa haci un di dos test. El a admiti di a haci uzo di weed riba e diasabra cu a pasa durante su tempo liber. ASTEC a suspend’e y despues retir’e di forma inmediato.

Posicion di e empleado

E empleado a bay corte pa reta su retiro. E a trece dilanti, entre otro, cu e uzo di weed no tawata na trabou. Cu esaki tabata durante su tempo liber riba e diasabra prome. Tambe el a bisa cu esaki tabata e unico biaha cu el a uza weed y tabata den un momento debil debi na circunstancianan familiar personal y tragico. E efecto lo a pasa despues di 3 ora. Ora el a bin traha despues di e weekend e no tabata bou di influencia di weed mas y a haci su trabou manera mester ta y na ningun momento a faya cu ASTEC of pone ASTEC su integridad na peliger. 

Posicion di ASTEC

E compania di su banda a mustra riba su maneho, e funcion critico di tanto e compania como di e security officer y a insisti cu e retiro ta hustifica.

Corte

Corte a considera cu e test a sali positivo, e empleado a nenga un di dos test y cu empleado a admiti di a huma mita (0.5) pito. Corte ta haya cu si e empleado kier a bisa cu e maneho di ASTEC ta viola su derecho di privacidad, cu esaki no ta un argumento valido. Corte ta haya cu e random testing y e maneho di ASTEC ta sirbi un proposito legitimo cual ta pa protege e integridad di e compania y evita cu elementonan criminal por interferi den e operacion di e compania. Cu e base aki corte a rechasa e demanda di e empleado pa bolbe bek trabou. Segun corte, ASTEC mester por confia cu na tur momento su trahadonan ta 100% drug free.

Caso Hyatt na corte supremo

Algun aña pasa Hyatt Regency Aruba a kita un empleado cu a test positivo pa droga. E caso a bay te corte supremo. Ey Hyatt a haya rason. E caso di Hyatt e ora e crea un liña den ley cu doñonan di trabou awor sa (of por) sigui pa cu nan maneho di droga. E mesun liña ey nos por mira den e caso di ASTEC. 

Pero…

Aunke si mir’e critico, por observa cu na mas cu un ocacion corte ta manera salta un elemento di e criterio cu a keda estableci door di corte supremo den e caso di Hyatt, o sea cu Hyatt a duna un chens pa bai rehab prome cu a scohe pa retiro. Dicon? Pasobra ta considera drogadiccion como un malesa. For di e sentencia mi no por a nota si a haci esaki. Kisas pasobra e empleado a bisa cu e tabata un single-user.

Consecuencia pa abo trahado?

Esaki ta trece cu ne cu si abo ta un empleado na un compania cu tin un maneho di cero tolerancia contra droga, bo ta risca bo trabou si bo uza weed na trabou pero tambe si bo dal e den bo tempo liber na cas of na bo lugar faborito. Tin estudionan haci cu ta mustra cu si bo inhala e weed door di cu un hende banda di bo dal un cheiba, abo tin chens di sali positivo ora di un test di urina. Asina ta wak bo caya!

Consecuencia pa abo dunado di trabou

Pa abo como compania, esaki ta trece cu ne cu bo por retira un empleado si e test positivo pa droga, pero pa por haci esaki cu exito bo mester tin bo asuntonan legal bon regla, si no bo ta trompica na caminda. No trompica!

Buki

Gomez publica recientemente su buki cubriendo e leynan laboral cu ta na vigor desde 1 di september 2022. E buki ta obtenibel online:

https://www.aboutthelaws.com/shop/