WhatsApp y fuera! Abuso door di trahado

May 18th, 2021

Hopi biaha por scucha sindicalistanan ta comenta con doñonan di trabou ta abusa di trahado cu no sa di nan derecho. Curioso ta cu nos no sa scucha e mesun sindicalistanan papia di e obligacionnan cu un trahado tin. Parce comosifuera nan ta kere cu e cos ta un one way street. 

Ban dal AO dialuna

Ta pesey nos no ta tende nan ta papia di abuso cu cierto trahadonan ta comete contra nan hefe mientras cu den practica por tende di masha hopi abuso mes cu e ehempel clasico ta di e trahado cu ta rek un paranda den weekend y ta broma di e dia prome caba con e ta bay dal su hefe cu AO duru pa e sosega e body y bin bey. Blacky a hasta compone y canta un cantica di esey.  

Ta treat bo riba cuenta di e bar

E otro abuso cu ta tuma luga hopi ta “mafia” propiedad di e hefe manera inventario, producto of placa. Un tempo pasa na hotelnan a retira, segun mi, mas cu un persona cu ta sirbi drinks na amigonan cu ta bin e bar sin cobra nan y sin punch den e sistema. Asina tin mas y mi por imagina cu casonan asina ta wordo bon tuma nota di dje y tambe warda den un database pa asina tin un log di e hechadonan di baina ‘ki of e asina yama “rotte apples”. E informacion aki ta valioso pa otro dunado di trabou pa asina nan sa di e track record aki prome cu dicidi di tuma un hende asina den servicio.  Awe lo mi ilustra un ehempel concreto di un trahado di hotel cu a abusa grandemente di su doño di trabou. Pero den cual e abuso a back fire pisa y a cost’e su trabou vía un retiro di inmediato anto tur esaki pa motibo di WhatsApp.

E caso

Un persona, ban yam’e “Rudy” pa no uza su nomber di berdad, tawata den servicio di un hotel como assitant hotel manager. Riba un 19 di Januari el a dal un AO, o sea el a meld ziek pa trabou. Dia 23 di januari su hefe a dal’e un retiro di imediato.

Kico a pasa?

Wel, e dia 23 di januari ey un colega na e hotel a habri e laptop di trabou di Rudy. Ora el a haci esey e Desktop Whatsapp a habri. Obviamente Rudy a conecta su whatsapp cu su laptop di trabou. E ora por a mira cu Rudy tawata chat cu su celular cu un amigo y ya e tawata broma na grandi con el a gaña cu e ta AO y cu e no sa con largo e por sigui gaña su doño di trabou. Tambe a nota con el a gaba con bon comedia el a hunga cu su superior ora el a gañe cu e ta malo. Rudy a dorna e chat cu tur sorto di emoji’s pa mustra con el a tuma su doño di trabou y coleganan haci. Pa colmo, e dia despues cu a meld, el a bay solicita pa trabou na un otro caminda. E hotel tabatin screenshot di tur e chatnan aki.  A base di esaki a kita Rudy for di trabou. El a gaña, el a abusa di e confiansa di su doño di trabou y cu esaki el a viola e confiansa cu tabata tin den dje como empleado y colega. Tur esaki hunto a trece cu ne tambe cu a conclui cu el a comete “werkweigering”. Esaki ta ora bo tin pa traha pero bo ta nenga di haci esaki sin base. 

Corte

E caso a bay corte pasobra Rudy kiermen cu no a respeta su derechonan. Esaki nos por yama un caso di ta “wrong and strong”. Hues no a laga e fli ey subi y a duna e hotel rason pa kita Rudy fo’i trabou op staande voet. E retiro mes a mand’e via email den e caso aki. Kisas un otro biaha nan por a manda su retiro via WhatsApp, ya cu aparentemente e ta gusta uza WhatsApp!